Honda: హోండా నుంచి సరికొత్త ఎలక్ట్రిక్ ఎస్‌యూవీ.. డిసెంబర్ 2న మార్కెట్లోకి గ్రాండ్ ఎంట్రీ

Honda: భారతీయ ఆటోమొబైల్ మార్కెట్లో ఎలక్ట్రిక్ వాహనాల హవా రోజురోజుకు పెరుగుతోంది. ఈ క్రమంలో ప్రముఖ కార్ల తయారీ సంస్థ హోండా ఇండియన్ మార్కెట్లోకి తన మొదటి ఎలక్ట్రిక్ ఎస్‌యూవీని తీసుకురావడానికి భారీ సన్నాహాలు చేస్తోంది. జీరో ఆల్ఫా పేరుతో రానున్న ఈ సరికొత్త ఎలక్ట్రిక్ ఎస్‌యూవీని డిసెంబర్ 2, 2026 న అధికారికంగా లాంచ్ చేయనున్నట్లు కంపెనీ స్పష్టం చేసింది. హ్యుందాయ్ క్రెటా ఎలక్ట్రిక్ వంటి పాపులర్ కార్లకు ఇది గట్టి పోటీ ఇవ్వనుంది.

భారత్‌లోనే తయారీ

హోండా ఈ కొత్త ఎలక్ట్రిక్ ఎస్‌యూవీని భారత్‌లోనే పూర్తిగా తయారు చేయనుంది. రాజస్థాన్‌లోని ప్లాంట్‌లో తయారయ్యే ఈ వాహనాలను దేశీయ మార్కెట్లోనే కాకుండా ఇతర దేశాలకు కూడా ఎక్స్‌పోర్ట్ చేయాలని కంపెనీ భావిస్తోంది. ఈ ఏడాది మార్చి నుంచి దేశవ్యాప్తంగా వివిధ ప్రాంతాల్లో హైవేలు, సిటీ ట్రాఫిక్, చెత్త రోడ్లపై దీనికి సంబంధించిన కఠినమైన టెస్టింగ్ నిర్వహిస్తున్నారు. ఎండ, వర్షం వంటి అన్ని వాతావరణ పరిస్థితులలోనూ ఈ కారు పనితీరు అద్భుతంగా ఉండేలా పరీక్షించారు.

బాక్సీ డిజైన్, విశాలమైన కేబిన్

ఇంటర్నేషనల్ మోడల్ కాన్సెప్ట్ మాదిరిగానే ఈ ఎస్‌యూవీ బాక్సీ డిజైన్‌తో రానుంది. అప్‌రైట్ బాడీ డిజైన్, క్లోజ్డ్ ఫ్రంట్ గ్రిల్, చతురస్రాకారపు వీల్ ఆర్చ్‌లు దీనికి స్పోర్టివ్ లుక్‌ను ఇస్తున్నాయి. ఎత్తైన రూఫ్‌లైన్ కారణంగా కారు లోపల ప్రయాణికులకు తగినంత హెడ్‌రూమ్, లెగ్‌రూమ్ లభిస్తాయి. వెనుక వైపు పెద్ద విండ్‌స్క్రీన్, రూఫ్ మౌంటెడ్ స్పాయిలర్ దీనిని మరింత ఆకర్షణీయంగా మారుస్తున్నాయి.

అడ్వాన్స్‌డ్ టెక్నాలజీ, పెద్ద టచ్‌స్క్రీన్

జీరో ఆల్ఫా ఇంటీరియర్ విషయానికి వస్తే, ఇందులో ల్యాండ్‌స్కేప్ స్టైల్‌లో ఉండే పెద్ద సెంట్రల్ టచ్‌స్క్రీన్ ఇన్ఫోటైన్‌మెంట్ సిస్టమ్ ఇవ్వనున్నారు. దీనితో పాటు ప్రత్యేక డిజిటల్ ఇన్‌స్ట్రుమెంట్ క్లస్టర్, మల్టీఫంక్షన్ స్టీరింగ్ వీల్ వంటి ఆధునిక ఫీచర్లు ఉంటాయని అంచనా వేస్తున్నారు. డ్యాష్‌బోర్డ్ డిజైన్ చాలా క్లీన్‌గా ఉండి ఆధునిక లుక్‌ను అందిస్తుంది.

మార్కెట్లో ప్రధాన పోటీదారులు

ఈ కొత్త ఎలక్ట్రిక్ ఎస్‌యూవీకి సంబంధించిన బ్యాటరీ సామర్థ్యం, మోటార్ పవర్, రేంజ్, ధర వంటి వివరాలను కంపెనీ ఇంకా అధికారికంగా వెల్లడించలేదు. అయితే భారత మార్కెట్లో లాంచ్ అయిన తర్వాత ఇది హ్యుందాయ్ క్రెటా ఎలక్ట్రిక్, టాటా సియెర్రా ఈవీ, మహీంద్రా బీఈ 6 వంటి పవర్ ఫుల్ ఎలక్ట్రిక్ ఎస్‌యూవీలతో తలపడనుంది.