Guntur: బీసీల సంక్షేమానికి కూటమి ప్రభుత్వం కట్టుబడి ఉంది: పెమ్మసాని!

Guntur: కష్టాన్ని నమ్ముకొని, తమ కులవృత్తులను కళలుగా మార్చి, సమాజానికి సేవ చేస్తూ తెలుగుదేశం పార్టీకి వెన్నెముకగా నిలిచిన బీసీ సోదర సోదరీమణులందరికీ కేంద్ర సహాయ మంత్రి డా. పెమ్మసాని చంద్రశేఖర్ హృదయపూర్వక ధన్యవాదాలు తెలిపారు. బీసీ సంక్షేమ సంఘం ఆధ్వర్యంలో బీసీ నాయకులు కేశన శంకరరావు, క్రాంతి కుమార్ తదితరులు కూటమి ప్రభుత్వానికి మద్దతు తెలపడం సంతోషకరమన్నారు.

తెలుగుదేశం పార్టీ ఒక సామాన్యుడిని నాయకుడిగా తీర్చిదిద్దిన పార్టీ అని, బీసీలకు రాజకీయ ప్రాతినిధ్యం కల్పించి, వారిని శక్తిమంతమైన వర్గంగా నిలబెట్టిందని పేర్కొన్నారు. బీసీలు పార్టీకి అందించిన సహకారాన్ని ముఖ్యమంత్రి నారా చంద్రబాబు నాయుడు ఎప్పటికీ మరచిపోరని, వారికి మరింత మేలు చేసే మార్గాలపై నిరంతరం ఆలోచిస్తుంటారని తెలిపారు.

బీసీ వర్గాల సంక్షేమానికి ప్రత్యేక చర్యలు

కూటమి ప్రభుత్వం అధికారంలోకి వచ్చిన తర్వాత వివిధ వర్గాల సంక్షేమానికి చర్యలు చేపట్టిందని డా. పెమ్మసాని వివరించారు. వడ్డెర సోదరులకు క్వారీల్లో 33 శాతం భాగస్వామ్యం కల్పించడం, మత్స్యకారులకు సహాయ నిధి ద్వారా అండగా నిలవడం, నాయీ బ్రాహ్మణులకు 200 యూనిట్ల వరకు ఉచిత విద్యుత్ అందించడం, చేనేత కార్మికులకు వారి అర్హతల మేరకు 200 నుంచి 500 యూనిట్ల వరకు విద్యుత్ రాయితీ కల్పించడం వంటి కార్యక్రమాలను ప్రస్తావించారు.

గుంటూరు పార్లమెంట్ పరిధిలో రహదారులు, డ్రైనేజీలు, బీసీ, ఎస్సీ, ఎస్టీ కాలనీల్లో మౌలిక సదుపాయాల అభివృద్ధికి ప్రాధాన్యం ఇస్తున్నామని తెలిపారు. అభివృద్ధి పనులను ప్రణాళికాబద్ధంగా ముందుకు తీసుకెళ్తున్నామని పేర్కొన్నారు.

38 సంక్షేమ హాస్టళ్ల ఆధునీకరణ

గుంటూరు పార్లమెంట్ పరిధిలోని 38 బీసీ, ఎస్సీ, ఎస్టీ సంక్షేమ హాస్టళ్లను ఆధునిక సదుపాయాలతో అభివృద్ధి చేయనున్నట్లు డా. పెమ్మసాని ప్రకటించారు. తల్లిదండ్రులు ఉదయం నుంచి సాయంత్రం వరకు పనులకు వెళ్లినా, పిల్లలకు నాణ్యమైన వసతి, అవసరమైన సౌకర్యాలు అందేలా హాస్టళ్లను తీర్చిదిద్దుతామని తెలిపారు. పేద విద్యార్థులు చదువులో ముందుకు సాగేందుకు అవసరమైన వాతావరణాన్ని కల్పించడం తమ బాధ్యతని స్పష్టం చేశారు.

రూ.20 కోట్లతో అంతర్జాతీయ ప్రమాణాల లైబ్రరీ

గుంటూరు నగరం నడిబొడ్డున రూ.20 కోట్లతో అంతర్జాతీయ ప్రమాణాలకు అనుగుణంగా ఒక ఆధునిక లైబ్రరీని నిర్మించనున్నట్లు తెలిపారు. పేద విద్యార్థులకు చదువుకునేందుకు మెరుగైన వసతులు కల్పించడం, పోటీ పరీక్షలకు సిద్ధమయ్యే యువతకు ఉపయోగపడే వాతావరణాన్ని అందించడం ఈ ప్రాజెక్టు లక్ష్యమన్నారు.

GGHలో మెరుగైన వైద్య సదుపాయాలు

గుంటూరు ప్రభుత్వ జనరల్ ఆసుపత్రిలో పేదలకు మెరుగైన వైద్య సేవలు అందించేందుకు పలు అభివృద్ధి కార్యక్రమాలు చేపడుతున్నామని డా. పెమ్మసాని తెలిపారు. క్యాన్సర్ చికిత్సకు అవసరమైన సదుపాయాలు, లెవల్‌-1 ట్రామా సెంటర్, రూ.20 కోట్లతో పెట్‌ స్కాన్‌ సదుపాయం, సీఎస్‌ఆర్‌ నిధులతో రూ.30 కోట్ల విలువైన రేడియోథెరపీ సదుపాయాలు, కొత్త క్యాన్సర్ బ్లాక్‌, ఆర్థోపెడిక్‌ బ్లాక్‌ నిర్మాణ పనులను ప్రస్తావించారు.

రోగులు, వారి సహాయకులు ఉండేందుకు మెరుగైన వసతి కల్పించడంతో పాటు, ఆసుపత్రిలో ఆహార తయారీకి అవసరమైన సదుపాయాలను కూడా మెరుగుపరుస్తున్నామని చెప్పారు. తాగునీరు, రహదారులు, ఇతర మౌలిక సదుపాయాల అభివృద్ధికీ ప్రాధాన్యం ఇస్తున్నట్లు తెలిపారు.

వచ్చే మూడేళ్లలో 30 వేల మందికి నైపుణ్య శిక్షణ

చదువుకున్నప్పటికీ ఉద్యోగాలు లభించని యువతకు ఉపాధి అవకాశాలు కల్పించేందుకు గుంటూరు పార్లమెంట్ పరిధిలో ప్రత్యేక నైపుణ్యాభివృద్ధి కార్యక్రమాన్ని అమలు చేస్తున్నామని డా. పెమ్మసాని వెల్లడించారు.

ప్రస్తుతం 9 వేల మందికి శిక్షణ అందించే కార్యక్రమం కొనసాగుతోందని, మహిళలు, బీసీ, ఎస్సీ, ఎస్టీ వర్గాలకు చెందిన యువతకు ఇందులో ప్రాధాన్యం ఇస్తున్నామని తెలిపారు. మూడు నెలలపాటు శిక్షణతో పాటు వసతి సదుపాయాలు కల్పించి, యువతను ఉద్యోగాలకు అవసరమైన నైపుణ్యాలతో తీర్చిదిద్దడమే ఈ కార్యక్రమం ఉద్దేశమన్నారు.

స్థానికంగా అందుబాటులో ఉన్న ఇంజినీరింగ్ కళాశాలలు, ఖాళీ భవనాలను వినియోగించుకుంటూ శిక్షణ కేంద్రాలను ఏర్పాటు చేస్తున్నామని చెప్పారు. వచ్చే మూడేళ్లలో మొత్తం 30 వేల మందికి నైపుణ్య శిక్షణ అందించి, ఉద్యోగాలు పొందేలా లేదా సొంతంగా వ్యాపారాలు ప్రారంభించేలా సహకరిస్తామని హామీ ఇచ్చారు.

కూటమి ఐక్యతతో రాష్ట్రాభివృద్ధి

కేంద్రంలో ప్రధానమంత్రి నరేంద్ర మోదీ సహకారం, రాష్ట్రంలో ముఖ్యమంత్రి నారా చంద్రబాబు నాయుడు నాయకత్వం, ఉప ముఖ్యమంత్రి పవన్ కల్యాణ్ మద్దతుతో కూటమి ప్రభుత్వం అభివృద్ధి, సంక్షేమ కార్యక్రమాలను ముందుకు తీసుకెళ్తోందని డా. పెమ్మసాని పేర్కొన్నారు.

రాష్ట్రం మరింత అభివృద్ధి చెందాలంటే ప్రజల సహకారం, కూటమి ఐక్యత కొనసాగాలని కోరారు. బీసీ సంఘాల నాయకులు, కార్యకర్తలు, కూటమి ప్రభుత్వానికి మద్దతు తెలుపుతున్న ప్రతి ఒక్కరికీ కృతజ్ఞతలు తెలిపారు. గుంటూరు ప్రాంతంలో పేదలకు సాధ్యమైనంత ఎక్కువగా, నీతి నిజాయితీలతో సహాయం అందించేందుకు తమ శక్తి మేరకు కృషి చేస్తామని డా. పెమ్మసాని చంద్రశేఖర్ స్పష్టం చేశారు.