Double Bedroom Houses: హైదరాబాద్‌లో 21 వేల డబుల్ బెడ్ రూం ఇళ్ల పంపిణీకి రంగం సిద్ధం..!

Double Bedroom Houses Distribution: గత ప్రభుత్వ హయాంలో అసంపూర్తిగా నిలిచిపోయిన డబుల్ బెడ్ రూం ఇళ్ల నిర్మాణాలను ప్రస్తుత కాంగ్రెస్ ప్రభుత్వం ఎక్కడా రాజీ పడకుండా పూర్తి చేసింది. ఈ క్రమంలో జీహెచ్‌ఎంసీ పరిధిలోని 26 ప్రాంతాల్లో సుమారు 21 వేల డబుల్ బెడ్ రూం ఇళ్ల నిర్మాణాలు పూర్తిగా ముగిశాయి. నగరంలోని నిరుపేదలకు ఈ ఇళ్లను పారదర్శకంగా అందించేందుకు హౌసింగ్ శాఖ కసరత్తు వేగవంతం చేసింది.

డబుల్ బెడ్ రూం ఇళ్ల పంపిణీ ప్రక్రియపై హౌసింగ్ శాఖ మంత్రి పొంగులేటి శ్రీనివాస్ రెడ్డి రంగారెడ్డి, సంగారెడ్డి, హైదరాబాద్ జిల్లాల కలెక్టర్లతో ప్రత్యేకంగా వీడియో కాన్ఫరెన్స్ నిర్వహించారు. ఈ నెలాఖరులోపు యుద్ధ ప్రాతిపదికన లబ్ధిదారుల ఎంపిక ప్రక్రియను పూర్తి చేయాలని అధికారులను ఆయన ఆదేశించారు. ఎటువంటి పైరవీలకు తావులేకుండా పూర్తిగా డ్రా విధానంలో లబ్ధిదారులను ఎంపిక చేయనున్నారు. అంతేకాకుండా, పారదర్శకత కోసం డ్రాలో ఎంపికైన వారి వివరాలను ఆన్‌లైన్‌లో పొందుపరచాలని స్పష్టం చేశారు.

లబ్ధిదారుల ఎంపికలో సరికొత్త నిబంధనను ప్రభుత్వం తెరపైకి తెచ్చింది. ప్రస్తుతం ఇళ్లు కేటాయించనున్న ప్రాంతాలకు 5 నుంచి 7 కిలోమీటర్ల పరిధిలో నివసిస్తున్న స్థానిక పేదలను గుర్తించి వారికే ఆ ఇళ్లను ప్రాధాన్యత ఇ务వ్వాలని సూచించారు. మరోవైపు, కొత్తగా ఇళ్లు అందుకునే కాలనీల్లో ఎలాంటి ఇబ్బందులు తలెత్తకుండా విద్యుత్, తాగునీరు వంటి అన్ని మౌలిక సదుపాయాలను వెంటనే కల్పించాలని ఆదేశించారు. ఇందుకోసం విద్యుత్, జలమండలి అధికారులతో ప్రత్యేక సమన్వయం చేసుకోవాలని స్పష్టం చేశారు.

ఇప్పటికే డబుల్ బెడ్ రూం ఇళ్లను పొంది కూడా అక్కడ నివసించకుండా ఖాళీగా ఉంచినవారితో పాటు అనర్హులైన వారిని గుర్తించి వారికి నోటీసులు జారీ చేయాలని, ఆ కేటాయింపులను రద్దు చేసి నిజమైన అర్హులకు ఆ ఇళ్లను కేటాయించాలని పొంగులేటి తేల్చిచెప్పారు.

ఇక సొంత స్థలం ఉండి ఇల్లు నిర్మించుకోవాలనుకునే నగర పేదల కోసం 'ఇందిరమ్మ ఇళ్లు' పథకం కింద మంజూరు పత్రాలను అందజేసేందుకు ప్రభుత్వం సిద్ధమైంది. నగరంలో ఇందిరమ్మ టవర్స్ నిర్మాణానికి సంబంధించి ఇప్పటికే టెండర్లు ఖరారై, లబ్ధిదారుల ఎంపిక కూడా పూర్తయిన నేపథ్యంలో త్వరలోనే పనులు ప్రారంభం కానున్నాయి. మొత్తంగా పేదల ఇళ్ల కల సాకారమవుతుండటంతో సర్వత్రా హర్షం వ్యక్తమవుతోంది.