Gold and Silver Prices Crash: గోల్డ్, సిల్వర్ ధరల్లో భారీ తగ్గుదల.. అసలు కారణాలివే
Gold and Silver Prices Crash: ఫెడ్ వడ్డీ రేట్ల పెంపు అంచనాలు, డాలర్ బలపడటంతో బంగారం 8.77 శాతం, వెండి 14.31 శాతం తగ్గాయి. ధరల పతనానికి కారణాలివే.
Gold and Silver Prices Crash: గోల్డ్, సిల్వర్ ధరల్లో భారీ తగ్గుదల.. అసలు కారణాలివే
Gold and Silver Prices Crash: బంగారం, వెండి కొనుగోలు చేయాలనుకునే వారికి కీలక అప్డేట్. అంతర్జాతీయ మార్కెట్లలో విలువైన లోహాల ధరలు భారీగా పడిపోయాయి. అమెరికా ఫెడరల్ రిజర్వ్ (US Fed) వడ్డీ రేట్ల పెంపుపై అంచనాలు పెరగడం, డాలర్ బలపడటం వంటి పరిణామాలు బంగారం, వెండి ధరలపై తీవ్ర ప్రభావం చూపాయి. ఈ వారం బంగారం ధర 8.77 శాతం తగ్గి 14 నెలల కనిష్ట స్థాయికి చేరగా, వెండి ధర ఏకంగా 14.31 శాతం పడిపోయింది.
ఫెడ్ వడ్డీ రేట్ల భయాలతో అమ్మకాల ఒత్తిడి
అమెరికాలో ద్రవ్యోల్బణం కొనసాగుతుండటంతో ఫెడరల్ రిజర్వ్ మరోసారి వడ్డీ రేట్లను పెంచవచ్చనే అంచనాలు మార్కెట్లలో బలపడ్డాయి. డిసెంబర్లో 25 బేసిస్ పాయింట్ల మేర వడ్డీ రేట్ల పెంపు ఉండవచ్చని ఇన్వెస్టర్లు భావిస్తున్నారు. దీనికి తోడు అమెరికా ట్రెజరీ బాండ్ల రాబడులు పెరగడం, డాలర్ బలపడటంతో బంగారం, వెండి వంటి విలువైన లోహాలపై అమ్మకాల ఒత్తిడి పెరిగింది.
MCXలో బంగారం ఫ్యూచర్స్ భారీ పతనం
శుక్రవారం డిసెంబర్ గడువు ముగిసే MCX గోల్డ్ ఫ్యూచర్స్ 4.32 శాతం క్షీణించాయి. దీంతో 10 గ్రాముల బంగారం ఫ్యూచర్స్ ధర రూ.1,21,949 స్థాయికి చేరింది. అదే సమయంలో డిసెంబర్ సిల్వర్ ఫ్యూచర్స్ 0.74 శాతం పెరిగి కిలోకు రూ.1,48,900 వద్ద ముగిశాయి.
ఇండియా బులియన్ అండ్ జ్యువెలర్స్ అసోసియేషన్ (IBJA) గణాంకాల ప్రకారం, 10 గ్రాముల 24 క్యారెట్ల బంగారం ధర గత వారం ముగింపులో రూ.1,35,809గా ఉండగా, శుక్రవారం రూ.1,23,893కి పడిపోయింది. మరోవైపు కిలో 99.9 శాతం స్వచ్ఛత కలిగిన వెండి ధర రూ.1,78,000 నుంచి రూ.1,52,528కి తగ్గింది.
క్రూడాయిల్ ధరల తగ్గుదల కూడా ప్రభావం
మరోవైపు అంతర్జాతీయ మార్కెట్లో ముడి చమురు ధరలు తగ్గడం కూడా మార్కెట్ సెంటిమెంట్పై ప్రభావం చూపింది. మధ్యప్రాచ్య దేశాల నుంచి చమురు ఎగుమతులు పుంజుకోవడం, ప్రపంచవ్యాప్తంగా సరఫరా మిగులు ఉండవచ్చనే అంచనాలతో WTI క్రూడాయిల్ ధర బ్యారెల్కు 83–84 డాలర్ల స్థాయికి పడిపోయింది. గత వారం నమోదైన గరిష్ఠ స్థాయిలతో పోలిస్తే ఇది దాదాపు 5 శాతం తక్కువ.
డాలర్ బలపడటంతో విలువైన లోహాలపై ఒత్తిడి
అమెరికా ద్రవ్య విధానం మరింత కఠినంగా మారవచ్చనే అంచనాలు, పెరుగుతున్న బాండ్ ఈల్డ్స్, బలపడుతున్న డాలర్ కారణంగా పెట్టుబడిదారులు తమ పెట్టుబడులను పునఃసమీక్షిస్తున్నారు. టెక్నాలజీ, ఆర్టిఫిషియల్ ఇంటెలిజెన్స్ (AI) సంబంధిత షేర్లలోనూ అమ్మకాలు పెరగడంతో వివిధ ఆస్తుల నుంచి పెట్టుబడులు ఉపసంహరించుకునే ధోరణి కనిపించింది. ఈ పరిణామాలన్నీ కలిసి బంగారం, వెండి ధరల పతనానికి కారణమయ్యాయి.




