SBI క్రెడిట్ కార్డు వినియోగదారులకు అలర్ట్.. డిసెంబర్ 1 నుంచి అదనపు ఛార్జీలు.

SBI Credit Card: ఎస్‌బీఐ క్రెడిట్ కార్డు వినియోగదారులకు కీలక గమనిక. 2026 డిసెంబర్ 1 నుంచి పెట్రోల్, డీజిల్, టోల్, మెట్రో వంటి కొన్ని చెల్లింపులపై 1 శాతం అదనపు ఛార్జీ విధించనున్నారు. అయితే, ఈ ఛార్జీలు ప్రతి ఒక్కరికీ వర్తించవు.

పెట్రోల్, డీజిల్ కొనుగోళ్లపై కొత్త నిబంధన

మీరు ఎస్‌బీఐ క్రెడిట్ కార్డుతో పెట్రోల్ లేదా డీజిల్ కొనుగోలు చేస్తున్నారా? అయితే కొత్త నిబంధన గురించి తెలుసుకోవాలి. 2026 డిసెంబర్ 1 నుంచి ఒక బిల్లింగ్ సైకిల్‌లో ఇంధనంపై మొత్తం ఖర్చు రూ.50,000 దాటితే 1 శాతం అదనపు ఛార్జీ చెల్లించాల్సి ఉంటుంది. ఇక్కడ ముఖ్యమైన విషయం ఏమిటంటే.. రూ.50,000 దాటిన మొత్తంపై మాత్రమే కాకుండా, మొత్తం ఇంధన ఖర్చుపై 1 శాతం ఛార్జీ విధిస్తారు.

ఉదాహరణకు, ఒక బిల్లింగ్ సైకిల్‌లో మీరు రూ.60,000 విలువైన పెట్రోల్ లేదా డీజిల్ కొనుగోలు చేస్తే, మొత్తం రూ.60,000పై 1 శాతం చొప్పున రూ.600 అదనంగా చెల్లించాలి. అదే మీ ఇంధన ఖర్చు రూ.50,000 లేదా అంతకంటే తక్కువగా ఉంటే ఈ ఛార్జీ వర్తించదు.

మెట్రో, టోల్, బస్సు చెల్లింపులపై 1 శాతం ఛార్జీ

ఇంధనంతో పాటు కొన్ని రవాణా సంబంధిత చెల్లింపులపైనా ఎస్‌బీఐ కార్డు కొత్త ఛార్జీలను అమలు చేయనుంది. ఒకే ట్రాన్సాక్షన్‌లో రవాణా సేవల కోసం చేసే చెల్లింపు రూ.30,000 దాటితే, ఆ మొత్తంపై 1 శాతం అదనపు ఛార్జీ విధిస్తారు. ఉదాహరణకు, మీరు ఒకేసారి రూ.35,000 చెల్లిస్తే రూ.350 అదనంగా చెల్లించాల్సి ఉంటుంది.

అయితే, ఈ నిబంధన నెల మొత్తం ఖర్చుపై కాకుండా ఒక్కో లావాదేవీ ఆధారంగా వర్తిస్తుంది. మెట్రో, లోకల్ రైళ్లు, బస్సు సేవలు, టోల్ గేట్లు, బ్రిడ్జి ఫీజులు వంటి చెల్లింపులు సంబంధిత మర్చంట్ కేటగిరీ కోడ్‌ల పరిధిలోకి వస్తే ఈ ఛార్జీలు వర్తించవచ్చు. ఫాస్ట్‌ట్యాగ్‌కు చేసే కొన్ని చెల్లింపులు కూడా ఇందులో ఉండే అవకాశం ఉంది. ప్రస్తుత ప్రకటనలో విమాన టికెట్లు, రైల్వే టికెట్లపై ప్రత్యేకంగా ప్రస్తావించలేదు. కాబట్టి అన్ని రకాల ప్రయాణ టికెట్లకూ ఈ ఛార్జీలు వర్తిస్తాయని భావించకూడదు.

ఏ చెల్లింపులకు వర్తిస్తుంది? ఎవరిపై ఎక్కువ ప్రభావం?

ఎస్‌బీఐ కార్డు ఈ ఛార్జీలను మర్చంట్ కేటగిరీ కోడ్ (MCC) ఆధారంగా నిర్ణయించింది. కార్డు నెట్‌వర్క్‌లు ఈ కోడ్‌లను కేటాయిస్తాయి. సంబంధిత కోడ్‌లలో మార్పులు జరిగే అవకాశం కూడా ఉందని బ్యాంకు తెలిపింది.

రవాణా చెల్లింపులకు MCC 4111, 4784, 4131 కోడ్‌లను, ఇంధన చెల్లింపులకు MCC 5172, 5541, 5542, 5983 కోడ్‌లను పేర్కొంది. అయితే, ఛార్జీ వర్తిస్తుందా లేదా అనేది లావాదేవీకి ఉపయోగించిన కోడ్‌పై ఆధారపడి ఉంటుంది.

ఈ కొత్త నిబంధనల వల్ల వ్యాపార అవసరాల కోసం భారీగా ఇంధనం కొనుగోలు చేసేవారు, ట్యాక్సీ లేదా రవాణా వాహనాలు నడిపేవారు, ఒకేసారి పెద్ద మొత్తంలో ఫాస్ట్‌ట్యాగ్ రీచార్జ్ చేసేవారిపై ఎక్కువ ప్రభావం పడే అవకాశం ఉంది. సాధారణంగా నెలకు రూ.50,000లోపు ఇంధనం కొనుగోలు చేసేవారికి ఈ కొత్త ఇంధన ఛార్జీ వల్ల అదనపు భారం ఉండదు. అలాగే రూ.30,000 మించని ఒక్కో అర్హత కలిగిన రవాణా చెల్లింపుపై ఈ ఛార్జీ వర్తించదు.

డిసెంబర్ 1 నుంచి అమలు.. వినియోగదారులు ఏం చేయాలి?

ఎస్‌బీఐ కార్డు 2026 అక్టోబర్ 27న తన వెబ్‌సైట్‌లో ఈ మార్పులకు సంబంధించిన నోటీసు జారీ చేసినట్లు సమాచారం. కొత్త ఛార్జీలు డిసెంబర్ 1, 2026 నుంచి అమల్లోకి రానున్నాయి. కార్డు వినియోగదారులు తమ బిల్లింగ్ సైకిల్ తేదీలను గుర్తుంచుకోవాలి. ఇంధనంపై చేసే మొత్తం ఖర్చును గమనిస్తూ ఉండాలి. రవాణా సేవలకు ఒకేసారి పెద్ద మొత్తంలో చెల్లింపులు చేసే ముందు అదనపు ఛార్జీలు వర్తిస్తాయో లేదో పరిశీలించాలి.

అవసరమైతే, చెల్లింపులను విడిగా చేయడం వల్ల ప్రయోజనం ఉంటుందో లేదో ముందుగానే తెలుసుకోవాలి. ఈ కొత్త నిబంధనలపై సందేహాలు ఉంటే ఎస్‌బీఐ కార్డు హెల్ప్‌లైన్ నంబర్లు 1860 180 1290 లేదా 39 02 02 02 (స్థానిక STD కోడ్‌తో) సంప్రదించవచ్చు.