Credit card: పెర‌గ‌డ‌మే కాదు క్రెడిట్ కార్డు లిమిట్ త‌గ్గుతుంద‌ని తెలుసా.?

Credit card: క్రెడిట్ కార్డు తీసుకునేటప్పుడు ఎంత లిమిట్ వస్తుందనేది చాలామంది ఆసక్తిగా చూస్తారు. అయితే ఒకసారి కార్డు తీసుకున్న తర్వాత ఆ లిమిట్‌ను బ్యాంకు ఎప్పటికీ అలాగే కొనసాగిస్తుందని అనుకోవడం సరికాదు. బ్యాంకులు తమ రిస్క్ అంచనాల ఆధారంగా క్రెడిట్ పరిమితిని పెంచవచ్చు లేదా తగ్గించవచ్చని మీకు తెలుసా.?

క్రెడిట్ కార్డును ఎక్కువకాలం ఉపయోగించకపోయినా లిమిట్ తగ్గొచ్చు

క్రెడిట్ కార్డు తీసుకున్న తర్వాత దాన్ని క్రమం తప్పకుండా ఉపయోగిస్తున్నారా లేదా అనేది కూడా బ్యాంకుల పరిశీలనలో ఉంటుంది. కొంతమంది ఒక కార్డును అత్యవసర పరిస్థితుల కోసం మాత్రమే ఉంచుకుని నెలల తరబడి ఉపయోగించరు. ఇలాంటి కార్డులపై పెద్ద క్రెడిట్ లిమిట్ కొనసాగించడం బ్యాంకుకు అవసరం లేదని భావించే అవకాశం ఉంటుంది. ఉదాహరణకు మీ కార్డు పరిమితి రూ.5 లక్షలు ఉందనుకుందాం. కానీ మీరు ఏడాది కాలంగా దాదాపు కార్డును ఉపయోగించలేదు. ఇలాంటి పరిస్థితుల్లో బ్యాంకు తన రిస్క్ మేనేజ్‌మెంట్ విధానాల ప్రకారం మీ లిమిట్‌ను తగ్గించవచ్చు. ఇది తప్పనిసరిగా మీ ఆర్థిక పరిస్థితి బలహీనపడిందనే అర్థం కాదు. కార్డు వినియోగ విధానంలో వచ్చిన మార్పు కూడా కారణం కావచ్చు. ముఖ్యంగా ఒకటి కంటే ఎక్కువ క్రెడిట్ కార్డులు ఉన్నవారిలో ఉపయోగించని కార్డుల లిమిట్‌ను బ్యాంకులు సమీక్షించే అవకాశం ఉంటుంది.

ఆలస్యపు చెల్లింపులు, అధిక బకాయిలు ఉంటే బ్యాంకులు అప్రమత్తం

క్రెడిట్ కార్డు బిల్లును గడువులోపు చెల్లించడం చాలా ముఖ్యం. పదేపదే ఆలస్యంగా చెల్లించడం, EMIలు సకాలంలో చెల్లించకపోవడం, ఆటో డెబిట్ విఫలమవడం వంటి అంశాలు బ్యాంకు దృష్టిలో పడవచ్చు.

అలాగే ప్రతి నెలా బిల్లులో కనీస మొత్తాన్ని మాత్రమే చెల్లిస్తూ మిగిలిన మొత్తాన్ని తర్వాతి నెలలకు తీసుకెళ్లడం కూడా రుణ భారం పెరుగుతున్న సంకేతంగా పరిగణించే అవకాశం ఉంది. ఒకేసారి అనేక క్రెడిట్ కార్డుల్లో బకాయిలు పెరుగుతుంటే బ్యాంకులు మరింత జాగ్రత్తగా వ్యవహరించవచ్చు. క్రెడిట్ స్కోర్ బాగానే ఉన్నప్పటికీ, బ్యాంకు తన సొంత అంతర్గత రిస్క్ అంచనా ప్రకారం లిమిట్‌ను తగ్గించే అవకాశం ఉంటుంది. అంటే క్రెడిట్ లిమిట్ తగ్గిందంటే తప్పనిసరిగా మీ CIBIL స్కోర్‌లో సమస్య ఉందని భావించాల్సిన అవసరం లేదు.

ఆదాయం, ఇతర రుణాలు కూడా క్రెడిట్ లిమిట్‌పై ప్రభావం చూపుతాయి

క్రెడిట్ కార్డు లిమిట్ నిర్ణయించేటప్పుడు బ్యాంకులు మీ ఆదాయ సామర్థ్యాన్ని కూడా పరిగణనలోకి తీసుకుంటాయి. ఉద్యోగ మార్పు, ఆదాయంలో తగ్గుదల లేదా బ్యాంకుతో అనుసంధానమైన ఖాతాలో జీతం జమ కాకపోవడం వంటి మార్పులు కనిపిస్తే కార్డు లిమిట్‌ను మరోసారి సమీక్షించే అవకాశం ఉంటుంది. అదే సమయంలో ఇతర బ్యాంకులు లేదా ఆర్థిక సంస్థల నుంచి మీరు కొత్తగా తీసుకున్న రుణాలు కూడా ప్రభావం చూపవచ్చు. ఒకేసారి అనేక లోన్ల కోసం దరఖాస్తు చేయడం, కొత్త క్రెడిట్ కార్డులు తీసుకోవడం, ఇప్పటికే ఉన్న రుణాల మొత్తం పెరగడం వంటి అంశాలు మీ మొత్తం రుణ భారాన్ని పెంచుతాయి. మీకు తెలియకుండానే మీ క్రెడిట్ రిపోర్టులో తప్పు సమాచారం నమోదై ఉన్నా ఇలాంటి పరిస్థితి ఏర్పడొచ్చు. అందుకే అప్పుడప్పుడు క్రెడిట్ రిపోర్టును పరిశీలించడం మంచిది. మీ పేరుతో ఏవైనా తెలియని రుణాలు లేదా తప్పుగా నమోదైన చెల్లింపులు ఉన్నాయా అనేది చెక్ చేసుకోవాలి.

లిమిట్ తగ్గితే క్రెడిట్ స్కోర్ ఎందుకు ప్రభావితమవుతుంది? ఏం చేయాలి?

క్రెడిట్ కార్డు లిమిట్ తగ్గడం వల్ల మరో ముఖ్యమైన ప్రభావం క్రెడిట్ యుటిలైజేషన్ రేషియోపై పడవచ్చు. అంటే మీకు అందుబాటులో ఉన్న మొత్తం క్రెడిట్‌లో ఎంత మొత్తాన్ని ఉపయోగిస్తున్నారనేది ఇది చూపిస్తుంది. ఉదాహరణకు మీ క్రెడిట్ లిమిట్ రూ.5 లక్షలు ఉండి, మీరు రూ.1 లక్ష ఉపయోగిస్తున్నారని అనుకుందాం. అప్పుడు మీ వినియోగ నిష్పత్తి 20 శాతం. అదే లిమిట్‌ను బ్యాంకు రూ.2 లక్షలకు తగ్గిస్తే, మీరు ఉపయోగిస్తున్న రూ.1 లక్ష మారకపోయినా వినియోగ నిష్పత్తి 50 శాతానికి పెరుగుతుంది. ఇది క్రెడిట్ స్కోర్‌పై ప్రతికూల ప్రభావం చూపే అవకాశం ఉంటుంది.

అందుకే లిమిట్ తగ్గిన వెంటనే మరో క్రెడిట్ కార్డు కోసం దరఖాస్తు చేయడం కంటే ముందుగా అసలు కారణాన్ని తెలుసుకోవడం మంచిది. మీ చెల్లింపుల చరిత్రను పరిశీలించండి. క్రెడిట్ రిపోర్టులో తప్పులున్నాయా చూడండి. ఆర్థిక పరిస్థితి స్థిరంగా ఉండి, బిల్లులు సకాలంలో చెల్లిస్తున్నట్లయితే బ్యాంకును సంప్రదించి లిమిట్ ఎందుకు తగ్గించారో అడగవచ్చు. అవసరమైతే ఆదాయానికి సంబంధించిన పత్రాలు, చెల్లింపుల రికార్డును సమర్పించి లిమిట్‌ను పునఃపరిశీలించాలని కోరవచ్చు.