Maruti Suzuki: లీటరుకు 34 కిమీ మైలేజ్.. 6 నెలల్లో లక్షకు పైగా కార్ల విక్రయాలతో మారుతి రికార్డు

Maruti Suzuki: భారతీయ ఆటోమొబైల్ విపణిలో మారుతి సుజుకీకి చెందిన ప్రముఖ ప్రీమియం హ్యాచ్‌బ్యాక్ బాలెనో తిరుగులేని ఆధిపత్యాన్ని చెలాయిస్తోంది. ఆర్థిక సంవత్సరం 2026-27 తొలి అర్థభాగంలో (ఏప్రిల్ నుంచి సెప్టెంబర్ వరకు) దేశంలోనే అత్యధికంగా అమ్ముడైన ప్రీమియం హ్యాచ్‌బ్యాక్ కారుగా ఇది నిలిచింది. ఈ ఆరు నెలల కాలంలో ఏకంగా 1,08,569 మంది కస్టమర్లు ఈ కారును కొనుగోలు చేసి తమ ఇళ్లకు తీసుకెళ్లడం విశేషం. భారత మార్కెట్లో ఈ కారు ఎక్స్-షోరూమ్ ధర రూ.5.99 లక్షల నుంచి ప్రారంభమై టాప్ వేరియంట్ రూ.9.99 లక్షల వరకు అందుబాటులో ఉంది.

50 శాతానికి పైగా నమోదైన వృద్ధి

గత ఆర్థిక సంవత్సరం ఇదే కాలంలో నమోదైన 71,989 యూనిట్ల విక్రయాలతో పోలిస్తే, ఈసారి బాలెనో అమ్మకాలలో ఏకంగా 50.81 శాతం భారీ వృద్ధి నమోదైంది. కొత్త అప్‌డేట్‌లతో కంపెనీ ఈ కారును మార్కెట్లోకి తీసుకురావడమే ఈ ఆదరణకు ప్రధాన కారణం. ఇంధన పొదుపు విషయంలో కూడా ఈ కారు సరికొత్త ప్రమాణాలు నెలకొల్పుతోంది. బాలెనో పెట్రోల్ వేరియంట్ లీటరుకు దాదాపు 25 కిలోమీటర్ల మైలేజ్ ఇస్తుండగా, సీఎన్‌జీ వేరియంట్ ఏకంగా కేజీకి 34 కిలోమీటర్ల మైలేజ్ ఇస్తూ కస్టమర్ల జేబులకు భారం తగ్గించడంలో ముందంజలో ఉంది.

పవర్ఫుల్ ఇంజిన్, కొత్త టెక్నాలజీ

కొత్త బాలెనో మోడల్‌లో 1.2-లీటర్ మూడు-సిలిండర్ల నేచురల్లీ ఆస్పిరేటెడ్ పెట్రోల్ ఇంజిన్‌ను అమర్చారు. మారుతి సుజుకీ తమ నూతన జనరేషన్ స్విఫ్ట్, డిజైర్ మోడళ్లలో కూడా ఇదే సమర్థవంతమైన ఇంజిన్‌ను ఉపయోగిస్తోంది. కారు కేబిన్ విషయానికి వస్తే కస్టమర్లకు అత్యుత్తమ సౌకర్యం కలిగించేలా వైర్‌లెస్ ఛార్జింగ్ ప్యాడ్, క్లారియాన్ ఆడియో సిస్టమ్, ముందరి సీట్లకు వెంటిలేషన్ సదుపాయం వంటి ఆధునిక హంగులను జోడించారు. ఇవి ప్రయాణాన్ని మరింత సుఖవంతంగా మారుస్తాయి.

ప్రథమ స్థానంలో నిలిచే లేటెస్ట్ సేఫ్టీ ఫీచర్లు

రక్షణ విభాగంలో బాలెనో సరికొత్త అధ్యాయాన్ని సృష్టించింది. ఈ సెగ్మెంట్‌లోనే తొలిసారిగా లెవెల్-2 అడాస్ అడ్వాన్స్‌డ్ డ్రైవర్ అసిస్టెన్స్ సిస్టమ్‌ను ప్రవేశపెట్టారు. ఇందులో అడాప్టివ్ క్రూయిజ్ కంట్రోల్, లేన్-కీప్ అసిస్ట్, ఆటోమేటిక్ ఎమర్జెన్సీ బ్రేకింగ్ వంటి బెస్ట్ సేఫ్టీ ఫీచర్లు ఉన్నాయి. వీటితో పాటు అన్ని వేరియంట్లలో 6 ఎయిర్‌బ్యాగ్‌లను స్టాండర్డ్‌గా అందించడంతో పాటు ఈబీడీతో కూడిన ఏబీఎస్, టైర్ ప్రెజర్ మానిటరింగ్ సిస్టమ్ (TPMS), హిల్-హోల్డ్ అసిస్ట్ వంటి ఫీచర్లు డ్రైవింగ్‌ను అత్యంత సురక్షితంగా మారుస్తున్నాయి.