Hyundai: మార్కెట్‌ను షేక్ చేయడానికి వస్తున్న హ్యుందాయ్ మూడు కొత్త ఎస్‌యూవీలు

Hyundai: భారతీయ ఆటోమొబైల్ మార్కెట్లో తన దూకుడును మరింత పెంచేందుకు ప్రముఖ కార్ల తయారీ సంస్థ హ్యుందాయ్ సిద్ధమైంది. ఇందులో భాగంగా దేశీయ మార్కెట్లోకి ఏకకాలంలో మూడు సరికొత్త పవర్ఫుల్ ఎస్‌యూవీలను తీసుకువచ్చేందుకు సన్నాహాలు చేస్తోంది. ఈ అప్‌కమింగ్ ఎస్యూవీ జాబితాలో హ్యుందాయ్ బేయాన్, ఒక కొత్త కాంపాక్ట్ ఎలక్ట్రిక్ ఎస్‌యూవీ అలాగే నూతన జెన్ క్రెటా ఉన్నాయి. ఆకర్షణీయమైన డిజైన్, అత్యాధునిక ఫీచర్లు అలాగే పవర్ఫుల్ ఇంజిన్ ఆప్షన్లతో ఈ కార్లు రానున్నాయి.

హ్యుందాయ్ బేయాన్ ప్రత్యేకతలు

భారత మార్కెట్ కోసం ప్రత్యేకంగా రూపొందించిన హ్యుందాయ్ బేయాన్ ఎస్‌యూవీకి సంబంధించి ఇప్పటికే బుకింగ్స్ కూడా మొదలయ్యాయి. కేవలం రూ.10,000 టోకెన్ అమౌంట్‌తో ఈ కారును బుక్ చేసుకోవచ్చు. గ్లోబల్ కే-ఎన్‌హాన్స్‌డ్ ప్లాట్‌ఫారమ్‌పై తయారవుతున్న ఈ వాహనంలో ఆర్ట్ ఆఫ్ స్టీల్ డిజైన్ లాంగ్వేజ్ కనిపిస్తుంది. ఇందులో ఇన్-బిల్ట్ జనరేటివ్ ఏఐ వాయస్ అసిస్టెంట్ ప్రత్యేక ఆకర్షణగా నిలవనుంది. పెట్రోల్ ఇంజిన్‌తో పాటు ఫ్యాక్టరీ ఫిట్టెడ్ సీఎన్‌జీ ఆప్షన్ కూడా ఉండే అవకాశం ఉంది.

కొత్త కాంపాక్ట్ ఎలక్ట్రిక్ ఎస్యూవీ

పెరిగిపోతున్న ఎలక్ట్రిక్ వాహనాల డిమాండ్‌ను దృష్టిలో ఉంచుకుని హ్యుందాయ్ 4 మీటర్ల కంటే తక్కువ పొడవున్న సరికొత్త ఈవీని తీసుకువస్తోంది. టాటా నెక్సాన్ ఈవీ అలాగే మహీంద్రా xuv 3x0 ఈవీలకు ఇది గట్టి పోటీ ఇవ్వనుంది. ఈ ఎలక్ట్రిక్ కారులో హ్యుందాయ్ ప్లియోస్ కనెక్ట్ సెంటర్ స్క్రీన్ సిస్టమ్‌ను అమర్చనున్నారు. ఎక్కువ దూరం ప్రయాణించేందుకు వీలుగా హై-డెన్సిటీ ఎన్ఎంసీ బ్యాటరీ ప్యాక్‌ను ఇందులో అందించనున్నారు.

నూతన జెనరేషన్ హ్యుందాయ్ క్రెటా

హ్యుందాయ్ అత్యంత విజయవంతమైన క్రెటా ఎస్‌యూవీలో నూతన జెనరేషన్ మోడల్‌ను తీసుకువచ్చేందుకు కసరత్తు జరుగుతోంది. సరికొత్త k3 ప్లాట్‌ఫారమ్‌పై రూపుదిద్దుకుంటున్న ఈ కారులో పెద్ద ఫ్లోటింగ్ టచ్‌స్క్రీన్, పనోరమిక్ సన్‌రూఫ్, వెంటిలేటెడ్ సీట్లు వంటి లగ్జరీ ఫీచర్లు ఉంటాయి. ప్రస్తుత పెట్రోల్, డీజిల్ ఇంజిన్‌లతో పాటు కొత్త హైబ్రిడ్ పవర్‌ట్రెయిన్ ఆప్షన్‌ను కూడా ఇందులో పరిచయం చేయనున్నారు. ఈ సరికొత్త కార్ల రాకతో ఆటో మార్కెట్లో పోటీ మరింత తీవ్రం కానుంది.

రాబోయే ఆటోమొబైల్ మార్కెట్ ట్రెండ్

భవిష్యత్తులో కస్టమర్ల అవసరాలకు తగినట్లుగా కార్ల తయారీ కంపెనీలు టెక్నాలజీని మారుస్తున్నాయి. భద్రతా ప్రమాణాలు మెరుగుపరచడంతో పాటు మైలేజ్ అందించడంలో హ్యుందాయ్ ఎప్పుడూ ముందుంటుంది. ఈ కొత్త కార్ల లాంచ్‌తో కంపెనీ అమ్మకాలు మరింత పుంజుకునే అవకాశం ఉంది. రాబోయే పండుగ సీజన్లో ఈ వాహనాల ధరలు అధికారికంగా వెల్లడయ్యే ఛాన్స్ ఉంది.