విదేశీ గడ్డపై రాహుల్ వ్యాఖ్యలు.. బీజేపీ విమర్శలు, వీడియోతో కొత్త ట్విస్ట్

Rahul Gandhi: అమెరికా పర్యటనలో ఉన్న లోక్‌సభ ప్రతిపక్ష నాయకుడు రాహుల్ గాంధీ చికాగో విశ్వవిద్యాలయంలో చేసిన వ్యాఖ్యలు దేశ రాజకీయాల్లో వేడి పుట్టించాయి.

G Krishna
Published on: 19 Nov 2026 7:28 PM IST
Rahul Gandhi
X

విదేశీ గడ్డపై రాహుల్ వ్యాఖ్యలు.. బీజేపీ విమర్శలు, వీడియోతో కొత్త ట్విస్ట్

Rahul Gandhi Chicago Speech: అమెరికా పర్యటనలో ఉన్న లోక్‌సభ ప్రతిపక్ష నాయకుడు రాహుల్ గాంధీ చికాగో విశ్వవిద్యాలయంలో చేసిన వ్యాఖ్యలు దేశ రాజకీయాల్లో వేడి పుట్టించాయి. విదేశీ గడ్డపై నుంచి భారత ప్రజాస్వామ్యం అనారోగ్యంతో ఉందని రాహుల్ అన్నారంటూ గురువారం బీజేపీ నేతలు తీవ్ర విమర్శలు గుప్పించారు. అయితే వార్తా సంస్థలు విడుదల చేసిన వీడియోలో ఆయన ప్రజాస్వామ్యాన్ని 'అనారోగ్యకరమైనది' అని కాకుండా 'పవిత్రమైనది' అని సంబోధించడం వినిపించింది.

ప్రదీప్ భండారీ, అజయ్ అలోక్ విమర్శలు

ఎక్స్‌లో రాహుల్ ప్రసంగ క్లిప్‌ను షేర్ చేసిన బీజేపీ జాతీయ అధికార ప్రతినిధి ప్రదీప్ భండారీ.. రాహుల్‌ను భారత్ వ్యతిరేక ప్రచార నాయకుడిగా అభివర్ణించారు. భారత ప్రజాస్వామ్యం జబ్బుపడిందని విదేశీ గడ్డపై నుంచి రాహుల్ అన్నారని, ఆయన తన కుటుంబాన్ని మాత్రమే ప్రేమిస్తూ ప్రజాస్వామ్యాన్ని ద్వేషిస్తున్నారని భండారీ ఆరోపించారు. భారత వ్యవస్థకు, పౌరులకు, ప్రజాస్వామ్యానికి ఆయన వ్యతిరేకి అని విమర్శించారు.

మరో బీజేపీ అధికార ప్రతినిధి అజయ్ అలోక్ రాహుల్‌పై వ్యక్తిగత విమర్శలకు దిగారు. గత పదేళ్లుగా రాహుల్ అనారోగ్యంతో ఉన్నారని, అబ్సెసివ్-కంపల్సివ్ న్యూరోసిస్ సమస్య నెమ్మదిగా మతిమరుపు వైపు వెళ్తోందని ఆరోపించారు. ఆయనకు కాల, ప్రదేశ స్పృహ లేదని, మనసులో ఒకటి అనుకుని మరొకటి మాట్లాడుతున్నారని, తన తల్లి గురించి చేసిన మాటలు భారతీయ సమాజంలో ఆమోదయోగ్యం కాదని వ్యాఖ్యానించారు. మానసిక సమతుల్యతను కోల్పోతున్నారని అలోక్ పేర్కొన్నారు.

చికాగోలో రాహుల్ ఏమన్నారంటే..

చికాగో విశ్వవిద్యాలయంలో విద్యార్థులతో జరిగిన సమావేశంలో.. రిగ్గింగ్ భయం ఉంటే ఎన్నికలను ప్రతిపక్షాలు ఎందుకు బహిష్కరించడం లేదని ఓ విద్యార్థి ప్రశ్నించారు. దీనికి బదులిస్తూ రాహుల్ గాంధీ.. భారత ప్రజాస్వామ్యం తనకు పవిత్రమైనదని, దానిపై ప్రశ్నలు లేవనెత్తాలంటే నూటికి నూరు శాతం పక్కా ఆధారాలు అవసరమని స్పష్టం చేశారు. సరైన ఆధారాలు లేకుండా ప్రజాస్వామ్యంలో సమస్య ఉందని చెప్పడం కష్టమని అన్నారు.

ఎన్నికలను బహిష్కరించే విషయంపై మాట్లాడుతూ.. ఎన్నికల్లో పాల్గొనవద్దని కార్యకర్తలకు చెబితే వారి పరిస్థితి ఏమిటని రాహుల్ ప్రశ్నించారు. పోటీ చేయబోమని చెప్పిన క్షణమే భారత ప్రజాస్వామ్యం అంతమైపోతుందని, ఆ వ్యవస్థ నాశనం కావడాన్ని తాము కోరుకోమని చెప్పారు. వ్యవస్థలోని ఆరోపిత అవకతవకలను దేశ ప్రజల ముందు బయటపెట్టి, ప్రజాస్వామ్య వ్యవస్థ నాశనమవుతోందని ప్రజలు గ్రహించే వరకు ఎన్నికల్లో పోటీ చేస్తూ పోరాటాన్ని కొనసాగించడమే తమ వ్యూహమని రాహుల్ గాంధీ వివరించారు.

G Krishna

G Krishna

అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్‌తో పాటు ఇంట్రెస్ట్‌ను కూడా అందిస్తుంది.