Tirumala: తిరుమలలో వైభవంగా సర్వభూపాల వాహనసేవ!

Tirumala: తిరుమల శ్రీవారి నవరాత్రి బ్రహ్మోత్సవాల్లో భాగంగా నాలుగో రోజు గురువారం రాత్రి శ్రీ మలయప్ప స్వామివారు రుక్మిణీ సత్యభామ సమేత వేణుగోపాలస్వామి అలంకారంలో సర్వభూపాల వాహనంపై భక్తులకు అభయమిచ్చారు. రాత్రి నాలుగు మాడ వీధుల్లో ఈ వాహనసేవ నేత్రపర్వంగా సాగింది. వాహనసేవకు ముందు గజరాజులు నడుస్తుండగా, భక్తబృందాల చెక్కభజనలు, జీయ్యంగార్ల దివ్య గోష్టి, మంగళవాయిద్యాల నడుమ ఊరేగింపు అంగరంగ వైభవంగా జరిగింది. అడుగడుగునా భక్తులు కర్పూర హారతులు సమర్పిస్తూ, గోవింద నామస్మరణతో స్వామివారిని దర్శించుకుని తరించారు. ఓ వైపు చిరుజల్లులు కురుస్తున్నా శ్రీవారి భక్తుల భక్తిభావంతో తిరుమల మాడ వీధులు పూర్తిగా పరవశించిపోయాయి.

సర్వభూపాల వాహనసేవ విశిష్టత

'సర్వభూపాల' అంటే సమస్త లోకాలను పాలించే రాజులు అని అర్థం. అష్టదిక్పాలకులైన ఇంద్రుడు, అగ్ని, యముడు, నిరృతి, వరుణుడు, వాయువు, కుబేరుడు, ఈశాన్యుడు లోక రక్షణకు ప్రతీకలుగా నిలుస్తారు. ఈ లోకపాలకులందరూ స్వామివారిని తమ భుజస్కంధాలపై మోస్తూ సేవించడం సర్వభూపాల వాహనసేవ యొక్క పరమ ప్రత్యేకత. ప్రజలను ధర్మబద్ధంగా పరిపాలిస్తూ, భగవంతుని ఆశీస్సులతో లోకక్షేమానికి పాటుపడాలనే గొప్ప సందేశాన్ని ఈ సర్వభూపాల వాహనసేవ మానవాళికి చాటిచెబుతోంది.