Cyberabad: ఇంటి వద్దకే ప్రభుత్వ సేవలు మీ సేవ డోర్‌స్టెప్ డెలివరీ ప్రారంభం

సైబరాబాద్: ప్రజలకు ప్రభుత్వ సేవలను మరింత సులభతరం చేస్తూ, నేరుగా వారి ఇంటి ముంగిటకే అందించే లక్ష్యంతో తెలంగాణ ప్రభుత్వం సరికొత్త అడుగు వేసింది. ఎలక్ట్రానిక్ సర్వీస్ డెలివరీ (ESD) శాఖ, సైబరాబాద్ పోలీస్, సైబరాబాద్ మున్సిపల్ కార్పొరేషన్ మరియు సొసైటీ ఫర్ సైబరాబాద్ సెక్యూరిటీ కౌన్సిల్ (SCSC) సంయుక్త ఆధ్వర్యంలో గచ్చిబౌలిలోని సైబరాబాద్ పోలీస్ కమిషనరేట్‌లో ప్రత్యేక సమన్వయ సదస్సు నిర్వహించారు. ఈ సమావేశంలో పలు రెసిడెంట్ వెల్ఫేర్ అసోసియేషన్లు (RWAs), గేటెడ్ కమ్యూనిటీల ప్రతినిధులు పెద్ద సంఖ్యలో పాల్గొన్నారు.

ఈ కార్యక్రమానికి ముఖ్య అతిథులుగా హాజరైన ఎలక్ట్రానిక్ సర్వీస్ డెలివరీ కమిషనర్ టి. రవి కిరణ్ (IFS) ‘మీ సేవ డోర్‌స్టెప్ డెలివరీ’ (DSD) సేవలను అధికారికంగా పరిచయం చేశారు. ఈ సందర్భంగా ఆయన మాట్లాడుతూ.. శిక్షణ పొందిన, ప్రభుత్వంచే ధృవీకరించబడిన ప్రతినిధులు నేరుగా పౌరుల నివాసాలకు వచ్చి అవసరమైన ప్రభుత్వ సేవలను అందిస్తారని తెలిపారు.

దీనివల్ల ప్రభుత్వ కార్యాలయాల చుట్టూ తిరిగే శ్రమ తగ్గుతుందని, ముఖ్యంగా వృద్ధులు, దివ్యాంగులు మరియు నిత్యం విధుల్లో ఉండే ఉద్యోగులకు ఈ సేవ ఎంతో వరంగా మారుతుందని పేర్కొన్నారు. ఈ సేవలను పొందాలనుకునే వారు *1100* నంబర్‌కు కాల్ చేసి *1* నొక్కడం ద్వారా గానీ, లేదా *[https://dsd.meeseva.telangana.gov.in](https://dsd.meeseva.telangana.gov.in)* వెబ్‌సైట్ ద్వారా గానీ దరఖాస్తు చేసుకోవచ్చని సూచించారు.

సదస్సులో భాగంగా ప్రయాణికుల సౌకర్యార్థం రూపొందించిన ‘మీటికెట్’ (MeTicket) యాప్‌ను అధికారులు ఆవిష్కరించారు. ఈ యాప్ ద్వారా సిటీ బస్సులు, మెట్రో రైలు టికెట్ల బుకింగ్‌తో పాటు బస్ పాస్‌ల దరఖాస్తు, రెన్యువల్ ప్రక్రియను సులభంగా పూర్తి చేయవచ్చు. అంతేకాకుండా జూ పార్కులు, ఇతర పర్యాటక పార్కుల ఎంట్రీ టికెట్లను కూడా దీని ద్వారా పొందవచ్చు. మరోవైపు, సైబరాబాద్ ప్రాంతంలో పర్యావరణహిత, సులభతర రవాణా సదుపాయాల అవసరాన్ని వివరిస్తూ నవేద్, శ్రీనివాస్ అలవిల్లి ‘సైబరాబాద్ మూవ్స్’ కార్యక్రమంపై పవర్ పాయింట్ ప్రజెంటేషన్ ఇచ్చారు.

ఈ కార్యక్రమంలో సైబరాబాద్ పోలీస్ కమిషనర్ డాక్టర్ ఎం. రమేష్ (IPS), సైబరాబాద్ మున్సిపల్ కార్పొరేషన్ కమిషనర్ డాక్టర్ జి. శ్రీజన (IAS) పాల్గొన్నారు. ఈ డిజిటల్ సేవలపై తమ కమ్యూనిటీలలోని నివాసితులకు వాట్సాప్ గ్రూపులు, పోస్టర్లు మరియు ప్రత్యేక సమావేశాల ద్వారా విస్తృతంగా అవగాహన కల్పించాలని RWA ప్రతినిధులకు అధికారులు సూచించారు. పౌరుల సౌకర్యం, భద్రత మరియు మెరుగైన జీవన ప్రమాణాల కోసం ప్రభుత్వ శాఖలు, పోలీస్ యంత్రాంగం, నివాస సముదాయాలతో కలిసి SCSC నిరంతరం పనిచేస్తుందని నిర్వాహకులు స్పష్టం చేశారు.