Malkajgiri: రెండు వేర్వేరు దాడుల ఘటనలు – నలుగురు నిందితుల అరెస్ట్!

Malkajgiri: రెండు వేర్వేరు ఘటనల్లో వ్యక్తులపై కత్తి, బ్లేడుతో దాడులకు పాల్పడిన నలుగురు నిందితులను మల్కాజిగిరి పోలీసులు అరెస్టు చేసి సోమవారం రిమాండ్‌కు తరలించారు. చిన్నపాటి వివాదాలే ఘర్షణలకు దారితీయడంతో ఇద్దరు వ్యక్తులు గాయపడినట్లు పోలీసులు వెల్లడించారు.

యాదవ్‌నగర్‌లో కత్తితో దాడి

యాదవ్‌నగర్‌లోని జాగృతి కళాశాల సమీపంలో అక్టోబరు 31వ తేదీ రాత్రి సుమారు 8 గంటల సమయంలో మహేందర్ తన స్నేహితులతో కలిసి ఉండగా, అక్కడికి గాలిబ్బు పరశురామ్ అలియాస్ రంజాన్ వచ్చాడు. ఈ క్రమంలో పరశురామ్‌ను మహేందర్ ఎందుకు వచ్చావని ప్రశ్నించడంతో, తనను ఏకవచనంతో సంబోధించడంపై ఆగ్రహం వ్యక్తం చేసిన పరశురామ్ అతడితో గొడవకు దిగాడు.

అనంతరం తన వద్ద ఉన్న కత్తితో మహేందర్‌పై దాడి చేయడంతో మెడ కింద భాగంలో గాయమైంది. ఈ ఘటనపై బాధితుడి ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టి పరశురామ్‌ను నవంబరు 2న అరెస్టు చేసి రిమాండ్‌కు తరలించారు.

వాహనాల పార్కింగ్‌ విషయంలో ఘర్షణ

మౌలాలి ఉల్ఫత్‌నగర్‌లో నవంబరు 1వ తేదీ మధ్యాహ్నం సుమారు 2.50 గంటలకు మరో ఘటన చోటుచేసుకుంది. అదే ప్రాంతానికి చెందిన మహమ్మద్ అష్రఫుద్దీన్ కారులో ఇంటికి వెళ్తుండగా, తన ఇంటి ముందు ద్విచక్ర వాహనాలు ఎందుకు పార్కింగ్ చేస్తున్నారని కుటుంబ సభ్యులైన మహమ్మద్ జీషాన్ అహ్మద్, మహమ్మద్ జహీమ్ అహ్మద్, మహమ్మద్ జహీర్ అహ్మద్‌లను ప్రశ్నించాడు.

దీంతో ముగ్గురూ కలిసి అష్రఫుద్దీన్‌తో వాగ్వాదానికి దిగి, బ్లేడుతో దాడి చేయడంతో అతడి చేతికి గాయమైంది. బాధితుడి ఫిర్యాదు మేరకు కేసు నమోదు చేసిన పోలీసులు ముగ్గురు నిందితులను నవంబరు 2న అరెస్టు చేసి రిమాండ్‌కు తరలించారు.

రెండు ఘటనలకు సంబంధించి మొత్తం నలుగురు నిందితులను అరెస్టు చేసి న్యాయస్థానం ఆదేశాల మేరకు రిమాండ్‌కు తరలించినట్లు పోలీసులు తెలిపారు.