Guntur: పారదర్శకంగా ఓట్ల లెక్కింపు కౌంటింగ్ సిబ్బందికి కమిషనర్ హెచ్చరిక

Guntur: గుంటూరు నగరపాలక సంస్థ ఎన్నికల ఓట్ల లెక్కింపు నవంబర్ 3న జరుగుతుందని, లెక్కింపు ప్రక్రియను ఎటువంటి పొరపాట్లకు తావులేకుండా, అత్యంత పారదర్శకంగా నిర్వహించేందుకు కౌంటింగ్ సిబ్బంది రాష్ట్ర ఎన్నికల సంఘం సూచించిన నిబంధనలను క్షుణ్ణంగా అధ్యయనం చేసి, అవగాహన పెంచుకోవాలని గుంటూరు నగర కమిషనర్ మరియు అడిషనల్ ఎలక్షన్ అథారిటీ కె.మయూర్ అశోక్ ఆదేశించారు.

స్థానిక శ్రీవెంకటేశ్వర విజ్ఞాన మందిరంలో కౌంటింగ్ సూపర్‌వైజర్లు, కౌంటింగ్ అసిస్టెంట్లు మరియు సంబంధిత అధికారులకు ఏర్పాటు చేసిన ప్రత్యేక శిక్షణ కార్యక్రమం జరిగింది. ఈ సందర్భంగా నగర కమిషనర్ మాట్లాడుతూ, ప్రజాస్వామ్య వ్యవస్థలో ఎన్నికల ప్రక్రియ మరియు ఓట్ల లెక్కింపు అనేది కీలకమైన ఘట్టమని పేర్కొన్నారు.

కౌంటింగ్ కేంద్రంలో విధులు నిర్వహించే ప్రతి ఒక్క అధికారి, సిబ్బంది పూర్తి బాధ్యతాయుతంగా, నిబద్ధతతో, క్రమశిక్షణతో వ్యవహరించాలని సూచించారు. ఎన్నికల సంఘం జారీ చేసిన సమగ్ర మార్గదర్శకాలు, నిబంధనలపై సిబ్బందికి ఎలాంటి సందేహాలు ఉండకూడదని, చెల్లుబాటయ్యే ఓట్లు మరియు చెల్లుబాటు కాని ఓట్ల లెక్కింపు విషయంలో పూర్తి స్పష్టతతో పనిచేయాలని, ఎటువంటి అనుమానం ఉన్నా తక్షణం రిటర్నింగ్ అధికారి దృష్టికి తీసుకురావాలని స్పష్టం చేశారు.

కౌంటింగ్ హాల్‌లో పారదర్శకతకు పెద్దపీట వేయాలని, కౌంటింగ్ ఏజెంట్లకు సైతం లెక్కింపు స్పష్టంగా కనిపించే విధంగా విధులు నిర్వహించాలన్నారు. లెక్కింపు సమయంలో కౌంటింగ్ ఏజెంట్లతో ఎటువంటి అనవసర వివాదాలకు తావివ్వకూడదని, స్థానికంగా ఏవైనా సందేహాలు లేదా సమస్యలు తలెత్తితే వెంటనే సంబంధిత రిటర్నింగ్ ఆఫీసర్ దృష్టికి తీసుకెళ్లి పరిష్కరించుకోవాలని సూచించారు.

కౌంటింగ్ సిబ్బందికి సమయపాలన అత్యంత ముఖ్యమని, కౌంటింగ్ రోజున నిర్ణీత సమయానికంటే ముందే కేటాయించిన కేంద్రాలకు చేరుకోవాలన్నారు. కౌంటింగ్ కేంద్రం పరిసరాల్లో భద్రతను పటిష్టం చేస్తున్నామని, నిబంధనల ప్రకారం కౌంటింగ్ హాల్ లోపలికి మొబైల్ ఫోన్లు లేదా ఎలాంటి ఎలక్ట్రానిక్ పరికరాలను అనుమతించబోమని స్పష్టం చేశారు.

ప్రతి రౌండ్ ముగిసిన వెంటనే లెక్కించిన ఓట్ల వివరాలను నిర్ణీత ఫారమ్‌లలో ఎటువంటి తప్పులు లేకుండా నమోదు చేసి, సంబంధిత అధికారులకు సమర్పించాలని సూచించారు. కార్యక్రమంలో డిప్యూటీ కమిషనర్ జి.సాంబశివరావు, ఎన్నికల కౌంటింగ్ సూపర్వైజర్లు పాల్గొన్నారు.