Atal Pension Yojana: రోజుకు 7 రూపాయ‌లు ప‌క్క‌న‌పెడితే.. జీవితాంతం రూ. 5 వేల పెన్ష‌న్ పొందొచ్చు!

Atal Pension Yojana: Atal Pension Yojana: ఉద్యోగం ఉన్నప్పుడు సంపాదనకు ఇబ్బంది లేకపోయినా.. రిటైర్మైంట్ త‌ర్వాత ఆదాయం లేకపోవడం చాలామందికి ఆందోళన కలిగించే విషయం. ముఖ్యంగా ప్రభుత్వ పెన్షన్ లేని ప్రైవేట్ ఉద్యోగులు, స్వయం ఉపాధి చేసుకునేవారు, చిన్న వ్యాపారులు ఇబ్బందులు ప‌డుతుంటారు. అలాంటి వారి కోస‌మే కేంద్రం అటల్ పెన్షన్ యోజన అనే ప‌థ‌కాన్ని తీసుకొచ్చింది.

అటల్ పెన్షన్ యోజనలో ఎంత పెన్షన్ వస్తుంది?

అటల్ పెన్షన్ యోజనలో చేరిన వ్యక్తి 60 ఏళ్ల వయసు పూర్తయ్యాక ముందుగా ఎంచుకున్న పెన్షన్ మొత్తాన్ని పొందుతారు. ఇందులో నెలకు రూ.1,000, రూ.2,000, రూ.3,000, రూ.4,000 లేదా రూ.5,000 పెన్షన్ ఆప్షన్లు ఉన్నాయి. ముఖ్యంగా చిన్న వయసులోనే ఖాతా ప్రారంభిస్తే చెల్లించాల్సిన నెలవారీ చందా తక్కువగా ఉంటుంది.

ఉదాహరణకు 18 ఏళ్ల వయసులో APYలో చేరి రూ.5,000 నెలవారీ పెన్షన్ ఎంపిక చేసుకున్న వ్యక్తి నెలకు రూ.210 చెల్లిస్తే స‌రిపోతుంది. అంటే రోజుకు సుమారు రూ.7 చొప్పున ఆదా చేస్తూ భవిష్యత్తులో నెలవారీ పెన్షన్‌కు ఏర్పాట్లు చేసుకోవచ్చు. అయితే ఈ చందా మొత్తం వయసు, ఎంచుకున్న పెన్షన్ మొత్తాన్ని బట్టి మారుతుంది.

ఎవరు ఈ పథకంలో చేరవచ్చు?

APYలో చేరాలంటే కొన్ని అర్హతలు తప్పనిసరిగా ఉంటాయి. 18 నుంచి 40 ఏళ్ల మధ్య వయసున్న భారతీయ పౌరులు ఈ పథకంలో ఖాతా ప్రారంభించవచ్చు. దరఖాస్తుదారుడికి బ్యాంక్ లేదా పోస్టాఫీసులో సేవింగ్స్ ఖాతా ఉండాలి. చందా మొత్తం అదే ఖాతా నుంచి ఆటో డెబిట్ ద్వారా చెల్లించే విధంగా ఏర్పాటు చేసుకోవచ్చు.

అయితే ఒక ముఖ్యమైన నిబంధన ఉంది. 2022 అక్టోబర్ 1 నుంచి ఆదాయపు పన్ను చెల్లించే వ్యక్తులు కొత్తగా APYలో చేరేందుకు అర్హులు కాదు. ఇప్పటికే ఖాతా ఉన్నవారికి వర్తించే నిబంధనలు వేరుగా ఉండొచ్చు. కాబట్టి చేరే ముందు బ్యాంకు లేదా పోస్టాఫీసులో ప్రస్తుత అర్హతలను నిర్ధారించుకోవడం మంచిది.

60 ఏళ్ల తర్వాత డబ్బు ఎలా అందుతుంది?

APYలో సభ్యుడు 60 ఏళ్లు పూర్తిచేసుకున్న తర్వాత ఎంచుకున్న పెన్షన్ మొత్తం నెలనెలా అందుతుంది. ఈ పెన్షన్ సభ్యుడి జీవితకాలంలో కొనసాగుతుంది. ఖాతాదారు మరణించిన తర్వాత ఆయన లేదా ఆమె జీవిత భాగస్వామికి అదే పెన్షన్ అందే నిబంధన ఉంది. భార్యాభర్తలు ఇద్దరూ మరణించిన తర్వాత పథకంలో నిర్ణయించిన విధానం ప్రకారం నామినీకి పెన్షన్ సంపదకు సంబంధించిన మొత్తాన్ని చెల్లిస్తారు. అందువల్ల ఇది కేవలం వృద్ధాప్యంలో నెలవారీ ఆదాయాన్ని అందించే పథకం మాత్రమే కాకుండా.. కుటుంబానికి సంబంధించిన ఆర్థిక భద్రతను కూడా దృష్టిలో పెట్టుకున్న పింఛను వ్యవస్థగా ఉపయోగపడుతుంది.

APYలో ఎలా చేరాలి?

అటల్ పెన్షన్ యోజనలో చేరాలనుకునేవారు తమ బ్యాంకు లేదా పోస్టాఫీసు బ్రాంచ్‌ను సంప్రదించవచ్చు. APY నమోదు కోసం అవసరమైన వివరాలు, KYC ప్రక్రియను పూర్తి చేసి.. తమకు కావాల్సిన పెన్షన్ మొత్తాన్ని ఎంచుకోవాలి. అనంతరం నిర్ణయించిన చందా మొత్తాన్ని ఖాతా నుంచి ఆటోమేటిక్‌గా కట్ అయ్యేలా ఏర్పాటు చేసుకోవచ్చు. చందాను నెలవారీగా చెల్లించే అవకాశం ఉండటంతో పాటు నిబంధనలకు అనుగుణంగా ఇతర చెల్లింపు వ్యవధులను కూడా ఎంచుకోవచ్చు. వయసు పెరిగిన తర్వాత ఆదాయం తగ్గే పరిస్థితిని ముందుగానే అంచనా వేసుకుని చిన్న మొత్తంతోనే పెన్షన్ కోసం ప్రణాళిక వేసుకోవాలనుకునేవారికి APY ఉపయోగపడే అవకాశం ఉంది. అయితే ఖాతా తెరవడానికి ముందు ప్రస్తుత ప్రభుత్వ నిబంధనలు, అర్హతలు, నెల‌కు ఎంత చెల్లించాల‌న్న వివ‌రాల‌ను బ్యాంకు లేదా పోస్టాఫీసు వద్ద తప్పనిసరిగా పరిశీలించాలి.