Mahindra Bolero: సరికొత్త అవతారంలో మహీంద్రా బొలేరో బోల్డ్ ఎడిషన్

Mahindra Bolero: భారత ఆటోమొబైల్ మార్కెట్లో సుదీర్ఘ కాలంగా అత్యంత ప్రజాదరణ పొందిన మహీంద్రా బొలేరో సరికొత్త రూపంలో కొనుగోలుదారుల ముందుకు వచ్చింది. కంపెనీ తాజాగా 2026 బొలేరో బోల్డ్ ఎడిషన్‌ను అధికారికంగా విడుదల చేసింది. ఎస్‍యూవీ రఫ్ అండ్ టఫ్ లుక్‌ను మరింత పెంచేలా ఇందులో పలు కాస్మోటిక్ మార్పులు చేశారు. ప్రామాణిక మోడల్‌కు అదనపు ఆకర్షణ జోడించేలా ప్రత్యేకంగా డిజైన్ చేసిన ఈ యాక్సెసరీ ప్యాక్ ద్వారా వెహికల్ లవర్లను కంపెనీ అమితంగా ఆకట్టుకుంటోంది.

కొత్తగా వచ్చిన బొలేరో బోల్డ్ ఎడిషన్‌లో ప్రధాన ఆకర్షణ దీని ఫ్రంట్ గ్రిల్‌పై ఉన్న బ్రాంజ్ ఇన్సర్ట్‌లు. అంతేకాకుండా ఫాగ్ లాంప్‌ల చుట్టూ బ్రాంజ్ ఫినిషింగ్, బ్లాక్ అండ్ బ్రాంజ్ డ్యూయల్ టోన్ సైడ్ క్లాడింగ్ ఇచ్చారు. బ్రాంజ్ టచ్ ఉన్న రూఫ్ రయిల్స్, ఆకర్షణీయమైన 15 అంగుళాల అల్లాయ్ వీల్స్ ఈ వాహనానికి ప్రీమియం లుక్‌ను అందిస్తున్నాయి. ORVMలపై ప్రత్యేక బ్రాంజ్ అప్లిక్, బోల్డ్ ఎడిషన్ బ్యాడ్జింగ్ ఈ ఎస్‍యూవీకి రోడ్డుపై ప్రత్యేక గుర్తింపును తెచ్చిపెడతాయి.

క్యాబిన్ లోపలి భాగాన్ని పరిశీలిస్తే.. నలుపు, బ్రాంజ్ రంగుల కాంబినేషన్‌లో డ్యూయల్-టోన్ లెథరెట్ సీట్ అప్‌హోల్‌స్టరీని అమర్చారు. డ్రైవింగ్ అనుభవాన్ని సులభతరం చేసేందుకు 7-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, మ్యాన్యువల్ ఏసీ, స్టీరింగ్ మౌంటెడ్ కంట్రోల్స్, టైప్-సి ఛార్జింగ్ పోర్ట్ వంటి ఫీచర్లు ఉన్నాయి. సేఫ్టీ పరంగా డ్యూయల్ ఎయిర్‌బ్యాగ్‌లు, ఏబీఎస్, రివర్స్ పార్కింగ్ సెన్సార్లు, రియర్ వ్యూ కెమెరా, సీట్‌బెల్ట్ రిమైండర్ లాంటి ముఖ్యమైన భద్రతా ఫీచర్లు ఇందులో లభిస్తున్నాయి.

ఈ కొత్త ఎడిషన్‌లో ఇంజిన్ పరంగా ఎలాంటి మార్పులు చేయలేదు. ఇందులో విశ్వసనీయమైన 1.5-లీటర్ డీజిల్ ఇంజిన్‌ను యథావిధిగా కొనసాగించారు. ఇది 76 PS పవర్, 210 Nm టార్క్‌ను ఉత్పత్తి చేస్తుంది. దీనికి 5-స్పీడ్ మ్యాన్యువల్ గేర్‌బాక్స్, రియర్-వీల్ డ్రైవ్ (RWD) సెటప్ అందించారు. సాధారణ బొలేరో ఎక్స్-షోరూమ్ ధర రూ.8.57 లక్షల నుంచి రూ.9.99 లక్షల మధ్య ఉండగా, ఈ బోల్డ్ ఎడిషన్ ప్యాకేజ్ ధర కోసం సమీప మహీంద్రా డీలర్‌షిప్‌ను సంప్రదించాల్సి ఉంటుంది. మునుపటి కంటే మరింత రఫ్‌గా ఉన్న ఈ లుక్ బొలేరో అభిమానులను విశేషంగా ఆకట్టుకుంటోంది.