Europe Bomb Threats: యూరప్‌ను వణికిస్తున్న వరుస బెదిరింపులు..మొన్న సైబర్‌దాడి, నేడు బాంబు బెదిరింపులు
యూరప్‌లో వరుస భద్రతా హెచ్చరికలు కలకలం రేపుతున్నాయి. ఇటలీలో 300కు పైగా పాఠశాలలకు బాంబు బెదిరింపులు రావడంతో విద్యార్థులను ఖాళీ చేయించారు. ఈ ఘటనపై ప్రధాని జార్జియా మెలోని అత్యవసర సమావేశానికి సిద్ధమయ్యారు.
Europe Bomb Threats: యూరప్‌లో వరుస భద్రతా హెచ్చరికలు ఆందోళన కలిగిస్తున్నాయి. మొన్నటి వరకు సైబర్‌దాడులతో ప్రభుత్వ వ్యవస్థలు, ఆసుపత్రులు, రవాణా సేవలు లక్ష్యంగా మారగా.. ఇప్పుడు పాఠశాలలకు బాంబు బెదిరింపులు రావడం కలకలం రేపుతోంది. నవంబర్‌ 11న ఇటలీలో ఏకంగా 300కు పైగా పాఠశాలలకు ఈ తరహా హెచ్చరికలు అందాయి. దీంతో ముందుజాగ్రత్త చర్యగా విద్యార్థులు, ఉపాధ్యాయులను భవనాల నుంచి బయటకు పంపించారు. స్కాట్లాండ్‌, ఐర్లాండ్‌, ఉత్తర ఐర్లాండ్‌లోనూ పలు విద్యాసంస్థలకు ఇలాంటి సందేశాలు వచ్చినట్లు సమాచారం. ఈ పరిణామాల నేపథ్యంలో ఇటలీ ప్రధాని జార్జియా మెలోని అత్యవసర ప్రభుత్వ సమావేశానికి సిద్ధమయ్యారు.
300 పాఠశాలలకు ఒకేసారి బెదిరింపు సందేశాలు
ఇటలీలోని పాఠశాలలకు వచ్చిన ఈమెయిళ్లలో భవనాల లోపల రిమోట్‌ ద్వారా పేల్చగల బాంబులు అమర్చినట్లు పేర్కొన్నారు. ఇటలీ ప్రజలపై మారణహోమం జరగబోతోందంటూ హెచ్చరించారు. అంతేకాదు, ప్రధాని మెలోని ప్రయాణించే కారులోని ఇంజిన్‌లో కూడా బాంబు పెట్టినట్లు సందేశంలో ప్రస్తావించారు. ఈ సమాచారంతో అధికారులు అప్రమత్తమయ్యారు. విద్యాశాఖ మంత్రి గియుసెప్పే వాల్డిటారా వెల్లడించిన వివరాల ప్రకారం, 300కు పైగా పాఠశాలలను ఖాళీ చేయించారు.
ముప్పు లేదన్న మెలోని.. దర్యాప్తుకు ఆదేశాలు
ఈ ఘటనపై స్పందించిన ప్రధాని మెలోని, భద్రతా సంస్థలు పరిస్థితిని నిరంతరం పర్యవేక్షిస్తున్నాయని తెలిపారు. ప్రాథమిక తనిఖీల్లో ఎలాంటి వాస్తవ ప్రమాదానికి సంబంధించిన ఆధారాలు లభించలేదని వెల్లడించారు. ప్రజల్లో భయాందోళనలు సృష్టించడమే లక్ష్యంగా ఈ సందేశాలు పంపి ఉండవచ్చని పేర్కొన్నారు. ఇలాంటి ఘటనలు మళ్లీ జరగకుండా తీసుకోవాల్సిన చర్యలపై ప్రభుత్వ అత్యవసర సమావేశంలో చర్చించనున్నారు. ఈ బెదిరింపుల వెనుక రష్యా అనుకూల, మహిళా వ్యతిరేక భావజాలం కలిగిన ఒక బృందం ఉండవచ్చనే అనుమానాలు కూడా ప్రస్తావనకు వచ్చాయి. అయితే దర్యాప్తు పూర్తయ్యే వరకు బాధ్యులెవరన్నది నిర్ధారించలేమని అధికారులు చెబుతున్నారు. ఇటలీ రక్షణ మంత్రి గైడో క్రొసెట్టో మాట్లాడుతూ, యూరప్‌లో భయాందోళనలు సృష్టించి సాధారణ కార్యకలాపాలకు అంతరాయం కలిగించే ప్రయత్నాలు జరుగుతున్నాయని అభిప్రాయపడ్డారు. అయితే ప్రతి ఘటన వెనుక విదేశీ శక్తులే ఉన్నాయని చెప్పలేమని, వ్యక్తిగతంగా భయాందోళనలు సృష్టించే వారు కూడా ఉండవచ్చని పేర్కొన్నారు. మరోవైపు, బ్రిటన్‌లోని పోలీస్‌ స్కాట్లాండ్‌ కూడా అందిన బెదిరింపులు విస్తృతంగా పంపిన సందేశాలేనని, ప్రస్తుత అంచనా ప్రకారం వాటిని విశ్వసనీయమైన ముప్పుగా పరిగణించడం లేదని తెలిపింది.
సైబర్‌దాడులతో ఇప్పటికే అప్రమత్తమైన యూరప్‌
పాఠశాలలకు బెదిరింపులు రావడానికి ముందు కూడా యూరప్‌లో పలు సైబర్‌ భద్రతా సమస్యలు వెలుగులోకి వచ్చాయి. గత వారం వివిధ దేశాల్లోని విమానయాన సంస్థలకు బాంబు హెచ్చరికలు రావడంతో కొన్ని విమానాలు అత్యవసరంగా ల్యాండ్‌ కాగా, మరికొన్నింటిని ఇతర విమానాశ్రయాలకు మళ్లించారు. నవంబర్‌ మొదటి వారంలో ఫ్రాన్స్‌లోని మూడు రక్తనిధి కేంద్రాల ఉష్ణోగ్రత నియంత్రణ వ్యవస్థల్లోకి హ్యాకర్లు చొరబడేందుకు ప్రయత్నించారు. అయితే సాంకేతిక నిపుణులు సకాలంలో గుర్తించడంతో రక్త నిల్వలు పాడవకుండా చర్యలు తీసుకున్నారు. అలాగే సాఫ్ట్‌వేర్‌ లోపాలను ఆసరాగా చేసుకుని దాడులు జరగకుండా పలు యూరోపియన్‌ ప్రభుత్వాలు తమ వెబ్‌సైట్లను తాత్కాలికంగా నిలిపివేసి భద్రతా నవీకరణలు చేపట్టాయి. కొన్ని దేశాల్లోని శీతలీకరణ వ్యవస్థలపై జరిగిన సైబర్‌ దాడులకు సంబంధించి ఫ్రాన్స్‌ ఇరాన్‌పై ఆరోపణలు చేసింది.
యూరప్‌ ముందున్న అసలు సవాలు
విమానాలు, రక్తనిధులు, ప్రభుత్వ వెబ్‌సైట్లు, ఇప్పుడు పాఠశాలలు.. ఇలా కీలక వ్యవస్థల చుట్టూ భద్రతా సమస్యలు తలెత్తడం యూరప్‌ దేశాలకు కొత్త సవాలుగా మారింది. ఈ ఘటనలన్నీ ఒకే కుట్రలో భాగమని నిర్ధారించే ఆధారాలు ప్రస్తుతానికి లేవు. అయినప్పటికీ, తప్పుడు బెదిరింపులే అయినా ప్రజల్లో భయం సృష్టించడంతో పాటు అత్యవసర సేవలపై ఒత్తిడి పెంచుతాయి. అందుకే వీటి వెనుక ఉన్న వ్యక్తులు, నెట్‌వర్క్‌లను గుర్తించడం యూరప్‌ భద్రతా సంస్థలకు కీలకంగా మారింది.
Rudrachander
రుద్ర చందర్‌ తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్‌టీవీ డిజిటల్, మల్లెమాల ఎంటర్‌టైన్‌మెంట్‌లో సేవలందించారు. ఎడిటోరియల్ లీడర్‌షిప్, కథనం చెప్పే శైలిలో ప్రత్యేక గుర్తింపు పొందారు