Gold Price: ఈ దీపావ‌ళికి బంగారం కొన‌డం సరైన నిర్ణ‌య‌మేనా? ధ‌ర‌లు ఎలా ఉండ‌బోతున్నాయి.?

Gold Price: బంగారం ధరలు గత కొంతకాలంగా భారీగా హెచ్చుతగ్గులకు లోనవుతున్నాయి. 2025లో అద్భుతమైన ర్యాలీతో దూసుకెళ్లిన పసిడి ధరలు 2026 జనవరిలో ఆల్‌టైమ్ గరిష్ఠాన్ని తాకాయి. అయితే ఆ తర్వాత క్రమంగా తగ్గుముఖం పట్టాయి. ఈ క్ర‌మంలో ఈ దీపావ‌ళికి బంగారం కొన‌డం క‌రెక్టేనా తెలుసుకుందాం.

మూడు నెలల్లో 47 శాతం పెరిగిన బంగారం ధరలు

భారత్‌లో 2025 అక్టోబర్ 30న 24 క్యారెట్ల 10 గ్రాముల బంగారం ధర రూ.1,19,905గా ఉంది. అక్కడి నుంచి వేగంగా పెరిగిన ధరలు 2026 జనవరి 29న ఏకంగా రూ.1,76,306కు చేరాయి. అంటే కేవలం మూడు నెలల్లోనే సుమారు 47 శాతం పెరిగాయి. అయితే ఆ తర్వాత పరిస్థితి మారింది.

నవంబర్ 2, 2026 నాటికి ఎంసీఎక్స్ మార్కెట్‌లో 10 గ్రాముల బంగారం ధర సుమారు రూ.1,37,330కు పడిపోయింది. జనవరి గరిష్ఠ ధరతో పోలిస్తే దాదాపు రూ.38,976 తగ్గింది. అంటే 22 శాతం క్షీణించింది. అయినప్పటికీ ఏడాది క్రితం బంగారం కొనుగోలు చేసిన వారికి ఇప్పటికీ సుమారు 16.6 శాతం రాబడి లభించినట్లే. కాగా తాజాగా గురువారం బంగారం ధ‌ర కాస్త పెరిగి రూ. 1,46,020 వ‌ద్ద కొన‌సాగుతోంది.

అంతర్జాతీయ మార్కెట్ ప్రభావం.. బంగారం ధరలు ఎందుకు తగ్గుతున్నాయి?

భారత్‌లో బంగారం ధరలు అంతర్జాతీయ మార్కెట్‌తో పాటు డాలర్ విలువ, దిగుమతి సుంకాలపై ఆధారపడి ఉంటాయి. నవంబర్ 2న అంతర్జాతీయ మార్కెట్‌లో ఔన్స్ బంగారం ధర 3,911 డాలర్ల వద్ద ట్రేడైంది. జనవరి 29న నమోదైన 5,602 డాలర్ల గరిష్ఠంతో పోలిస్తే దాదాపు 30 శాతం తగ్గింది.

అమెరికాలో ద్రవ్యోల్బణం పెరగడం, వడ్డీ రేట్లు మరింత పెరిగే అవకాశాలు, డాలర్ బలపడటం బంగారంపై ఒత్తిడి పెంచుతున్నాయి. మరోవైపు భారత్‌లో దిగుమతి సుంకాలు, రూపాయి విలువలో మార్పులు అంతర్జాతీయ ధరల పతన ప్రభావాన్ని కొంతవరకు తగ్గిస్తున్నాయి. అందుకే ప్రపంచ మార్కెట్‌తో పోలిస్తే దేశీయంగా బంగారం ధరల తగ్గుదల కొంత తక్కువగా కనిపిస్తోంది.

చమురు ధరలు, యుద్ధ ప్రభావం.. బంగారానికి సవాళ్లు

ప్రస్తుతం బంగారం ధరలను ప్రభావితం చేస్తున్న అంశాల్లో చమురు ధరలు కీలకంగా మారాయి. నవంబర్ 2న బ్యారెల్ చమురు ధర సుమారు 110 డాలర్ల వద్ద కొనసాగింది. అమెరికా-ఇరాన్ యుద్ధం కారణంగా హార్ముజ్ జలసంధి ద్వారా చమురు సరఫరాకు ఆటంకాలు ఏర్పడటం దీనికి ప్రధాన కారణం.

చమురు ధరలు పెరిగితే ద్రవ్యోల్బణం పెరుగుతుంది. దాంతో అమెరికా ఫెడరల్ రిజర్వ్ వడ్డీ రేట్లను పెంచే అవకాశం ఉంటుంది. వడ్డీ ఆదాయం ఇవ్వని బంగారంపై ఇది ప్రతికూల ప్రభావం చూపుతుంది. అయితే మరోవైపు యుద్ధాలు, అంతర్జాతీయ ఉద్రిక్తతల సమయంలో సురక్షిత పెట్టుబడిగా భావించి కేంద్ర బ్యాంకులు, గోల్డ్ ఈటీఎఫ్ పెట్టుబడిదారులు బంగారం కొనుగోలు చేస్తున్నారు. ఇది ధరలకు కొంత మద్దతుగా నిలుస్తోంది.

2026 చివరి నాటికి బంగారం ధరలు పెరుగుతాయా?

ప్రస్తుత పరిస్థితుల్లో బంగారం ధరలు వెంటనే మళ్లీ రికార్డు స్థాయికి చేరుకోవడం కష్టమేనని మార్కెట్ విశ్లేషకుల అంచనా. అమెరికాలో ద్రవ్యోల్బణం తగ్గడం, వడ్డీ రేట్లు క్షీణించడం, డాలర్ బలహీనపడటం జరిగితే బంగారం ధరలు తిరిగి పుంజుకునే అవకాశం ఉంది. ముఖ్యంగా చమురు ధరలు, అమెరికా ఫెడరల్ రిజర్వ్ నిర్ణయాలు, బాండ్ రాబడులు, డాలర్ విలువను పెట్టుబడిదారులు గమనించాలి.

అయితే దీర్ఘకాలికంగా బంగారంపై సానుకూల అంచనాలు కొనసాగుతున్నాయి. భారీగా ధరలు తగ్గినప్పుడు దశలవారీగా కొనుగోలు చేయడం దీర్ఘకాలిక పెట్టుబడిదారులకు ఉపయోగకరంగా ఉండవచ్చు. ఆభరణాలు కొనాలనుకునే వారు కూడా మొత్తం డబ్బును ఒకేసారి పెట్టకుండా విడతలవారీగా కొనుగోలు చేయడం మంచిది. ధరలు మరింత తగ్గే అవకాశం ఉన్నందున జాగ్రత్తగా నిర్ణయం తీసుకోవాలి.

గ‌మ‌నిక‌: పైన తెలిపిన విష‌యాల‌ను కేవ‌లం ప్రాథ‌మిక స‌మాచారంగానే భావించాలి. పెట్టుబ‌డి పెట్టే ముందు ఆర్థిక నిపుణుల సూచ‌న‌లు పాటించ‌డ‌మే మంచిది.