Nvidia CEO Jensen Huang: జెన్సన్ హువాంగ్‌కు భారీ షాక్.. 30 నిమిషాల్లోనే రూ.70 వేల కోట్లు ఆవిరి!

Nvidia CEO Jensen Huang: ప్రపంచ కుబేరుల జాబితాలో ప్రముఖ స్థానంలో ఉన్న ఎన్విడియా (Nvidia) సీఈఓ జెన్సన్ హువాంగ్‌కు భారీ ఎదురుదెబ్బ తగిలింది. వ్యక్తిగత సంబంధాలు, గూఢచర్యం ఆరోపణలకు సంబంధించిన వార్తలు ఆయన సంపదపై తీవ్ర ప్రభావం చూపినట్లు కథనాలు వెల్లడిస్తున్నాయి. అమెరికా స్టాక్ మార్కెట్‌లో ట్రేడింగ్ ప్రారంభమైన కేవలం 30 నిమిషాల్లోనే ఆయన నికర సంపద సుమారు 7.4 బిలియన్ డాలర్లు (దాదాపు రూ.70 వేల కోట్లు) తగ్గినట్లు ఫోర్బ్స్ గణాంకాలు పేర్కొన్నాయి. దీంతో ప్రపంచ బిలియనీర్ల జాబితాలో ఆయన స్థానం ఎనిమిది నుంచి పదో స్థానానికి పడిపోయింది.

30 నిమిషాల్లో రూ.70 వేల కోట్ల నష్టం!

ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) రంగంలో అగ్రగామిగా కొనసాగుతున్న ఎన్విడియాలో జెన్సన్ హువాంగ్‌కు సుమారు 3.5 శాతం వాటా ఉంది. కంపెనీలో అతిపెద్ద వ్యక్తిగత వాటాదారుగా ఉన్న ఆయన సంపదలో ఎక్కువ భాగం ఎన్విడియా షేర్ల విలువపైనే ఆధారపడి ఉంటుంది.

అమెరికా కాలమానం ప్రకారం సోమవారం మార్కెట్ ట్రేడింగ్ ప్రారంభమైన తొలి 30 నిమిషాల్లోనే ఆయన సంపద 7.4 బిలియన్ డాలర్లు తగ్గి 154.7 బిలియన్ డాలర్లకు చేరినట్లు ఫోర్బ్స్ వెల్లడించింది. దీంతో బిలియనీర్ల జాబితాలో ఆయనను వెనక్కి నెట్టి బెర్క్‌షైర్ హాత్‌వే మాజీ సీఈఓ వారెన్ బఫెట్, ఒరాకిల్ సహ వ్యవస్థాపకుడు లారీ ఎలిసన్ ముందుకు వెళ్లినట్లు సమాచారం.

ప్రేమ వ్యవహారం.. గూఢచర్యం ఆరోపణలతో కలకలం!

ఎన్విడియా షేర్లు ఇప్పటికే పలు ప్రతికూల పరిణామాలతో ఒడిదుడుకులను ఎదుర్కొంటున్నాయి. అమెరికా ఎన్నికల ప్రభావం, డేటా సెంటర్ల నిర్మాణంలో జాప్యం జరగవచ్చన్న ఆందోళనలు, పెట్టుబడిదారుల లాభాల స్వీకరణ వంటి అంశాలు షేర్లపై ఒత్తిడి పెంచుతున్నాయి.

ఈ పరిస్థితుల్లో చైనా గూఢచారిగా ఆరోపణలు ఎదుర్కొంటున్న అలిస్ హువాంగ్‌తో జెన్సన్ హువాంగ్‌కు సంబంధాలున్నాయంటూ వచ్చిన వార్తలు మరింత కలకలం రేపాయి. ఈ వ్యవహారంపై కంపెనీ బోర్డు అంతర్గత విచారణకు ఆదేశించినట్లు కథనాలు పేర్కొంటున్నాయి. ఈ పరిణామాలు పెట్టుబడిదారుల్లో ఆందోళన పెంచడంతో అమెరికా మార్కెట్లు ముగిసే సమయానికి ఎన్విడియా షేర్లు నాలుగు శాతానికి పైగా పడిపోయినట్లు సమాచారం. దీంతో కంపెనీ మార్కెట్ విలువతో పాటు జెన్సన్ వ్యక్తిగత సంపద కూడా భారీగా తగ్గింది.

భార్య విడాకులు కోరితే పరిస్థితి ఏంటి?

జెన్సన్ హువాంగ్ వ్యక్తిగత జీవితానికి సంబంధించిన అంశాలు కూడా ఇప్పుడు చర్చనీయాంశంగా మారాయి. తన వ్యక్తిగత సంబంధాలపై భార్య లోరి హువాంగ్‌కు ఆయన బహిరంగంగా క్షమాపణలు చెప్పినట్లు కథనాలు వెల్లడించాయి.

ఒకవేళ లోరి విడాకులకు దరఖాస్తు చేస్తే ఆస్తుల పంపకం అంశం ప్రాధాన్యం సంతరించుకోనుంది. కాలిఫోర్నియా చట్టాల ప్రకారం వివాహం తర్వాత సంపాదించిన ఉమ్మడి ఆస్తిని సాధారణంగా భార్యాభర్తల మధ్య సమానంగా పంచాల్సి ఉంటుంది. ఈ లెక్కన భారీ మొత్తంలో ఆస్తి పంపకం జరిగే అవకాశం ఉందని విశ్లేషణలు వెలువడుతున్నాయి.

1985లో జెన్సన్, లోరి వివాహం చేసుకున్నారు. అయితే ప్రస్తుతం వీరిద్దరూ విడాకులకు దరఖాస్తు చేసినట్లు ఎలాంటి అధికారిక సమాచారం లేదు.

ఎన్విడియా సీఈఓ పదవికి ముప్పు ఉందా?

ఈ వివాదాల నేపథ్యంలో జెన్సన్ హువాంగ్ భవిష్యత్తుపై అంతర్జాతీయ మీడియా కథనాల్లో పలు ఊహాగానాలు వెలువడుతున్నాయి. గూఢచర్యం ఆరోపణల్లో ఆయన ఉద్దేశపూర్వకంగా ఎలాంటి రహస్య సమాచారాన్ని వెల్లడించలేదని విచారణలో తేలితే ఆయన పదవికి తక్షణ ముప్పు ఉండకపోవచ్చని విశ్లేషకులు భావిస్తున్నారు. అయితే కంపెనీ అంతర్గత నిబంధనలు మరింత కఠినతరం కావచ్చని అంచనా వేస్తున్నారు.

మరోవైపు కంపెనీ బోర్డుకు కీలక సమాచారాన్ని దాచిపెట్టినట్లు లేదా ప్రయోజనాల మధ్య సంఘర్షణకు పాల్పడినట్లు నిర్ధారణ అయితే ఆయన పదవిపై ప్రభావం పడే అవకాశం ఉంది.

అలాగే ఎగుమతి నిబంధనలకు విరుద్ధంగా చైనాకు అధునాతన ఏఐ చిప్‌లకు సంబంధించిన సాంకేతిక సమాచారం చేరినట్లు తేలితే పరిస్థితి మరింత తీవ్రంగా మారవచ్చు. అలాంటి సందర్భంలో దర్యాప్తు, చట్టపరమైన చర్యలు ఎదుర్కోవాల్సి రావచ్చని కథనాలు పేర్కొంటున్నాయి. ఈ పరిణామాలన్నీ ఎన్విడియా భవిష్యత్తుతో పాటు జెన్సన్ హువాంగ్ నాయకత్వంపైనా ప్రభావం చూపే అవకాశముంది.