Malkajgiri: మల్కాజిగిరి పాఠశాలలో ఘనంగా భగత్ సింగ్ జయంతి, అవగాహనా సదస్సు!

Malkajgiri: భగత్ సింగ్ కేవలం స్వాతంత్ర్య సమరయోధుడు మాత్రమే కాదని, సామాజిక సమానత్వం, సంపూర్ణ స్వాతంత్ర్యం, సోషలిజం కోసం ఆలోచించిన గొప్ప విప్లవకారుడని జిల్లా జనరల్ సెక్రటరీ కార్తీక్ అన్నారు.

మల్కాజిగిరి మండలంలోని జెడ్పీహెచ్‌ఎస్ పాఠశాలలో భగత్ సింగ్ జీవితం, ఆయన సామాజిక దృక్పథం, సోషలిజంపై విశ్వాసం, సంపూర్ణ స్వాతంత్ర్య భావనపై విద్యార్థులకు అవగాహనా సదస్సు నిర్వహించారు. ముఖ్య వక్తగా హాజరైన కార్తీక్ మాట్లాడుతూ పేదరికం, దోపిడీ, కుల, మత వివక్ష, అసమానతల నుంచి ప్రజలకు విముక్తి లభించాలన్నదే భగత్ సింగ్ ఆకాంక్ష అని వివరించారు.

జలియన్‌వాలా బాగ్ ఘటన భగత్ సింగ్‌పై తీవ్ర ప్రభావం చూపిందని, చిన్న వయసులోనే దేశ పరిస్థితులపై లోతుగా ఆలోచించి స్వాతంత్ర్య పోరాటంలోకి వచ్చారని తెలిపారు. విస్తృతంగా పుస్తకాలు చదివి సామాజిక, రాజకీయ అంశాలపై అవగాహన పెంచుకున్నారని పేర్కొన్నారు. 1929లో బటుకేశ్వర్ దత్‌తో కలిసి సెంట్రల్ లెజిస్లేటివ్ అసెంబ్లీలో నిరసన చేపట్టి, అనంతరం అరెస్టుకు లొంగిపోయి కోర్టు, జైలును కూడా తన ఆలోచనలను ప్రజల్లోకి తీసుకెళ్లే వేదికలుగా ఉపయోగించుకున్నారని తెలిపారు.

కేవలం 23 ఏళ్ల వయసులోనే ప్రాణత్యాగం చేసిన భగత్ సింగ్ నేటి యువతకు ధైర్యం, పఠనం, క్రమశిక్షణ, ప్రశ్నించే తత్వం, సామాజిక బాధ్యతకు ప్రతీకగా నిలిచారని అన్నారు. విద్యార్థులు తమ యువశక్తిని విద్య, విజ్ఞానం, క్రీడలు, సామాజిక సేవ, దేశ నిర్మాణానికి వినియోగించాలని పిలుపునిచ్చారు. మాదకద్రవ్యాలు, ఇతర వ్యసనాలకు దూరంగా ఉండాలని సూచిస్తూ “డ్రగ్స్‌కు నో చెప్పండి.. జీవితానికి, విద్యకు, ఆరోగ్యానికి, మంచి భవిష్యత్తుకు అవును చెప్పండి” అని సందేశమిచ్చారు.

భగత్ సింగ్‌ను స్మరించుకోవడం అంటే కేవలం చిత్రపటానికి పూలమాల వేయడం కాదని, ఆయనలోని పఠనాసక్తి, ఆలోచనా శక్తి, ధైర్యం, సామాజిక న్యాయం పట్ల నిబద్ధతను జీవితంలో ఆచరించడమే నిజమైన నివాళి అని కార్తీక్ పేర్కొన్నారు.

కార్యక్రమంలో మల్కాజిగిరి మండల కార్యదర్శి యశ్వంత్, జిల్లా ఉపాధ్యక్షులు అరుణ్, భగత్, జాయింట్ సెక్రటరీ శ్యామ్ తదితరులు పాల్గొన్నారు. “భగత్ సింగ్ అమర్ రహే.. ఇంక్విలాబ్ జిందాబాద్.. డ్రగ్స్‌కు నో, జీవితానికి యెస్” అనే నినాదాలతో కార్యక్రమం ముగిసింది.