Uppal: పట్టభద్రుల ఎమ్మెల్సీ ఓటరు నమోదుకు నవంబర్ 6 చివరి తేదీ!

Uppal: హైదరాబాద్–రంగారెడ్డి–మహబూబ్‌నగర్ పట్టభద్రుల ఎమ్మెల్సీ నియోజకవర్గ ఓటరు నమోదు ప్రక్రియకు 2026 నవంబర్ 6వ తేదీ చివరి గడువు అని ఏఎస్ రావు నగర్ లోని ఎమ్మెల్యే క్యాంప్ కార్యాలయంలో ఉప్పల్ ఎమ్మెల్యే బండారి లక్ష్మారెడ్డి తెలిపారు.

అర్హులైన పట్టభద్రులందరూ నిర్ణీత గడువులోగా ఫారం-18 ద్వారా తమ ఓటరు నమోదు ప్రక్రియను పూర్తి చేసుకోవాలని ఆయన విజ్ఞప్తి చేశారు.గతంలో పట్టభద్రుల ఓటరుగా నమోదైన వారు సైతం ఈసారి మళ్లీ కొత్తగా దరఖాస్తు చేసుకోవాల్సి ఉంటుందని, ఈ విషయాన్ని ప్రతి ఒక్కరూ గమనించాలని సూచించారు. అర్హత కలిగిన ఏ ఒక్క పట్టభద్రుడు కూడా ఓటరు నమోదుకు దూరం కాకూడదని ఆయన పేర్కొన్నారు.

ఈ సందర్భంగా ఎమ్మెల్యే బండారి లక్ష్మారెడ్డి మాట్లాడుతూ.. ప్రజాస్వామ్య వ్యవస్థలో ఓటు హక్కు అత్యంత విలువైనదని, ముఖ్యంగా పట్టభద్రుల ఎమ్మెల్సీ ఎన్నికల్లో విద్యావంతుల భాగస్వామ్యం ఎంతో ముఖ్యమని అన్నారు. పట్టభద్రుల ఓటు కేవలం ఒక ఎన్నికకు సంబంధించినది మాత్రమే కాదని, విద్యావంతుల ఆలోచనలు, యువత ఆకాంక్షలు, నిరుద్యోగుల సమస్యలు, విద్యా రంగ అభివృద్ధి వంటి అనేక అంశాలకు ప్రాధాన్యత కల్పించే ప్రజాస్వామ్య ప్రక్రియలో భాగమని తెలిపారు.

విద్యావంతులైన పట్టభద్రులు తమ హక్కులపై అవగాహన కలిగి ఉండాలని, ప్రజాస్వామ్య పరిరక్షణలో బాధ్యతాయుతంగా వ్యవహరించాలని అన్నారు. విద్య, ఉపాధి, నిరుద్యోగ సమస్యలు, యువతకు అవకాశాలు, ప్రజా సమస్యల పరిష్కారం వంటి అంశాలపై తమ అభిప్రాయాలను ప్రజాస్వామ్య పద్ధతిలో వ్యక్తపరిచేందుకు ఓటు హక్కు ఒక ముఖ్యమైన సాధనమని పేర్కొన్నారు.

అర్హులైన పట్టభద్రులందరూ ఈ అవకాశాన్ని సద్వినియోగం చేసుకోవాలని కోరారు. పట్టభద్రుల ఓటరు నమోదు ప్రక్రియపై ప్రతి ఒక్కరూ తమ కుటుంబ సభ్యులకు, స్నేహితులకు, పరిచయస్తులకు అవగాహన కల్పించాలని సూచించారు.

ఓటరు నమోదు ప్రక్రియకు చివరి తేదీ నవంబర్ 6 కావడంతో చివరి రోజు వరకు వేచి చూడకుండా ముందుగానే ఫారం-18 ద్వారా దరఖాస్తు చేసుకోవాలని ఎమ్మెల్యే కోరారు.

మీ ఓటు మీ హక్కు.. మీ గొంతుకకు గుర్తింపు.. ప్రజాస్వామ్యంలో మీ భాగస్వామ్యానికి ప్రతీక. ప్రతి అర్హుడైన పట్టభద్రుడు ఓటరుగా నమోదు చేసుకుని ప్రజాస్వామ్య ప్రక్రియలో భాగస్వామి కావాలి అని ఉప్పల్ ఎమ్మెల్యే బండారి లక్ష్మారెడ్డి విజ్ఞప్తి చేశారు.