Eluru: ప్రజాస్వామ్యాన్ని ఖూనీ చేస్తున్న కూటమి నాయకులు!

Eluru: ప్రశాంతతకు నిలయంగా పేరొందిన పశ్చిమగోదావరి జిల్లాలో కూటమి నాయకులు రాజకీయ స్వార్థం కోసం ప్రజాస్వామ్యాన్ని ఖూనీ చేస్తున్నారని వైసీపీ ఏలూరు నియోజకవర్గ కన్వీనర్ మామిళ్ళపల్లి జయప్రకాష్ ఆరోపించారు. ఏలూరులోని పార్టీ కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ ఎన్నికల సమయంలో ప్రజలను భయభ్రాంతులకు గురిచేస్తూ, పోలింగ్ బూత్‌లను కబ్జా చేసేందుకు ప్రయత్నించడం ద్వారా ప్రజాస్వామ్య వ్యవస్థను అపహాస్యం చేస్తున్నారని విమర్శించారు.

కూటమి నాయకులు అధికారాన్ని అడ్డుపెట్టుకుని రాజకీయంగా ఆధిపత్యం చెలాయించేందుకు ప్రయత్నిస్తున్నారని జయప్రకాష్ ఆరోపించారు. ప్రజలు తమ ఓటు హక్కును స్వేచ్ఛగా వినియోగించుకునే వాతావరణం కల్పించాల్సిన బాధ్యత అధికార యంత్రాంగంపై ఉందన్నారు. అయితే వైసీపీ మహిళా కార్యకర్తలపై దాడులు జరిగినప్పటికీ పోలీసులు తగిన విధంగా స్పందించకపోవడం ఆందోళన కలిగిస్తోందని పేర్కొన్నారు.ఎన్నికల ప్రక్రియ ప్రశాంతంగా, పారదర్శకంగా జరిగేలా పోలీసులు చర్యలు తీసుకోవాలని కోరారు. ప్రజలను భయపెట్టి రాజకీయంగా లబ్ధి పొందాలనే ప్రయత్నాలు ఫలించవని అన్నారు.

ప్రజలు వైసీపీకి ఆదరణ చూపిస్తున్నారని, వారి మద్దతుతో రాబోయే ఎన్నికల్లో ఏలూరు కార్పొరేషన్‌పై వైసీపీ జెండా ఎగురవేస్తామని జయప్రకాష్ ఆశాభావం వ్యక్తం చేశారు.ఈ సమావేశంలో మేయర్ అభ్యర్ధి గంటా మోహన్ రావు, నగర పార్టీ అధ్యక్షుడు గూడిదే శ్రీనివాస్, జిజ్జవరపు విజయకుమారి తదితరులు పాల్గొన్నారు.