Alice Huang: ఎన్విడియా రహస్యాల చోరీ వివాదం.. ఎవరీ చైనా మహిళ ఆలిస్ హువాంగ్?

Alice Huang: ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) రంగంలో సంచలనం సృష్టిస్తున్న ఎన్విడియా సంస్థ ఇప్పుడు ఒక అంతర్జాతీయ గూఢచర్య వివాదంతో వార్తల్లో నిలిచింది. ఆ సంస్థ అధినేత జెన్సన్ హువాంగ్‌తో సన్నిహిత సంబంధాలు కలిగి ఉన్నట్లు ప్రచారం జరుగుతున్న చైనా వ్యాపారవేత్త ఆలిస్ హువాంగ్ చుట్టూ ఈ వివాదం తిరుగుతోంది. చైనా నిఘా సంస్థల కోసం ఆమె సమాచారాన్ని సేకరించారనే ఆరోపణలు అమెరికా భద్రతా వర్గాల నుంచి వచ్చినట్లు ది న్యూయార్క్ టైమ్స్ కథనం వెల్లడించింది. ముఖ్యంగా అత్యాధునిక AI చిప్స్ విక్రయాలకు సంబంధించిన నిర్ణయాలపై చైనా ప్రభావం చూపేందుకు ఈ వ్యవహారం ఉపయోగపడిందా అనే ప్రశ్నలు ఇప్పుడు తలెత్తుతున్నాయి.

టీవీ రిపోర్టర్ నుంచి టెక్నాలజీ రంగంలోకి..

ఆలిస్ హువాంగ్ అసలు పేరు హువాంగ్ లే. ఆమె చైనా పౌరురాలు. కెరీర్ ప్రారంభంలో చైనాలో టెలివిజన్ రిపోర్టర్‌గా పనిచేశారు. ఆ తర్వాత మీడియా రంగాన్ని విడిచిపెట్టి వ్యాపారం, సాంకేతిక రంగాల్లోకి అడుగుపెట్టారు. క్రమంగా సింగపూర్‌కు చెందిన మెగాస్పీడ్ (Megaspeed) అనే డేటా సెంటర్ సంస్థలో కీలక బాధ్యతలు చేపట్టారు. ఈ సంస్థ ప్రధానంగా AI కంప్యూటింగ్ సేవలను అందిస్తుంది. అంటే పెద్ద మొత్తంలో కంప్యూటింగ్ సామర్థ్యం అవసరమయ్యే టెక్నాలజీ కంపెనీలకు సర్వర్లు, ప్రాసెసింగ్ సదుపాయాలను అద్దెకు ఇస్తుంది. ఈ వ్యాపారానికి అత్యాధునిక ఎన్విడియా చిప్స్ ఎంతో అవసరం. ది న్యూయార్క్ టైమ్స్ కథనం ప్రకారం, 2024 నుంచి రెండేళ్ల వ్యవధిలో మెగాస్పీడ్‌కు అనుబంధంగా ఉన్న సంస్థలు సుమారు 4.8 బిలియన్ డాలర్లకు పైగా విలువైన ఎన్విడియా చిప్స్, పరికరాలను కొనుగోలు చేసినట్లు వాణిజ్య రికార్డులు సూచిస్తున్నాయి. భారత కరెన్సీలో ఇది దాదాపు రూ.40 వేల కోట్లకు పైమాటే. ఈ భారీ కొనుగోళ్లు అమెరికా అధికారుల దృష్టిని ఆకర్షించాయి.

చైనా నిఘా సంస్థతో సంబంధాలున్నాయా?

అమెరికా నిఘా సంస్థలు దాదాపు ఏడాది పాటు ఆలిస్ హువాంగ్ కార్యకలాపాలు, సమాచార సంబంధాలను పరిశీలించినట్లు మీడియా కథనాలు వెల్లడించాయి. చైనా ప్రభుత్వ భద్రతా విభాగమైన మినిస్ట్రీ ఆఫ్ స్టేట్ సెక్యూరిటీ (MSS) ఆమెను తమ కోసం పనిచేసే వ్యక్తిగా నియమించుకుందని అమెరికా నిఘా వర్గాలు నిర్ధారించినట్లు నివేదికలు పేర్కొన్నాయి. ఎన్విడియా అధినేత జెన్సన్ హువాంగ్‌తో ఆమెకు ఉన్న పరిచయాన్ని ఉపయోగించుకుని సంస్థ వ్యాపార వ్యూహాలు, అత్యాధునిక చిప్స్ విక్రయాలకు సంబంధించిన సమాచారాన్ని బీజింగ్‌కు చేరవేసి ఉండవచ్చన్నది ప్రధాన అనుమానం. అయితే ఆమె ఏయే రహస్యాలను సేకరించారు? వాటిని చైనాకు అందించారా? అనే విషయాలు ఇప్పటికీ పూర్తిగా బహిర్గతం కాలేదు.

ఎన్విడియా అధినేతతో పరిచయం.. అసలు వివాదం ఇక్కడే!

ఈ వ్యవహారంలో మరో ఆసక్తికరమైన అంశం జెన్సన్ హువాంగ్‌తో ఆలిస్‌కు ఉన్న పరిచయం. టెక్నాలజీ సమావేశాలు, వ్యాపార విందులు, ప్రైవేట్ కార్యక్రమాల్లో వీరిద్దరూ కలిసినట్లు కొన్ని ఫొటోలు, నివేదికలు బయటకు వచ్చాయి. అయితే వీరిద్దరూ బంధువులు కాదు. జెన్సన్ హువాంగ్‌కు ఆమెతో ఉన్న సంబంధంపై వచ్చిన వార్తలు కూడా అంతర్జాతీయంగా చర్చనీయాంశమయ్యాయి. ఈ ఆరోపణల నేపథ్యంలో నవంబర్ 8న ఎన్విడియా బోర్డు స్వతంత్ర విచారణకు ఆదేశించింది. స్వతంత్ర డైరెక్టర్లు, బయటి న్యాయ నిపుణులు ఈ వ్యవహారాన్ని పరిశీలించనున్నారు. మరోవైపు జెన్సన్ హువాంగ్ తన కుటుంబానికి, ఉద్యోగులకు క్షమాపణలు చెబుతూ వ్యక్తిగత జీవితంలో భార్యకు నమ్మకద్రోహం చేసినట్లు అంగీకరించారు. అయితే ఈ అంగీకారాన్ని ఆలిస్‌పై వచ్చిన గూఢచర్య ఆరోపణలకు రుజువుగా భావించలేం.

ఎన్విడియా ఏం చెబుతోంది?

తమ సంస్థ రహస్యాలు లేదా అమెరికా జాతీయ భద్రతకు సంబంధించిన సమాచారం బయటకు వెళ్లినట్లు ఎలాంటి ఆధారాలు లేవని ఎన్విడియా స్పష్టం చేసింది. కస్టమర్లతో సమావేశాలు జరపడం సీఈఓ బాధ్యతల్లో భాగమని, జెన్సన్ హువాంగ్ ప్రతి సంవత్సరం వేలాది మంది వ్యాపార ప్రతినిధులను కలుస్తారని సంస్థ తెలిపింది. మరోవైపు చైనాపై వచ్చిన ఆరోపణలను ఆ దేశం ఖండించింది. మొత్తంగా చూసుకుంటే, ఈ వివాదం ఒక వ్యక్తికి సంబంధించిన వ్యవహారంగా మాత్రమే మిగిలిపోలేదు. ప్రపంచ AI మార్కెట్‌లో ఆధిపత్యం కోసం అమెరికా, చైనా మధ్య కొనసాగుతున్న పోటీకి మరో కోణాన్ని చూపిస్తోంది. ముఖ్యంగా అత్యాధునిక చిప్స్ ఎవరికి చేరుతున్నాయి? వాటిని ఎవరు నియంత్రిస్తున్నారు? అనే ప్రశ్నలు ఇప్పుడు మరింత ప్రాధాన్యత సంతరించుకున్నాయి. బోర్డు విచారణలో ఎలాంటి విషయాలు బయటపడతాయన్నది ఆసక్తికరంగా మారింది.