అమెరికాలో భారతీయ మహిళ హవా.. లాస్ ఏంజెలెస్ మేయర్ రేసులో నిత్యా రామన్ జోరు

అమెరికా రాజకీయాల్లో భారతీయ మూలాలున్న మరో మహిళ పేరు మార్మోగుతోంది. లాస్ ఏంజెలెస్ మేయర్ ఎన్నికల్లో భారతీయ సంతతికి చెందిన నిత్యా రామన్ సంచలనం సృష్టించారు. ప్రస్తుత మేయర్ కరెన్ బాస్‌తో జరిగిన హోరాహోరీ పోరులో ఆమె ఆధిక్యంలో కొనసాగుతున్నారు. దీంతో అమెరికాలోని అతిపెద్ద నగరాల్లో ఒకటైన లాస్ ఏంజెలెస్‌కు తొలి మహిళా మేయర్‌గా బాధ్యతలు చేపట్టే అవకాశం ఆమెకు దక్కనుంది. భారతీయ మూలాలున్న మహిళ ఈ స్థాయిలో కీలక పదవికి చేరువ కావడం ఆసక్తికరంగా మారింది.

అయితే ఓట్ల లెక్కింపు ఇంకా పూర్తికాలేదు. నవంబర్ 5 నాటికి అందుబాటులో ఉన్న సమాచారం ప్రకారం నిత్యా రామన్‌కు 4,05,193 ఓట్లు రాగా, కరెన్ బాస్‌కు 3,79,069 ఓట్లు వచ్చాయి. దాదాపు 67 శాతం ఓట్ల లెక్కింపు పూర్తయ్యే సమయానికి నిత్యా రామన్ ఆధిక్యంలో ఉన్నారు. తుది ఫలితాలు వెలువడాల్సి ఉంది.

కేరళలో పుట్టి అమెరికాలో స్థిరపడ్డారు

నిత్యా రామన్ 1981లో కేరళలో జన్మించారు. ఆమెకు ఆరేళ్ల వయసు ఉన్నప్పుడు కుటుంబం అమెరికాకు వెళ్లింది. అక్కడే చదువుకుని పెరిగిన ఆమె 22 ఏళ్ల వయసులో అమెరికా పౌరసత్వం పొందారు. చిన్నప్పటి నుంచే సామాజిక సమస్యలు, నగరాల అభివృద్ధిపై ఆసక్తి పెంచుకున్న నిత్యా.. ఉన్నత విద్యను కూడా అదే రంగంలో కొనసాగించారు. ప్రఖ్యాత హార్వర్డ్ యూనివర్సిటీలో డిగ్రీ పూర్తి చేసిన ఆమె.. అనంతరం మసాచుసెట్స్ ఇన్‌స్టిట్యూట్ ఆఫ్ టెక్నాలజీ (ఎంఐటీ) నుంచి పట్టణ ప్రణాళికలో మాస్టర్స్ డిగ్రీ పొందారు. రాజకీయాల్లోకి రాకముందు చెన్నైలో 'ట్రాన్స్‌పరెంట్ చెన్నై' పేరుతో ఒక పరిశోధనా సంస్థను స్థాపించారు. పారిశుధ్యం, రోడ్లు, ఇతర పౌర సదుపాయాల మెరుగుదలపై ఈ సంస్థ పనిచేసింది.

నగర సమస్యలపై ప్రత్యేక దృష్టి

2013లో లాస్ ఏంజెలెస్‌కు వెళ్లిన నిత్యా రామన్ అక్కడి స్థానిక సమస్యలపై పనిచేయడం ప్రారంభించారు. నిరాశ్రయుల సమస్య పరిష్కారం కోసం ఏర్పాటైన సంస్థతో కలిసి పనిచేశారు. నగరంలో మౌలిక సదుపాయాల అభివృద్ధి, ప్రజలకు మెరుగైన సేవలు అందించడంపై దృష్టి పెట్టారు. ఈ అనుభవమే ఆమెను రాజకీయాల వైపు నడిపించింది. 2020లో తొలిసారిగా లాస్ ఏంజెలెస్ నగర కౌన్సిల్ సభ్యురాలిగా ఎన్నికయ్యారు. అప్పటి నుంచి నగరంలోని పలు సమస్యలపై గళమెత్తుతూ ప్రజల్లో గుర్తింపు తెచ్చుకున్నారు. ముఖ్యంగా పారిశుధ్యం, రవాణా, గృహ వసతి, నిరాశ్రయుల సమస్యలపై ఆమె చేసిన కృషి రాజకీయంగా బలాన్ని పెంచింది.

కరెన్ బాస్‌తో హోరాహోరీ పోరు

లాస్ ఏంజెలెస్ మేయర్‌గా ఉన్న కరెన్ బాస్‌కు మరోసారి అవకాశం ఇవ్వాలా? లేక నగరంలో మార్పు తీసుకురావాలంటున్న నిత్యా రామన్‌కు పట్టం కట్టాలా? అనే అంశంపై ఈ ఎన్నిక సాగింది. కరెన్ బాస్‌కు నగర రాజకీయాల్లోని కీలక నేతలు, కార్మిక సంఘాల మద్దతు లభించింది. మరోవైపు నిత్యా రామన్‌కు ప్రజాస్వామ్య సామ్యవాద సంఘాలు, రవాణా రంగంలో పనిచేసే కొన్ని సంస్థలు మద్దతుగా నిలిచాయి.

నగరంలో పెరుగుతున్న నిరాశ్రయుల సమస్య, ప్రజా భద్రత, అందుబాటు ధరల్లో ఇళ్లు వంటి అంశాలు ఎన్నికల్లో కీలకంగా మారాయి. నిరాశ్రయుల సమస్యను పరిష్కరించడంలో కరెన్ బాస్ ప్రభుత్వం విఫలమైందని నిత్యా రామన్ విమర్శించారు. తాను మేయర్‌గా ఎన్నికైతే 2028 వేసవి నాటికి వీధుల్లో నివసించే వారి సంఖ్యను సగానికి తగ్గిస్తానని, తన నాలుగేళ్ల పదవీకాలం ముగిసేలోపు ఈ సమస్యను పూర్తిగా పరిష్కరించేందుకు కృషి చేస్తానని హామీ ఇచ్చారు.

ఫలితాలపై ఉత్కంఠ.. భారతీయుల్లో ఆసక్తి

ఎన్నికల ఫలితాల లెక్కింపు కొనసాగుతున్న సమయంలో నిత్యా రామన్ తన మద్దతుదారులను ఉద్దేశించి మాట్లాడారు. తనకు ఆశాభావం ఉందని చెబుతూనే.. తుది ఫలితాలు వచ్చే వరకు సంయమనం పాటించాలని సూచించారు. ఓట్ల లెక్కింపు పూర్తయ్యే కొద్దీ ఆమె ఆధిక్యం కొనసాగుతుందా? కరెన్ బాస్ తిరిగి పుంజుకుంటారా? అన్నది ఆసక్తికరంగా మారింది.

కేరళలో పుట్టి, అమెరికాలో పెరిగి, అక్కడి రాజకీయాల్లో తనకంటూ ప్రత్యేక గుర్తింపు తెచ్చుకున్న నిత్యా రామన్ ప్రయాణం ఎంతోమందికి స్ఫూర్తినిస్తోంది. లాస్ ఏంజెలెస్ మేయర్ ఎన్నికల్లో ఆమె ఆధిక్యం భారతీయ మూలాలున్న ప్రజల్లోనూ ఆసక్తిని పెంచుతోంది. తుది ఫలితాలపై ఇప్పుడు అందరి దృష్టి నెలకొంది.