ఒకే ఇన్నింగ్స్‌లో 3 సెంచరీలు.. భారత బౌలర్ల తాట తీసిన విండీస్.. భారీ టార్గెట్?

West Indies three centuries: భారత క్రికెట్ జట్టు (Team India)తో గువాహటి బర్సాపరా క్రికెట్ స్టేడియంలో జరుగుతున్న రెండో వన్డేలో వెస్టిండీస్ (West Indies) బ్యాటింగ్ విధ్వంసం సృష్టించింది. టాస్ గెలిచి ముందుగా బ్యాటింగ్ చేసిన కరేబియన్ జట్టు 350 పరుగుల మార్కును దాటేసింది. ఇన్నింగ్స్‌లో ఆరు ఓవర్లకు పైగా మిగిలి ఉండగానే ఈ స్కోరును అందుకోవడం విశేషం. అంతకంటే ఆసక్తికరమైన విషయం ఏమిటంటే, వెస్టిండీస్ టాప్ ఆర్డర్‌లో ముగ్గురు బ్యాటర్లు సెంచరీలు నమోదు చేశారు. జాన్ క్యాంప్‌బెల్ (John Campbell), షై హోప్ (Shai Hope), అమీర్ జాంగూ (Amir Jangoo) మూడంకెల స్కోర్లు సాధించారు. దీంతో ఒకే వన్డే ఇన్నింగ్స్‌లో ముగ్గురు బ్యాటర్లు సెంచరీలు చేయడం ద్వారా వెస్టిండీస్ అరుదైన రికార్డు జాబితాలో చోటు సంపాదించింది. ఈ ఫీట్ వన్డే క్రికెట్‌లో ఇప్పటివరకు ఆరోసారి మాత్రమే నమోదైంది.

ఇన్నింగ్స్ ఆరంభంలో కీసీ కార్టీ (Keacy Carty) కేవలం 9 పరుగులకే ఔటయ్యాడు. ఆ తరువాత క్యాంప్‌బెల్, హోప్ కలిసి భారత బౌలింగ్‌పై ఆధిపత్యం ప్రదర్శించారు. క్యాంప్‌బెల్ కేవలం 65 బంతుల్లోనే సెంచరీ పూర్తి చేశాడు. హోప్ 90 బంతుల్లో మూడంకెల స్కోరును అందుకున్నాడు.

నాలుగో స్థానంలో వచ్చిన జాంగూ కూడా వెనక్కి తగ్గలేదు. అతడు 70 బంతుల్లోనే సెంచరీ మార్కును చేరుకున్నాడు. చివరకు 77 బంతుల్లో 114 పరుగులతో భారీ ఇన్నింగ్స్ ఆడాడు. హోప్ 104 పరుగులు చేయగా, క్యాంప్‌బెల్ 101 పరుగులు సాధించాడు.

ఒకే వన్డే ఇన్నింగ్స్‌లో ముగ్గురు సెంచరీలు చేసిన జట్ల జాబితాలో దక్షిణాఫ్రికా (South Africa), ఇంగ్లండ్ (England), ఆస్ట్రేలియా (Australia) ఇప్పటికే ఉన్నాయి. దక్షిణాఫ్రికా ఈ ఘనతను మూడు సార్లు నమోదు చేసింది. ఇంగ్లండ్, ఆస్ట్రేలియా ఒక్కోసారి ఈ ఫీట్ సాధించాయి. ఇప్పుడు వెస్టిండీస్ కూడా ఆ జాబితాలోకి చేరింది.

టీమిండియాపై ఇది మరో గణాంకంగా నిలిచింది. ఒకే వన్డే ఇన్నింగ్స్‌లో ముగ్గురు ప్రత్యర్థి బ్యాటర్లు సెంచరీలు చేయడం భారత్‌కు రెండోసారి ఎదురైంది. ఈ విషయంలో ఏ జట్టుకైనా ఇదే అత్యధిక సంఖ్యగా ఉంది.

టీమిండియా టార్గెట్ 406..

నిర్ణీత 50 ఓవర్లలో విండీస్ 7 వికెట్లు కోల్పోయి 405 పరుగులు సాధించింది. దీంతో భారత జట్టు ముందు 406 పరుగుల భారీ టార్గెట్ నిలిచింది.