Hyderabad: సైదాబాద్‌ స్టీల్‌ బ్రిడ్జి వద్ద ప్రమాదం: ఒకరు మృతి!

Hyderabad: పాతబస్తీలోని సైదాబాద్ స్టీల్ బ్రిడ్జి వద్ద ఘోర రోడ్డు ప్రమాదం చోటుచేసుకుంది. స్కూటీపై వెళ్తున్న నరసింహ, రాకేష్‌లను ఓ ఆటో ఢీకొట్టి పరారైంది. ఈ ప్రమాదంలో నరసింహ అక్కడికక్కడే మృతి చెందగా, రాకేష్ తీవ్ర గాయాలపాలయ్యాడు.

మలక్‌పేట్ ఫైర్ స్టేషన్‌కు సుమారు 50 మీటర్ల దూరంలో ఈ ప్రమాదం జరిగినట్లు సమాచారం. ప్రమాదంలో రాకేష్ కాలికి, శరీరంలోని ఇతర భాగాలకు తీవ్ర గాయాలయ్యాయి. సమాచారం అందుకున్న పోలీసులు, పెట్రోలింగ్ సిబ్బంది ఘటనాస్థలానికి చేరుకుని సహాయక చర్యలు చేపట్టారు. క్షతగాత్రుడిని ఆసుపత్రికి తరలించేందుకు ఏర్పాట్లు చేశారు.

ప్రమాదానికి కారణమైన ఆటో డ్రైవర్‌ అక్కడి నుంచి పరారైనట్లు తెలుస్తోంది. పరారైన ఆటో కోసం పోలీసులు గాలింపు చేపట్టారు. ఈ ఘటనకు సంబంధించి పూర్తి వివరాలు తెలియాల్సి ఉంది.