Chirala: అంగన్‌వాడీల సేవలు అభినందనీయం - ఎమ్మెల్యే మద్దులూరి మాలకొండయ్య
Chirala: చీరాల మండలం ఈపురుపాలెం అంగన్వాడీ కేంద్రాన్ని ఎమ్మెల్యే మద్దులూరి మాలకొండయ్య సందర్శించి, సిబ్బందిని సత్కరించారు. చిన్నారుల పోషణే ధ్యేయం.
Chirala: అంగన్‌వాడీల సేవలు అభినందనీయం - ఎమ్మెల్యే మద్దులూరి మాలకొండయ్య
చీరాల: చిన్నారుల ఆరోగ్యం, పోషణ, శారీరక–మానసిక ఎదుగుదలతో పాటు గర్భిణీలు, బాలింతలకు అంగన్వాడీ కేంద్రాల ద్వారా అందిస్తున్న సేవలు ఎంతో కీలకమైనవని చీరాల శాసనసభ్యులు మద్దులూరి మాలకొండయ్య పేర్కొన్నారు. సమాజ ఆరోగ్యం కోసం అంకితభావంతో పనిచేస్తున్న అంగన్వాడీ టీచర్లు, ఆశా వర్కర్ల సేవలను అభినందించారు.
ప్రధానమంత్రి నరేంద్ర మోదీ 25 ఏళ్ల ప్రజా సేవా ప్రస్థానాన్ని పురస్కరించుకుని నిర్వహిస్తున్న సేవా సంకల్ప అభియాన్లో భాగంగా అంగన్వాడీ సిబ్బందిని గౌరవించే ఉద్దేశంతో చేపట్టిన అంగన్వాడీ ఉత్సవం కార్యక్రమంలో ఎమ్మెల్యే మద్దులూరి మాలకొండయ్య పాల్గొన్నారు. ఈ సందర్భంగా చీరాల మండలం ఈపురుపాలెం గ్రామంలోని అంగన్వాడీ కేంద్రాన్ని ఆయన సందర్శించారు.
అంగన్వాడీ కేంద్రంలో చిన్నారులకు అందుతున్న పౌష్టికాహారం, విద్యా కార్యక్రమాలు, మౌలిక వసతులను ఎమ్మెల్యే పరిశీలించారు. చిన్నారులతో కొద్దిసేపు ముచ్చటించి వారి విద్య, ఆరోగ్యం, పోషణకు సంబంధించిన వివరాలను తెలుసుకున్నారు. కేంద్రంలో అందుతున్న సేవలపై సిబ్బందిని అడిగి తెలుసుకున్నారు.
ఈ సందర్భంగా ఎమ్మెల్యే మాట్లాడుతూ చిన్నారుల భవిష్యత్తుకు పునాది బాల్య దశలోనే పడుతుందని, అందువల్ల పిల్లలకు పౌష్టికాహారం, ఆరోగ్య సంరక్షణతో పాటు ప్రాథమిక విద్యను అందించడం అత్యంత ముఖ్యమన్నారు. చిన్నారుల ఆరోగ్యం, పోషకాహారం, ప్రాథమిక విద్యకు కూటమి ప్రభుత్వం అధిక ప్రాధాన్యత ఇస్తోందని తెలిపారు. అంగన్వాడీ కేంద్రాల ద్వారా గర్భిణీలు, బాలింతలు, చిన్నారులకు మరింత మెరుగైన సేవలు అందేలా ప్రభుత్వం చర్యలు తీసుకుంటోందని మాలకొండయ్య పేర్కొన్నారు. గ్రామీణ ప్రాంతాల్లో సంక్షేమ పథకాలు అర్హులైన ప్రతి ఒక్కరికీ సమర్థవంతంగా చేరేలా ప్రత్యేక దృష్టి సారిస్తున్నామని తెలిపారు.
అంగన్వాడీ, ఆశా వర్కర్లకు ఘన సత్కారం
గర్భిణీలు, బాలింతలు, చిన్నారుల ఆరోగ్యం, పోషణ కోసం నిరంతరం సేవలందిస్తున్న అంగన్వాడీ టీచర్లు, ఆశా వర్కర్లను ఈ సందర్భంగా ఎమ్మెల్యే ఘనంగా సత్కరించారు. సమాజ ఆరోగ్యం కోసం నిస్వార్థంగా సేవలందిస్తున్న వారి సేవలను కొనియాడారు.
అంగన్వాడీ సిబ్బంది గ్రామీణ ప్రాంతాల్లో ఇంటింటికీ చేరువగా పనిచేస్తూ చిన్నారుల ఆరోగ్యం, పోషణపై తల్లిదండ్రులకు అవగాహన కల్పించడంతో పాటు గర్భిణీలు, బాలింతలకు అవసరమైన సేవలు అందిస్తున్నారని ఎమ్మెల్యే తెలిపారు. వారి సేవలు సమాజ ఆరోగ్య పరిరక్షణలో ఎంతో విలువైనవని పేర్కొన్నారు.
ప్రజా సంక్షేమమే కూటమి ప్రభుత్వ ప్రధాన లక్ష్యమని, గ్రామీణ ప్రాంతాల్లో సంక్షేమ పథకాల అమలును మరింత బలోపేతం చేయడంతో పాటు ప్రజలకు అవసరమైన సేవలను అందుబాటులోకి తీసుకురావడానికి ప్రభుత్వం కృషి చేస్తోందని ఎమ్మెల్యే మాలకొండయ్య అన్నారు. సేవా భావంతో పనిచేస్తున్న ప్రతి అంగన్వాడీ టీచర్, ఆశా వర్కర్‌కు హృదయపూర్వక అభినందనలు తెలిపారు. సమాజానికి సేవలందిస్తున్న వారిని గౌరవించడం ప్రతి ఒక్కరి బాధ్యత అని అన్నారు. ఈ కార్యక్రమంలో పలువురు ఆశా కార్యకర్తలు అంగన్వాడీ టీచర్లు సిబ్బంది కూటమి నాయకులు స్థానిక ప్రజాప్రతినిధులు తదితరులు పాల్గొన్నారు.
