Shabad: జాతీయ ఉత్తమ సర్పంచ్ అవార్డుకు సందీప్ గౌడ్ ఎంపిక

షాబాద్: రంగారెడ్డి జిల్లా షాబాద్ మండలంలోని అప్పరెడ్డిగూడ గ్రామ సర్పంచ్ పోలేపల్లి సందీప్ గౌడ్‌కు అరుదైన గౌరవం దక్కింది. బహుజన సాహిత్య అకాడమీ ఆధ్వర్యంలో 2026 సంవత్సరానికి ప్రకటించిన జాతీయ ఉత్తమ సర్పంచ్ అవార్డుకు ఆయన ఎంపికయ్యారు.

యువ సర్పంచ్‌గా గ్రామ బాధ్యతలు చేపట్టిన సందీప్ గౌడ్ ప్రజలకు అందుబాటులో ఉంటూ గ్రామ అభివృద్ధి, సామాజిక సేవా కార్యక్రమాల్లో చురుకుగా పాల్గొంటున్నారు. ప్రజల సమస్యలను తెలుసుకుంటూ వాటి పరిష్కారానికి కృషి చేయడం, గ్రామంలో మౌలిక సదుపాయాల కల్పన, పారిశుద్ధ్య నిర్వహణ, తాగునీటి సమస్యల పరిష్కారం, ప్రభుత్వ సంక్షేమ పథకాలను అర్హులైన వారికి అందేలా చూడటం వంటి అంశాల్లో ఆయన చూపుతున్న చొరవకు ఈ గుర్తింపు లభించింది.

అలాగే యువతను అభివృద్ధి కార్యక్రమాల్లో భాగస్వాములను చేస్తూ, గ్రామ ప్రజలతో సమన్వయం చేసుకుంటూ ముందుకు సాగడం ఆయన నాయకత్వానికి ప్రత్యేకతగా నిలుస్తోంది. ఒక యువ సర్పంచ్‌కు జాతీయ స్థాయిలో గుర్తింపు లభించడం పట్ల అప్పరెడ్డిగూడ గ్రామ ప్రజలు హర్షం వ్యక్తం చేస్తున్నారు.

ఈ సందర్భంగా గ్రామస్తులు, ప్రజాప్రతినిధులు, నాయకులు, యువత, అభిమానులు పోలేపల్లి సందీప్ గౌడ్‌కు అభినందనలు తెలియజేస్తూ భవిష్యత్తులో మరిన్ని ఉన్నత స్థాయి అవార్డులు అందుకోవాలని ఆకాంక్షించారు.