క్ష‌ణాల్లో బంగారం మీ ఇంటికి.. ధ‌న్‌తేరస్‌కు బంగారం, వెండి కొనే వారికి గుడ్ న్యూస్!

Dhanteras: ధన్‌తేరస్ సందర్భంగా బంగారం, వెండి కొనుగోలు చేయాలని చాలామంది భావిస్తుంటారు. ఈ పండుగ వేళ పసిడి, వెండి కొనుగోలు చేస్తే ఐశ్వర్యం, అదృష్టం కలిసివస్తాయని నమ్ముతారు. ఈ నేపథ్యంలో క్విక్ కామర్స్ సంస్థ స్విగ్గీ ఇన్‌స్టామార్ట్ కస్టమర్లకు ప్రత్యేక ఆఫర్లను ప్రకటించింది.

ఇన్‌స్టామార్ట్‌లో బంగారం, వెండి నాణేలు అందుబాటులోకి..

స్విగ్గీ ఇన్‌స్టామార్ట్ తన ప్లాట్‌ఫామ్‌పై బంగారం, వెండి నాణేలను అందుబాటులోకి తీసుకొచ్చింది. ఇందుకోసం కల్యాణ్ జ్యువెలర్స్‌తో భాగస్వామ్యం కుదుర్చుకుంది. ధన్‌తేరస్, దీపావళి పండుగలను దృష్టిలో పెట్టుకుని వినియోగదారులకు ఇంటి నుంచే బంగారం, వెండి కొనుగోలు చేసే సదుపాయాన్ని కల్పిస్తోంది.

ఇందులో భాగంగా 0.5 గ్రాముల నుంచి 10 గ్రాముల వరకు బంగారు నాణేలు, 1 గ్రాము నుంచి 100 గ్రాముల వరకు వెండి నాణేలు కొనుగోలు చేయవచ్చు. పండుగ కానుకలుగా ఇచ్చేందుకు కూడా ఇవి ఉపయోగపడతాయని సంస్థ తెలిపింది.

బంగారు నాణేలు కొంటే ఉచితంగా వెండి నాణెం..

కల్యాణ్ జ్యువెలర్స్‌కు చెందిన బంగారు నాణేలను ఇన్‌స్టామార్ట్‌లో కొనుగోలు చేసే కస్టమర్లకు ప్రత్యేక ఆఫర్ అందిస్తోంది. నవంబర్ 1 నుంచి 6వ తేదీ వరకు ప్రతిరోజూ దేశవ్యాప్తంగా మొదటి 1,000 మంది కస్టమర్లకు ఉచితంగా 1 గ్రాము వెండి నాణెం ఇవ్వనుంది. అంటే ప్రతిరోజూ బంగారు నాణెం కొనుగోలు చేసే తొలి 1,000 మందికి ఈ ఆఫర్ వర్తిస్తుంది. అయితే ఈ ఆఫర్‌కు సంబంధించిన నిబంధనలు, అర్హత వివరాలను కొనుగోలు చేసే సమయంలో ప‌రిశీలించాలి.

5 గ్రాముల వెండి నాణెం విలువైన డిస్కౌంట్ వోచర్ కూడా..

బంగారు నాణేలు కొనుగోలు చేసేవారికి మరో ప్రయోజనాన్ని కూడా సంస్థ ప్రకటించింది. కల్యాణ్ జ్యువెలర్స్ బంగారు నాణెం కొనుగోలు చేసిన ప్రతి కస్టమర్‌కు 5 గ్రాముల వెండి నాణెం విలువకు సమానమైన డిజిటల్ డిస్కౌంట్ వోచర్ అందించనుంది. ఈ వోచర్‌ను దేశవ్యాప్తంగా ఉన్న కల్యాణ్ జ్యువెలర్స్ షోరూమ్‌లలో ఉపయోగించుకోవచ్చు.

అయితే ఈ ఆఫర్ 2026 డిసెంబర్ 31 వరకు మాత్రమే అందుబాటులో ఉంటుంది. వోచర్ వినియోగానికి సంబంధించిన ఇతర నిబంధనలు కూడా వర్తిస్తాయని సంస్థ వెల్లడించింది.

ఆన్‌లైన్‌లో పెరుగుతోన్న బంగారం కొనుగోళ్లు

ఇటీవల ఆన్‌లైన్‌లో బంగారం, వెండి కొనుగోలు చేసే వారి సంఖ్య గణనీయంగా పెరుగుతోందని ఇన్‌స్టామార్ట్ గణాంకాలు చెబుతున్నాయి. గత 12 నెలల్లో 0.5 గ్రాముల బంగారు నాణేల నుంచి 1 కిలో వెండి బార్ల వరకు జరిగిన కొనుగోళ్లను పరిశీలిస్తే.. బంగారం కొనుగోళ్లు ఏకంగా 258 శాతం పెరిగాయి.

వెండి కొనుగోళ్లు 185 శాతం వృద్ధి చెందాయి. నగరాల వారీగా చూస్తే బెంగళూరు మొదటి స్థానంలో ఉంది. ఆ తర్వాత ముంబై, హైదరాబాద్, అహ్మదాబాద్, లక్నో, కోయంబత్తూరు, ఇండోర్, భువనేశ్వర్, విశాఖపట్నం నగరాలు ఉన్నాయి.

బెంగళూరుకు చెందిన ఓ కస్టమర్ ఒకే రోజు కొన్ని గంటల వ్యవధిలోనే రూ.2,52,459 విలువైన బంగారం, వెండి కొనుగోలు చేశారు. ఇందులో 50 గ్రాముల చొప్పున ఐదు వెండి బార్లు, గణేశుడు, లక్ష్మీ-గణేశుడి బొమ్మలు, స్వస్తిక్ గుర్తులతో కూడిన బంగారు నాణేలు ఉన్నాయి.

గత ఏడాది ధన్‌తేరస్ సమయంలో ఇన్‌స్టామార్ట్‌లో బంగారం కొనుగోళ్లు అంతకుముందు ఏడాదితో పోలిస్తే 400 శాతానికి పైగా పెరిగాయి. ఈ ఏడాది అక్షయ తృతీయ సందర్భంగా కూడా బంగారం కొనుగోళ్లు దాదాపు 50 శాతం వృద్ధి చెందాయి. ముఖ్యంగా 0.5, 1, 2 గ్రాముల నాణేలకు ఎక్కువ డిమాండ్ కనిపించింది.

ఆన్‌లైన్‌లో బంగారం కొనేముందు ఈ జాగ్ర‌త్త‌లు తీసుకోవాలి

ఇన్‌స్టామార్ట్, బ్లింకిట్, జెప్టో వంటి క్విక్ కామర్స్ యాప్స్ ద్వారా బంగారం, వెండి కొనుగోలు చేయడం సులభమే. అయితే ఆన్‌లైన్‌లో కొనుగోలు చేసే ముందు కొన్ని విషయాలు తప్పనిసరిగా గుర్తుంచుకోవాలి.

ధరలను పోల్చండి: ఒకే బరువున్న నాణేలకు వివిధ ప్లాట్‌ఫామ్‌లలో ఉన్న ధరలను పరిశీలించాలి. ప్రకటనలో కనిపించే ధర కాకుండా పన్నులు, డెలివరీ ఛార్జీలతో కలిపి చివరగా చెల్లించాల్సిన మొత్తాన్ని చూడాలి.

రిటర్న్ పాలసీ తెలుసుకోండి: బంగారం, వెండి నాణేలను తిరిగి ఇచ్చే అవకాశం ఉందా? రీప్లేస్‌మెంట్ నిబంధనలు ఏమిటి? ముందుగానే తెలుసుకోవాలి.

నాణ్యతను పరిశీలించండి: నాణేలను తయారు చేసిన సంస్థ వివరాలు, స్వచ్ఛత, సంబంధిత ధ్రువీకరణ పత్రాలను తనిఖీ చేయాలి.

బిల్లు భద్రపరుచుకోండి: ఆర్డర్ చేసిన తర్వాత వచ్చిన కన్ఫర్మేషన్, ఇన్వాయిస్‌ను జాగ్రత్తగా ఉంచుకోవాలి.

డెలివరీ సమయంలో చెక్‌ చేయండి: ప్యాకేజింగ్ సరిగ్గా ఉందా? ఆర్డర్ చేసిన బరువు, డిజైన్, ఉత్పత్తి వివరాలు సరిపోయాయా? అనేది పరిశీలించాలి.

మొత్తంగా చూస్తే క్విక్ కామర్స్ యాప్స్ ద్వారా బంగారం, వెండి కొనుగోలు చేయడం వల్ల నగల దుకాణాలకు వెళ్లే అవసరం తగ్గుతుంది. అయితే కేవలం ఆఫర్లను చూసి తొందరపడకుండా ధర, నాణ్యత, స్వచ్ఛత, కొనుగోలు నిబంధనలను పరిశీలించిన తర్వాతే నిర్ణయం తీసుకోవడం మంచిది.