Tata Nexon: కొత్త హంగులతో వస్తున్న టాటా నెక్సాన్.. కార్ లవర్స్‌కు పండగే పండగ

Tata Nexon: దేశీయ ఆటోమొబైల్ మార్కెట్లో అత్యంత ఆదరణ పొందిన కాంపాక్ట్ ఎస్‌యూవీలలో టాటా నెక్సాన్ ముందు వరుసలో ఉంటుంది. కంపెనీ తన ఈ పాపులర్ కారును మరింత ఆధునీకరించి సరికొత్త రూపంలోకి తీసుకురావడానికి సన్నాహాలు చేస్తోంది. ఇందులో భాగంగా 2027 సంవత్సరంలో నెక్సాన్ కొత్త తరం మోడల్‌ను లాంచ్ చేసేందుకు టాటా మోటార్స్ ప్లాన్ చేస్తోంది. ప్రస్తుతం ఈ కొత్త ఎస్‌యూవీకి సంబంధించిన టెస్టింగ్ ప్రక్రియ వివిధ ప్రాంతాల్లో జోరుగా సాగుతోంది. రోడ్లపై టెస్ట్ మ్యూల్స్ తరచూ కనిపిస్తుండటంతో కార్ ప్రియుల్లో అంచనాలు భారీగా పెరిగిపోయాయి.

అట్లాస్ ప్లాట్‌ఫారమ్‌పై సరికొత్త నిర్మాణం

టాటా మోటార్స్ ఈ కొత్త నెక్సాన్‌కు గరుడ్ అనే కోడ్‌నేమ్‌ను కేటాయించింది. ఈ వాహనాన్ని కంపెనీ అత్యంత అధునాతనమైన ATLAS ప్లాట్‌ఫారమ్‌పై అభివృద్ధి చేస్తోంది. సరిగ్గా ఇదే ప్లాట్‌ఫారమ్‌ను టాటా కర్వ్ కారులో కూడా ఉపయోగిస్తున్నారు. ఇది అత్యంత సౌకర్యవంతమైన మాడ్యులర్ ప్లాట్‌ఫారమ్ కావడంతో వేర్వేరు బాడీ స్టైల్స్, సైజులు అలాగే వివిధ పవర్‌ట్రైన్‌లకు ఇది సరిగ్గా సరిపోతుంది. అంతేకాకుండా ఫ్యూచర్ క్లౌడ్ కనెక్టివిటీ, అడ్వాన్స్‌డ్ ఎలక్ట్రిక్ ఆర్కిటెక్చర్ వంటి అధునాతన టెక్నాలజీలకు కూడా ఈ ప్లాట్‌ఫారమ్ పూర్తి మద్దతు ఇస్తుంది.

అద్భుతమైన డిజైన్ అలాగే ప్రీమియం లుక్

స్పై ఫొటోల ద్వారా అందుతున్న సమాచారం ప్రకారం కొత్త నెక్సాన్ బాహ్య రూపంలో భారీ మార్పులు జరగనున్నాయి. ముందు భాగంలో స్ప్లిట్ ఎల్ఈడీ ప్రొజెక్టర్ హెడ్‌ల్యాంప్‌లు, సరికొత్త గ్రిల్, అప్‌డేట్ చేసిన బంపర్ అందించనున్నారు. బోనట్ లైన్ దగ్గర సన్నని ఎల్ఈడీ డీఆర్‌ఎల్‌లు అమర్చనున్నారు. ఫ్రంట్ బంపర్‌లో Level 2 ADAS కోసం ప్రత్యేకంగా స్క్వేర్ డిజైన్ రాడార్ సెన్సార్ కూడా ఉండటం గమనార్హం. కొత్త డిజైన్ అలాయ్ వీల్స్, రెయిల్స్, ఓఆర్‌వీఎంలపై టర్న్ ఇండికేటర్లు ఈ కారుకు మరింత స్పోర్టీ లుక్‌ను తెచ్చిపెట్టనున్నాయి. వెనుక వైపు కనెక్టెడ్ ఎల్ఈడీ టెయిల్‌ల్యాంప్‌లు, కొత్త బంపర్ ఇవ్వనున్నారు.

అత్యాధునిక హంగులతో కూడిన ఇంటీరియర్

కేవలం బయటి డిజైనే కాకుండా లోపలి క్యాబిన్‌ను కూడా అత్యంత విలాసవంతంగా తీర్చిదిద్దాలని కంపెనీ భావిస్తోంది. కొత్త లెదరేట్ అప్హోల్స్ట్రీ, అప్‌డేటెడ్ ట్రిమ్స్, సరికొత్త క్యాబిన్ థీమ్ ఇందులో చూడవచ్చు. ఫీచర్ల పరంగా చూస్తే పవర్డ్ అలాగే వెంటిలేటెడ్ ఫ్రంట్ సీట్లు, పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, ఫుల్ డిజిటల్ డ్రైవర్ డిస్‌ప్లే, డ్యూయల్-జోన్ క్లైమేట్ కంట్రోల్, పనోరమిక్ సన్ రూఫ్ వంటివి అందించే అవకాశం ఉంది. ప్రయాణికుల భద్రత కోసం లెవెల్ 2 ఏడాస్, టైర్ ప్రెషర్ మానిటరింగ్ సిస్టమ్, ఆరు ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్ వంటి అధునాతన సేఫ్టీ ఫీచర్లు రానున్నాయి.

పవర్‌ట్రైన్, ఇంజిన్ ఆప్షన్స్

ఇంజన్ విషయానికి వస్తే ప్రస్తుత మోడల్‌లో అందుబాటులో ఉన్న పవర్‌ట్రైన్ ఆప్షన్లనే కొనసాగించే అవకాశం కనిపిస్తోంది. ఇందులో 1.2-లీటర్ టర్బో-పెట్రోల్, 1.5-లీటర్ డీజిల్, 1.2-లీటర్ టర్బో-పెట్రోల్ సీఎన్‌జీ ఇంజిన్ ఆప్షన్లు ఉండవచ్చు. ట్రాన్స్‌మిషన్ పరంగా 5-స్పీడ్ మాన్యువల్, 6-స్పీడ్ మాన్యువల్, 6-స్పీడ్ ఏఎంటీ అలాగే 7-స్పీడ్ డీసీటీ గేర్‌‌బాక్స్ ఆప్షన్లను అందించే ఛాన్స్ ఉంది. ధరలు, అధికారిక విడుదల తేదీపై త్వరలోనే పూర్తి స్పష్టత వచ్చే అవకాశం ఉంది.