EPFO: కీలక నిర్ణయం తీసుకున్న EPFO.. ఆ గ‌డువును అక్టోబ‌ర్ 31 వ‌ర‌కు పొడ‌గింపు

EPFO: ఉద్యోగుల జీతాల నుంచి ప్రతి నెలా కొంత మొత్తం ప్రావిడెంట్ ఫండ్ (PF) రూపంలో కట్ అవుతుంది. ఉద్యోగ విరమణ తర్వాత ఈ డబ్బు ఆర్థికంగా ఎంతో ఉపయోగపడుతుంది. అందుకే ఉద్యోగులు పీఎఫ్‌కు సంబంధించిన తాజా వివరాలు తెలుసుకోవడం ముఖ్యం. తాజాగా ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) కీలక నిర్ణయం తీసుకుంది.

పీఎఫ్ రిటర్న్ గడువు పొడిగింపు

సాధారణంగా ఉద్యోగుల జీతాలు, పీఎఫ్ చెల్లింపులకు సంబంధించిన వివరాలను కంపెనీలు ప్రతి నెలా EPFOకు సమర్పించాలి. సెప్టెంబర్ నెలకు సంబంధించిన రిటర్న్‌ను అక్టోబర్ 15లోగా దాఖలు చేయాల్సి ఉంది. అయితే EPFO ఈ గడువును అక్టోబర్ 31 వరకు పొడిగించింది. దీంతో కంపెనీలు, ఇతర సంస్థలు తమ ఉద్యోగుల పీఎఫ్ వివరాలను సరిచూసుకుని రిటర్నులు సమర్పించేందుకు మరింత సమయం లభించింది. చివరి తేదీ వరకు వేచి చూడకుండా ముందుగానే ప్రక్రియ పూర్తి చేసుకోవడం మంచిది.

ECR అంటే ఏంటి?

కంపెనీలు తమ ఉద్యోగుల జీతాలు, పీఎఫ్ చందాలు, సంబంధిత చెల్లింపుల వివరాలను EPFOకు సమర్పించాలి. ఈ వివరాలను ఎలక్ట్రానిక్ చలాన్ కమ్ రిటర్న్ (ECR) అంటారు. ఉద్యోగుల భవిష్య నిధి (EPF), ఉద్యోగుల పెన్షన్ పథకం (EPS), ఉద్యోగుల డిపాజిట్ లింక్డ్ ఇన్సూరెన్స్ (EDLI) పథకాలకు సంబంధించిన వివరాలు ఇందులో ఉంటాయి. ఉద్యోగుల జీతాల నుంచి ఎంత మొత్తం కట్ చేశారు? యజమాని ఎంత చందా చెల్లించాలి? వంటి వివరాలను సక్రమంగా నమోదు చేసి సమర్పించడం కంపెనీల బాధ్యత. ఈ వివరాల్లో తప్పులు ఉంటే వాటిని సరిచేసి మళ్లీ సమర్పించాల్సిన పరిస్థితి రావచ్చు.

గడువు ఎందుకు పొడిగించారు?

సెప్టెంబర్ నెలలో వేతన పరిమితికి సంబంధించిన మార్పులు అమల్లోకి రావడం వల్ల పీఎఫ్ రిటర్నుల లెక్కల్లో మార్పులు అవసరమయ్యాయి. సెప్టెంబర్ 17న వేతన పరిమితిని రూ.15,000 నుంచి రూ.25,000కు పెంచారు. ఈ మార్పు కారణంగా యజమానులు సెప్టెంబర్ నెలకు సంబంధించిన పీఎఫ్ వివరాలను లెక్కించేటప్పుడు వేర్వేరు కాలాలకు సంబంధించిన వివరాలను పరిశీలించాల్సి రావచ్చు. ఈ ప్రక్రియలో గందరగోళం లేకుండా రిటర్నులను సక్రమంగా దాఖలు చేసేందుకు అదనపు సమయం అవసరమవుతుంది. ఈ నేపథ్యంలో గడువును అక్టోబర్ 31 వరకు పొడిగించినట్లు సమాచారం.

కంపెనీలు ఈ విషయాలు గుర్తుంచుకోవాలి

పీఎఫ్ రిటర్నులు దాఖలు చేసే సమయంలో యజమానులు కొన్ని ముఖ్యమైన విషయాలపై దృష్టి పెట్టాలి.

ద్యోగుల సెప్టెంబర్ నెల జీతాలు, పీఎఫ్ చందాలకు సంబంధించిన లెక్కలను సరిచూసుకోవాలి. జీతాల రికార్డులు, పీఎఫ్ చెల్లింపుల వివరాల్లో తేడాలు లేకుండా చూసుకోవాలి. రిటర్న్‌లో ఏవైనా పొరపాట్లు ఉంటే సరిచేసి అవసరమైన వివరాలను మళ్లీ సమర్పించాలి. అక్టోబర్ 31లోగా ప్రక్రియను పూర్తి చేసుకోవాలి. చివరి నిమిషంలో సాంకేతిక సమస్యలు లేదా ఇతర ఇబ్బందులు ఎదురైతే ఆలస్యం కావచ్చు కాబ‌ట్టి ముందుగానే ప‌ని పూర్తి చేయ‌డం ఉత్త‌మం. పీఎఫ్ రిటర్న్ దాఖలు చేసే బాధ్యత ప్రధానంగా యజమానులు, కంపెనీలదే. గడువు పొడిగింపు ఉద్యోగులు తమ పీఎఫ్ వివరాలను పట్టించుకోనవసరం లేదని అర్థం కాదు. ఉద్యోగులు తమ పీఎఫ్ చందాలు సక్రమంగా జమ అవుతున్నాయో లేదో ఎప్పటికప్పుడు పరిశీలించుకోవాలి.