Alice Huang Probe: ట్రంప్ ప్రభుత్వంపై సింగపూర్ ఫైర్.. ఆలిస్ హువాంగ్ కేసులో కొత్త మలుపు

Alice Huang Probe: అంతర్జాతీయంగా చర్చనీయాంశమైన ఏఐ సర్వర్ల కొనుగోళ్లు, ఎగుమతుల వ్యవహారం ఇప్పుడు సింగపూర్‌–అమెరికా మధ్య దౌత్యపరమైన అసంతృప్తికి దారితీస్తోంది. తమ దేశంలో జరుగుతున్న దర్యాప్తునకు అమెరికా నుంచి ఆశించిన స్థాయిలో సహకారం అందడం లేదని సింగపూర్ ప్రభుత్వం ఆరోపించింది. ముఖ్యంగా అమెరికాకు చెందిన సర్వర్ తయారీ సంస్థ సూపర్ మైక్రో కంప్యూటర్ నుంచి కీలక సమాచారం సేకరించడంలో ఇబ్బందులు ఎదురవుతున్నాయని వెల్లడించింది. ఇదే సమయంలో ఎన్విడియాతో సంబంధాలున్న వ్యాపారవేత్త ఆలిస్ హువాంగ్ వ్యవహారంపై కూడా సింగపూర్ ప్రభుత్వం కీలక వివరాలను బయటపెట్టింది.

సింగపూర్‌ హోంశాఖ ఆరోపణలు

సింగపూర్ హోం వ్యవహారాల మంత్రిత్వ శాఖ గురువారం వెల్లడించిన వివరాల ప్రకారం.. చైనాకు చెందిన వ్యాపారవేత్త ఆలిస్ హువాంగ్ పాస్‌పోర్టును అక్కడి అధికారులు 2025లోనే స్వాధీనం చేసుకున్నారు. ఆమె కార్యకలాపాలపై జరుగుతున్న విచారణలో భాగంగా ఈ చర్య తీసుకున్నారు. అప్పట్లో సింగపూర్‌లో కార్యకలాపాలు నిర్వహిస్తున్న మెగాస్పీడ్ సంస్థకు ఆలిస్ హువాంగ్ సీఈఓగా వ్యవహరించారు. ఎన్విడియా ఉత్పత్తులను కొనుగోలు చేసే సంస్థల్లో మెగాస్పీడ్ కూడా ఒకటి. 2025 జూన్‌లో అమెరికా వాణిజ్య శాఖకు చెందిన బ్యూరో ఆఫ్ ఇండస్ట్రీ అండ్ సెక్యూరిటీ (బీఐఎస్) అధికారులు మెగాస్పీడ్ సంస్థలో సర్వర్ల రవాణాకు సంబంధించిన తనిఖీలు నిర్వహించారు. ఆ సమయంలో ఆలిస్ హువాంగ్ కూడా అక్కడే ఉన్నారు. ఈ తనిఖీ ద్వారానే మెగాస్పీడ్, ఆలిస్ హువాంగ్ వ్యవహారంపై అమెరికాకు ఆసక్తి ఉందనే విషయం సింగపూర్ అధికారులకు తెలిసింది. ఆ తర్వాత పోలీసులు ఆమెను ప్రశ్నించి, అదే రోజు పాస్‌పోర్టును స్వాధీనం చేసుకున్నారు.

గూఢచర్యంతో సంబంధం లేదు

అయితే ఆలిస్ హువాంగ్‌పై జరుగుతున్న విచారణకు గూఢచర్యంతో సంబంధం లేదని సింగపూర్ స్పష్టం చేసింది. మెగాస్పీడ్ సంస్థలో ఆమె గతంలో నిర్వహించిన సీఈఓ, చైర్‌పర్సన్ పదవులతో పాటు కీలక నిర్ణయాల్లో ఆమెకున్న నియంత్రణ ఆధారంగా కొన్ని ఆర్థిక, వ్యాపార సంబంధిత నేరాలపై దర్యాప్తు చేస్తున్నట్లు తెలిపింది. ఈ కేసు 2025 ఫిబ్రవరిలో ప్రారంభమైంది. సర్వర్ల కొనుగోళ్లకు సంబంధించి తప్పుడు వివరాలు సమర్పించారనే అనుమానంతో మెగాస్పీడ్ సహా పలు సంస్థలపై సింగపూర్ అధికారులు విచారణ చేపట్టారు. ఈ వ్యవహారంలో సూపర్ మైక్రో కంప్యూటర్ సంస్థ కూడా దర్యాప్తు పరిధిలో ఉందని ప్రభుత్వం ధ్రువీకరించింది. అయితే ఈ రెండు కేసుల మధ్య ప్రత్యక్ష సంబంధం ఉందా లేదా అనే విషయాన్ని మాత్రం వెల్లడించలేదు.

మలేషియా మీదుగా సర్వర్ల తరలింపుపై అనుమానాలు

ఈ దర్యాప్తులో ప్రధానంగా పరిశీలిస్తున్న అంశం సర్వర్ల రవాణా మార్గం. విచారణలో ఉన్న కొన్ని సంస్థలు సర్వర్లను కొనుగోలు చేసి సింగపూర్ మీదుగా మలేషియాకు ఎగుమతి చేశాయి. అయితే ఆ పరికరాలు సింగపూర్‌లో విక్రయించకుండా మరో దేశానికి తరలించినట్లు అధికారులు గుర్తించారు. మలేషియా చేరిన తర్వాత ఆ సర్వర్లు వేరే దేశానికి పంపించారా? అలా జరిగితే ఎగుమతి సమయంలో సమర్పించిన వివరాలు సరైనవేనా? అనే కోణాల్లో దర్యాప్తు కొనసాగుతోంది.

అమెరికా సహకారంతోనే

ఈ విషయాల్లో స్పష్టత కోసం అమెరికాకు చెందిన సూపర్ మైక్రో సంస్థ సహకారం అవసరమని సింగపూర్ పోలీసులు భావిస్తున్నారు. పలుమార్లు అమెరికా అధికారులను సంప్రదించి, ఆ సంస్థ నుంచి సమాచారం అందేలా చూడాలని కోరినప్పటికీ ఇప్పటివరకు పరిమిత స్థాయిలోనే స్పందన వచ్చిందని సింగపూర్ ప్రభుత్వం అసంతృప్తి వ్యక్తం చేసింది. మొత్తంగా చూసుకుంటే, ఈ వ్యవహారం కేవలం ఒక వ్యాపారవేత్త విచారణకే పరిమితం కాలేదు. ఏఐ సర్వర్ల అంతర్జాతీయ సరఫరా, ఎగుమతి నిబంధనలు, సాంకేతిక పరికరాల గమ్యస్థానంపై దేశాలు ఎంతటి నిఘా ఉంచుతున్నాయనే అంశాలను కూడా ముందుకు తెచ్చింది. ముఖ్యంగా ఒక దేశం నుంచి మరో దేశానికి తరలించే సాంకేతిక పరికరాలు చివరకు ఎక్కడికి చేరుతున్నాయనే ప్రశ్న ఇప్పుడు ఈ దర్యాప్తులో కీలకంగా మారింది.