Hyderabad: ఆసియా క్రీడల్లో తెలంగాణ ఆర్చర్ తానిపర్తి చికిత సంచలనం!

Hyderabad: 2026 ఆసియా క్రీడల ఆర్చరీ విభాగంలో తెలంగాణ ఆర్చర్ తానిపర్తి చికిత డబుల్ గోల్డ్‌‌తో సత్తా చాటారు. మహిళల కాంపౌండ్ టీమ్, మిక్స్‌డ్ టీమ్ ఈవెంట్లలో రెండు పసిడి పతకాలను కైవసం చేసుకుని అంతర్జాతీయ వేదికపై భారత పతాకాన్ని ఎగరేశారు.

​ప్రపంచ రికార్డు సమం చేస్తూ స్వర్ణం

మహిళల కాంపౌండ్ టీమ్ ఫైనల్‌లో చికిత, జ్యోతి సురేఖ వెన్నం, ప్రీతికా ప్రదీప్‌లతో కూడిన భారత బృందం 238-234 తేడాతో చైనాను ఓడించి స్వర్ణ పతకాన్ని నెగ్గింది. ఈ క్రమంలో భారత జట్టు ప్రపంచ రికార్డును సమం చేయడం విశేషం.

​షూట్ ఆఫ్‌లో గెలుపు.. ఒలింపిక్స్ కోటా ఖాయం

మిక్స్‌డ్ టీమ్ ఈవెంట్‌లో చికిత - సాహిల్ జాదవ్ జంట ఉత్కంఠభరితంగా సాగిన షూట్ ఆఫ్‌‌లో దక్షిణ కొరియాపై విజయం సాధించి రెండో పసిడిని అందించారు. ఈ ప్రతిష్టాత్మక విజయంతో భారత్ లాస్ ఏంజెల్స్ 2028 ఒలింపిక్స్ కోటాను కూడా ఖరారు చేసుకుంది.

​గ్రామం నుంచి ఆసియాడ్ స్థాయికి..

పెద్దపల్లి జిల్లా ఎలిగేడు మండలం సుల్తానాపూర్‌కు చెందిన చికిత, గతంలో 2025 ప్రపంచ యువ ఆర్చరీ ఛాంపియన్‌షిప్ (అండర్-21) కాంపౌండ్ విభాగంలో పసిడి గెలిచి ఈ టైటిల్ సాధించిన తొలి భారతీయ మహిళగా చరిత్ర సృష్టించారు. 2023 జాతీయ క్రీడల్లోనూ తెలంగాణ తరఫున స్వర్ణం సాధించిన చికితను, తాజాగా ఆసియాడ్‌లో రెండు పసిడి పతకాలు సాధించిన సందర్భంగా జిల్లా ప్రజాప్రతినిధులు, అధికారులు అభినందించారు.