Mahindra: పండుగ వేళ కస్టమర్లకు షాక్ ఇచ్చిన మహీంద్రా

Mahindra: దేశీయ ఆటోమొబైల్ మార్కెట్లో భారీ డిమాండ్ ఉన్న ప్రముఖ ఎస్‌యూవీలలో మహీంద్రా ఎక్స్ యూవీ 7ఎక్స్ఓ ముందుంటుంది. అయితే పండుగ సీజన్ సమీపిస్తున్న తరుణంలో ఈ వాహన కొనుగోలుదారులకు ఆ కంపెనీ కాస్త నిరాశ కలిగించింది. కొన్ని నిర్దిష్ట వేరియంట్ల ధరలను పెంచుతూ నిర్ణయం తీసుకుంది. ఎంచుకున్న కొన్ని టూ-వీల్ డ్రైవ్ పెట్రోల్ అలాగే డీజిల్ మోడళ్లపై ఈ రేట్ల పెంపు వర్తించనుంది. మోడల్‌ను బట్టి ధరలలో సుమారు రూ.7 వేల నుంచి రూ.20వేల వరకు అదనపు భారం పడనుంది.

ఏయే వేరియంట్లపై ధరల ప్రభావం పడింది?

కంపెనీ అన్ని మోడళ్ల ధరలను పెంచలేదు. కేవలం ఏఎక్స్3, ఏఎక్స్5, ఏఎక్స్7 అలాగే ఏఎక్స్7టీ వంటి మిడ్ రేంజ్, టాప్-ఎండ్ వేరియంట్లపై మాత్రమే ఈ పెంపు అమలు చేశారు. ముఖ్యంగా ఏఎక్స్7 డీజిల్ మాన్యువల్ వేరియంట్ మీద అత్యధికంగా ఇరవై వేల రూపాయల వరకు పెరిగింది. దీంతో ఈ నిర్దిష్ట మోడల్ కొత్త ఎక్స్ షోరూమ్ ధర రూ.19లక్షలకు చేరుకుంది. బేస్ మోడల్స్ అలాగే అత్యున్నత వేరియంట్ల ధరలలో మాత్రం ఎలాంటి మార్పులు చేయలేదు. కాబట్టి మధ్యతరగతి కస్టమర్లు కొనుగోలు చేసే వేరియంట్లపై అదనపు ఖర్చు భరించాల్సి వస్తుంది.

ఇంజిన్ పవర్, మెకానికల్ ఫీచర్లలో నో ఛేంజ్

ధరలు పెరిగినప్పటికీ కంపెనీ ఈ ఎస్‌యూవీ పర్ఫామెన్స్ లో ఎలాంటి మార్పులు చేయలేదు. పాత ఇంజిన్ ఆప్షన్లే యథావిధిగా కొనసాగుతున్నాయి. ఇందులో లభించే రెండు లీటర్ల టర్బో పెట్రోల్ ఇంజిన్ సుమారు 200 హార్స్‌పవర్ శక్తిని, 380 Nm టార్క్‌ను ఉత్పత్తి చేస్తుంది. అలాగే 2.2 లీటర్ల డీజిల్ ఇంజిన్ 182 హార్స్‌పవర్ శక్తిని, 450 ఎన్ఎం టార్క్‌ను అందిస్తుంది. కస్టమర్ల సౌలభ్యం కోసం మాన్యువల్ అలాగే ఆటోమేటిక్ గేర్‌బాక్స్ ఆప్షన్లు పాత మోడళ్ల మాదిరిగానే అందుబాటులో ఉంచారు.

మోడ్రన్ ఫీచర్లు

ఫీచర్ల పరంగా ఈ ఎస్‌యూవీలో ఎలాంటి కోత విధించలేదు. మునుపటి లాగే విశాలమైన ఇంటీరియర్, పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, అధునాతన డ్రైవర్ అసిస్టెన్స్ సిస్టమ్ (ADAS) తదితర భద్రతా హంగులు లభిస్తాయి. లాంగ్ డ్రైవ్‌లలో అద్భుతమైన సౌకర్యం అందించే ఈ వాహనాన్ని కొనుగోలు చేయాలని భావించే వారు ముందుగా సమీపంలోని షోరూమ్‌లను సంప్రదించి సవరించిన ధరల గురించి తెలుసుకోవడం మంచిది. నిర్ణీత బడ్జెట్‌తో ప్లాన్ చేసుకునే వారికి ఈ ధరల సవరణ కొద్దిగా ప్రభావం చూపవచ్చు.