Musi Riverfront Plan: మూసీ నదికి కొత్త రూపు.. 55 కిమీ మేర ఐదు జోన్లుగా భారీ రివర్ ఫ్రంట్ ప్రణాళిక
హైదరాబాద్లో 55 కిలోమీటర్ల మేర మూసీ నది పునరుజ్జీవనానికి భారీ ప్రణాళిక సిద్ధమైంది. ఐదు జోన్లుగా తీర అభివృద్ధి, మురుగునీటి నియంత్రణకు ట్రంక్ సీవర్లు ఏర్పాటు చేయనున్నారు.
Musi Riverfront Plan
Musi Riverfront Plan: హైదరాబాద్ మహానగరానికి తలమానికంగా ఉండే మూసీ నదికి పూర్వ వైభవం తెచ్చేందుకు ఇంజినీరింగ్ నిపుణులు ఒక సమగ్ర ప్రణాళికను సిద్ధం చేశారు. సుమారు 55 కిలోమీటర్ల పొడవునా మూసీ తీరాన్ని ఐదు జోన్లుగా విభజించి అభివృద్ధి చేయాలని ప్రతిపాదించారు. నదిలోకి మురుగునీరు కలవకుండా అడ్డుకునేందుకు ప్రత్యేకంగా ట్రంక్ సీవర్ లైన్లు, మురుగునీటి శుద్ధి కేంద్రాలు (STP) నిర్మించనున్నారు. ఇండియన్ రోడ్స్ కాంగ్రెస్ (IRC) సదస్సులో భాగంగా శనివారం జరిగిన సాంకేతిక చర్చాగోష్ఠుల్లో నిపుణులు ఈ వివరాలను వెల్లడించారు.
రామప్ప, వేయి స్తంభాల గుడి నిర్మాణ శైలితో నిర్మాణాలు
మూసీ అభివృద్ధి ప్రాజెక్టులో భాగంగా నదికి ఇరువైపులా రహదారులు, వంతెనలు, సుందరమైన రివర్ ఫ్రంట్ నిర్మాణాలు చేపట్టాలని నిపుణులు సూచించారు. నది తీరంలో కట్టే నిర్మాణాలు వందల ఏళ్ల పాటు చెక్కుచెదరకుండా ఉండాలంటే మన తెలంగాణ చారిత్రక కట్టడాల టెక్నాలజీని వాడుకోవాలని అభిప్రాయపడ్డారు. ముఖ్యంగా వేయి స్తంభాల గుడి, రామప్ప ఆలయ నిర్మాణాల్లో ఉపయోగించిన పురాతన ఇంజినీరింగ్ పద్ధతులను ఆధునిక సాంకేతికతతో అనుసంధానిస్తే నాణ్యమైన ఫలితాలు వస్తాయని ఇంజినీరింగ్ అధికారులు శాస్త్రి, శశిధర్, ఎం. సత్యనారాయణ, పురావస్తు నిపుణుడు శివనాగిరెడ్డి పేర్కొన్నారు.
స్కూళ్ల వద్ద రోడ్డు భద్రత.. వేగాన్ని తగ్గించే కొత్త టెక్నిక్
దేశంలో రోడ్డు ప్రమాదాలను తగ్గించేందుకు ఆధునిక టెక్నాలజీని వాడాలని మరో చర్చాగోష్ఠిలో నిపుణులు స్పష్టం చేశారు. దేశవ్యాప్తంగా ఏటా 1,600 మందికి పైగా చిన్నారులు రోడ్డు ప్రమాదాల్లో చనిపోతున్నారని, అందులో మూడింట రెండొంతుల ప్రమాదాలకు అతివేగమే కారణమని ఆందోళన వ్యక్తం చేశారు. పాఠశాలల చుట్టూ 500 మీటర్ల పరిధిలో ప్రత్యేక పాదచారుల క్రాసింగ్లు, పారాబోలిక్ ప్లాస్టిక్ మార్కర్లు ఏర్పాటు చేయడం ద్వారా వాహనాల వేగాన్ని గంటకు 45-50 కిలోమీటర్ల నుంచి 25-27 కిలోమీటర్లకు తగ్గించగలిగినట్లు వివరించారు. ఈ పద్ధతిని అన్ని ప్రాంతాలకు విస్తరిస్తే విద్యార్థుల ప్రాణాలు కాపాడవచ్చని చెప్పారు.
తెలంగాణ హైవేపై దేశంలోనే తొలిసారి ఏఐ మెషిన్ కంట్రోల్
తెలంగాణలో జాతీయ రహదారుల నిర్మాణంలో అత్యాధునిక టెక్నాలజీని ఉపయోగిస్తున్నట్లు NHAI హైదరాబాద్ ప్రాంతీయ అధికారి శివశంకర్ తెలిపారు. మహబూబ్నగర్-రాయచూర్ జాతీయ రహదారి (NH-167) నిర్మాణంలో దేశంలోనే మొదటిసారిగా ఏఐ ఆధారిత మెషిన్ కంట్రోల్ ప్రాజెక్టును వాడుతున్నట్లు వెల్లడించారు. దీనివల్ల రోడ్డు పనుల్లో అత్యంత కచ్చితత్వం సాధ్యమవుతోందని చెప్పారు. అంతేకాకుండా డిజిటల్ మానిటరింగ్, అడ్వాన్స్డ్ ట్రాఫిక్ మేనేజ్మెంట్ సిస్టమ్, క్యూఆర్ కోడ్ సమాచార బోర్డుల ద్వారా ప్రయాణికులకు మెరుగైన సౌకర్యాలు కల్పిస్తున్నట్లు వివరించారు.
కోల్కతాలో జరగనున్న తదుపరి ఐఆర్సీ సదస్సు
ఈ నెల 19 నుంచి హైదరాబాద్లో జరుగుతున్న ఇండియన్ రోడ్స్ కాంగ్రెస్ సమావేశాల్లో భాగంగా మొత్తం 19 సాంకేతిక చర్చాగోష్ఠులు శనివారంతో ముగిశాయి. రహదారులు, వంతెనల నిర్మాణంలో కొత్త పద్ధతులు, పాదచారుల భద్రతపై నిపుణులు కీలక సూచనలు చేశారు. ఆదివారం మధ్యాహ్నం జరిగే కౌన్సిల్ సమావేశంతో ఈ సదస్సు అధికారికంగా ముగియనుంది. కాగా, ఐఆర్సీ 86వ సదస్సును కోల్కతాలో నిర్వహించాలని నిర్ణయించినట్లు సమాచారం.




