Chaddi Gang: హైదరాబాద్‌లో చెడ్డీ గ్యాంగ్ కలకలం.. అపార్ట్‌మెంట్లకు పోలీసుల హెచ్చరిక

Chaddi Gang: హైదరాబాద్‎లోని మణికొండ నెక్నాంపూర్‌లో జరిగిన దొంగతనం ఘటన స్థానికంగా తీవ్ర కలకలం రేపింది. ఆరుగురు సభ్యులు గల చెడ్డీ గ్యాంగ్ ఒక అపార్ట్‌మెంట్‌లోకి చొరబడి విలువైన వస్తువులను ఎత్తుకెళ్లడం ప్రజలను భయాందోళనకు గురిచేసింది. దొంగలను ప్రతిఘటించిన వారిపై దుండగులు దాడికి పాల్పడటంతో పాటు ఆయుధాలతో బెదిరించినట్లు సమాచారం. ఈ పరిణామాల నేపథ్యంలో జీహెచ్‌ఎంసీ, సీఎంసీ అలాగే ఎంఎంసీ పరిధిలోని రెసిడెన్షియల్ వెల్ఫేర్ అసోసియేషన్స్ అపార్ట్‌మెంట్, విల్లా యాజమాన్య కమిటీలకు అత్యవసర భద్రతా మార్గదర్శకాలను జారీ చేశాయి.

ఇళ్ల చుట్టూ ఉన్న ప్రహరీ గోడల వెంబడి భద్రతను మరింత కట్టుదిట్టం చేయాలని నివాస సంక్షేమ సంఘాలు సూచించాయి. ముఖ్యంగా రాత్రి సమయాల్లో కాంపౌండ్ వాల్స్ చుట్టూ సరిపడా లైటింగ్ లేని చీకటి ప్రాంతాలను వెంటనే గుర్తించాలని పేర్కొన్నాయి. విరిగిన ఫెన్సింగ్‌లు ఉంటే వాటిని వెంటనే బాగు చేయించాలి. నేరస్థులు ఇలాంటి బలహీన ప్రాంతాల ద్వారానే సులభంగా లోపలికి ప్రవేశించే అవకాశం ఉన్నందున సెక్యూరిటీ సిబ్బందిని అప్రమత్తం చేయాలని స్పష్టం చేశాయి.

సీసీటీవీ కెమెరాల నిఘా పెంచడం

అపార్ట్‌మెంట్లు అలాగే విల్లాల చుట్టూ ఉన్న ప్రతి మూలను సీసీటీవీ కెమెరాల నిఘా పరిధిలోకి తీసుకురావాలి. కెమెరాలు కవర్ చేయని బ్లైండ్ స్పాట్స్ లేదా చీకటి ప్రాంతాలలో అదనంగా కెమెరాలను ఏర్పాటు చేయాలని సూచించారు. ప్రధాన గేట్లపైనే కాకుండా వెనుక వైపు ఉన్న ప్రవేశ మార్గాలు, నాలాలు, సరస్సు తీర ప్రాంతాల వైపు కూడా ప్రత్యేక కెమెరాలను ఉంచడం ద్వారా అనుమానాస్పద కదలికలను ముందే గుర్తించవచ్చు.

రాత్రి వేళల్లో గస్తీ ముమ్మరం చేయడం

రాత్రి 11 గంటల నుంచి ఉదయం 5 గంటల వరకు నివాస ప్రాంతాలలో పెట్రోలింగ్ లేదా గస్తీని మరింత పెంచాలని ఆదేశాలు జారీ అయ్యాయి. అల్కాపూర్ టౌన్‌షిప్ అలాగే చుట్టుపక్కల కాలనీలలో ఏకాంత ప్రదేశాల వద్ద రాత్రి పూట పోలీసు గస్తీని పెంచాలని స్థానికులు కోరుతున్నారు. సెక్యూరిటీ గార్డులు రాత్రి సమయాల్లో నిద్రపోకుండా అప్రమత్తంగా ఉండి కాలింగ్ బెల్స్, గేట్ల వద్ద నిరంతరం నిఘా ఉంచేలా చర్యలు తీసుకోవాలి.

అనుమానాస్పద వ్యక్తులపై నిఘా

కాలనీలు లేదా అపార్ట్‌మెంట్లలోకి ఎవరైనా కొత్త వ్యక్తులు, అనుమానాస్పదంగా తిరుగుతున్న వారు కనిపిస్తే వెంటనే అప్రమత్తం కావాలి. డెలివరీ బాయ్స్ ముసుగులో వచ్చే వారిని కూడా క్షుణ్ణంగా తనిఖీ చేయాలి. ఎలాంటి అనుమానాస్పద కదలికలు కనిపించినా వెంటనే స్థానిక పోలీసులకు సమాచారం అందించాలని, అలాగే దానికి సంబంధించిన సీసీటీవీ ఫుటేజీని వెంటనే అధికారులతో పంచుకోవాలని సూచించారు.

గేట్లు అలాగే తలుపులు పటిష్టంగా ఉంచుకోవడం

నివాసితులు తమ ఇళ్ల ప్రధాన తలుపులు, బాల్కనీలు, కిటికీలకు పటిష్టమైన లాక్‌లను ఏర్పాటు చేసుకోవాలి. రాత్రి పడుకునే ముందు అన్ని గేట్లు సరిగ్గా లాక్ అయ్యాయో లేదో చెక్ చేసుకోవడం మంచిది. భద్రతా సిబ్బందితో పాటు నివాసితులు అందరూ ఐక్యంగా ఉంటూ స్థానిక సంఘాల ద్వారా ఎప్పటికప్పుడు భద్రతా చర్యలను సమీక్షించుకోవడం ద్వారా ఇలాంటి నేరాలను సమర్థవంతంగా అరికట్టవచ్చు.