SLAT 2027 Registration: లా చదవాలనుకునే విద్యార్థులకు గుడ్ న్యూస్.. దరఖాస్తులు షురూ

SLAT 2027: లా చదవాలనుకునే విద్యార్థులకు గుడ్ న్యూస్. సింబయాసిస్ లా స్కూల్స్‌లో అండర్ గ్రాడ్యుయేట్ లా ప్రోగ్రామ్‌లలో ప్రవేశాల కోసం నిర్వహించే సింబయాసిస్ లా అడ్మిషన్ టెస్ట్ (SLAT) 2027 రిజిస్ట్రేషన్లు ప్రారంభమయ్యాయి. పూణె, నోయిడా, హైదరాబాద్, నాగ్‌పూర్‌లోని సింబయాసిస్ లా స్కూల్స్‌లో ప్రవేశం పొందాలనుకునే విద్యార్థులు ఈ పరీక్షకు దరఖాస్తు చేసుకోవచ్చు.

డిసెంబర్‌లో రెండు సార్లు పరీక్ష

SLAT 2027 కంప్యూటర్ ఆధారిత పరీక్షగా దేశవ్యాప్తంగా 62 కేంద్రాల్లో నిర్వహించనున్నారు. డిసెంబర్ 19, డిసెంబర్ 26, 2026 తేదీల్లో పరీక్ష జరగనుంది.

అభ్యర్థులకు పరీక్షను రెండుసార్లు రాసే అవకాశం ఉంటుంది. రెండు పరీక్షల్లో వచ్చిన స్కోర్లలో అత్యధిక స్కోరును అడ్మిషన్ ప్రక్రియలో పరిగణనలోకి తీసుకుంటారు. పరీక్షకు రిజిస్ట్రేషన్, ఫీజు చెల్లింపునకు డిసెంబర్ 4, 2026 చివరి తేదీ.

60 నిమిషాల్లో 60 ప్రశ్నలు

SLAT 2027లో మొత్తం 60 ప్రశ్నలు ఉంటాయి. వీటికి సమాధానాలు ఇవ్వడానికి 60 నిమిషాల సమయం ఉంటుంది. ప్రశ్నలు ప్రధానంగా ఈ విభాగాల నుంచి ఉంటాయి:

⇒ లీగల్ రీజనింగ్

⇒ లాజికల్ ఆప్టిట్యూడ్

⇒ అనలిటికల్ స్కిల్స్

⇒ రీడింగ్ కాంప్రహెన్షన్

⇒ జనరల్ నాలెడ్జ్

ఈ పరీక్షలో నెగెటివ్ మార్కింగ్ ఉండదు.

SLAT స్కోర్ ఆధారంగా B.A. LL.B. (Hons.), B.B.A. LL.B. (Hons.), B.Com. LL.B. వంటి అండర్ గ్రాడ్యుయేట్ లా ప్రోగ్రామ్‌లలో ప్రవేశాలు కల్పిస్తారు.

అర్హత ఏంటి?

SLATకు దరఖాస్తు చేసుకునే అభ్యర్థులు గుర్తింపు పొందిన బోర్డు నుంచి 12వ తరగతి లేదా దానికి సమానమైన పరీక్షలో ఉత్తీర్ణులై ఉండాలి.

జనరల్ కేటగిరీ అభ్యర్థులకు కనీసం 45 శాతం మార్కులు ఉండాలి. ఎస్సీ, ఎస్టీ కేటగిరీలకు చెందిన విద్యార్థులకు కనీస అర్హత 40 శాతం మార్కులు.

దరఖాస్తు ఫీజు ఎంత?

ప్రతి SLAT పరీక్షకు రిజిస్ట్రేషన్ ఫీజు రూ.2,550గా ఉంది. దీనికి వర్తించే ప్రభుత్వ పన్నులు అదనం. అలాగే ఇన్‌స్టిట్యూట్ ఎంపిక కోసం ఒక్కో ప్రోగ్రామ్‌కు అదనంగా రూ.1,000 చెల్లించాలి.

రిజిస్ట్రేషన్ సమయంలో అభ్యర్థులు తమ వ్యక్తిగత, విద్యా వివరాలను నమోదు చేయాలి. అనంతరం రిజిస్టర్డ్ ఈమెయిల్ లేదా మొబైల్ నంబర్‌కు వచ్చే OTP ద్వారా వివరాలను ధ్రువీకరించి, ఫీజు చెల్లింపుతో దరఖాస్తు ప్రక్రియను పూర్తి చేయాలి.

నాలుగు క్యాంపస్‌లు.. విభిన్న అవకాశాలు

సింబయాసిస్‌కు పూణె, నోయిడా, హైదరాబాద్, నాగ్‌పూర్‌లో నాలుగు లా స్కూల్స్ ఉన్నాయి. వీటిలో విద్యార్థులకు విభిన్న విద్యా వాతావరణాల్లో అండర్ గ్రాడ్యుయేట్ లా ప్రోగ్రామ్‌లను అందిస్తున్నారు.

సింబయాసిస్ లా స్కూల్, పూణె NIRF 2025 లా కేటగిరీలో ఏడో స్థానంలో నిలిచింది. నోయిడా, హైదరాబాద్, నాగ్‌పూర్ క్యాంపస్‌లు కూడా ఆయా ప్రాంతాల అవసరాలకు అనుగుణంగా లా విద్యను అందిస్తున్నాయి.

అభ్యర్థులు రిజిస్ట్రేషన్ సమయంలో ఇచ్చే వ్యక్తిగత, విద్యా వివరాలు తమ అధికారిక రికార్డులతో సరిగ్గా సరిపోతున్నాయో లేదో ఒకసారి తప్పకుండా చెక్ చేసుకోవాలి.