YSRCP: రోజా పట్టున్న చోట వైఎస్సార్‌సీపీ సత్తా.. 11 వార్డుల్లో గెలుపు.!

YSRCP: చిత్తూరు జిల్లా పరిధిలోని నగరి, పుత్తూరు మున్సిపాలిటీల్లో ఇటీవల జరిగిన ఎన్నికల ఫలితాల్లో వైఎస్సార్‌సీపీ అభ్యర్థులు ఘన విజయం సాధించారు. స్థానిక పోరులో అధికార కూటమి సవాళ్లను తట్టుకుని పలు వార్డులను తమ ఖాతాలో వేసుకున్నారు. నగరి మున్సిపాలిటీ పరిధిలో మొత్తం 7 వార్డులను వైఎస్సార్‌సీపీ కైవసం చేసుకోగా, పుత్తూరు మున్సిపాలిటీలో 4 వార్డుల్లో ఆ పార్టీ అభ్యర్థులు జయకేతనం ఎగురవేశారు. నగరిలోని 3, 15, 18, 23, 26, 28, 38 వార్డులతో పాటు పుత్తూరులోని 4, 27, 29, 36 వార్డుల్లో వైఎస్సార్‌సీపీ అభ్యర్థులు విజయదుందుభి మోగించారు. విజయం సాధించిన అనంతరం అభ్యర్థులందరూ మాజీ మంత్రి ఆర్‌కే రోజాను మర్యాదపూర్వకంగా కలవగా, ఆమె వారికి శుభాకాంక్షలు తెలిపారు.

కూటమి అక్రమాలను తట్టుకుని విజయం.. రోజా ఘాటు విమర్శలు

ఈ సందర్భంగా విజేతలతో కలిసి మాట్లాడిన మాజీ మంత్రి రోజా కూటమి ప్రభుత్వంపై తీవ్రస్థాయిలో ధ్వజమెత్తారు. నామినేషన్ల ఘట్టం నుంచి ఎన్నికల ప్రక్రియ ముగిసేవరకు కూటమి నాయకులు రౌడీయిజం, గూండాయిజంతో వైఎస్సార్‌సీపీ అభ్యర్థులను భయభ్రాంతులకు గురిచేసే ప్రయత్నం చేశారని ఆరోపించారు. మూడు అధికార పార్టీలు ఏకమై తమపై పోటీ చేసినప్పటికీ, వైఎస్సార్‌సీపీ అభ్యర్థులు ప్రజల మద్దతుతో భారీ మెజార్టీలతో గెలవడం పార్టీ బలానికి నిదర్శనమని హర్షం వ్యక్తం చేశారు.

రాష్ట్రంలో ప్రజాస్వామ్య బద్ధంగా కాకుండా 'రెడ్‌బుక్ రాజ్యాంగం' నడుస్తోందని ఆమె తీవ్రంగా మండిపడ్డారు. పోలీసులు, ప్రభుత్వాధికారులను అడ్డుపెట్టుకుని కూటమి నాయకులు తాత్కాలిక విజయాలు సాధిస్తున్నారని విమర్శించారు. ప్రభుత్వం ఎన్ని ఇబ్బందులు పెట్టినా వైఎస్సార్‌సీపీ ఓటు బ్యాంకు ఏమాత్రం చెక్కుచెదరలేదని ఈ ఫలితాలు నిరూపించాయన్నారు. రాబోయే 2029 ఎన్నికల్లో ఇలాంటి రౌడీ రాజకీయాలకు ప్రజలు ఓటు అనే ఆయుధంతో సరైన బుద్ధి చెప్పడం ఖాయమని రోజా ధీమా వ్యక్తం చేశారు.