Weather Update: బంగాళాఖాతంలో బలపడుతున్న అల్పపీడనం.. తెలుగు రాష్ట్రాలకు భారీ వర్షాల హెచ్చరిక

Weather Update: తెలుగు రాష్ట్రాల్లో వాతావరణం ఒక్కసారిగా మారిపోయింది. బంగాళాఖాతంలో ఏర్పడిన అల్పపీడనం క్రమంగా బలపడుతూ తీవ్ర వాయుగుండంగా మారుతుండటంతో రెండు తెలుగు రాష్ట్రాలలో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఉత్తర అండమాన్ సముద్రం అలాగే దానికి ఆనుకుని ఉన్న తూర్పు మధ్య బంగాళాఖాతంలో ఏర్పడిన ఈ అల్పపీడనం పశ్చిమ-వాయువ్య దిశగా కదులుతోంది. ఇది రాబోయే కొద్ది గంటల్లో మరింత బలపడి తీవ్ర వాయుగుండంగా మారి, ఆ తర్వాత దక్షిణ ఒడిశా - ఉత్తరాంధ్ర తీరాల సమీపంలోని సముద్ర ప్రాంతానికి చేరుకునే అవకాశం ఉందని అధికారులు స్పష్టం చేశారు. ఈ అనూహ్య వాతావరణ మార్పుల కారణంగా రెండు రాష్ట్రాల్లోని పలు జిల్లాల్లో రాబోయే మూడు రోజుల పాటు వానలు దంచికొట్టనున్నాయి.

ఈ తీవ్ర వాయుగుండం ప్రభావం కారణంగా ఆంధ్రప్రదేశ్ రాష్ట్రంలోని పలు జిల్లాలలో భారీ నుంచి అతి భారీ వర్షాలు పడే అవకాశం ఉందని రాష్ట్ర విపత్తుల నిర్వహణ సంస్థ హెచ్చరించింది. ముఖ్యంగా కోస్తాంధ్ర తీరం వెంబడి గంటకు యాభై నుంచి అరవై కిలోమీటర్ల వేగంతో బలమైన ఈదురుగాలులు వీచే అవకాశం ఉంది. సోమవారం అల్లూరి సీతారామరాజు, పోలవరం, నంద్యాల అలాగే కడప జిల్లాలలో అక్కడక్కడ పిడుగులతో కూడిన మోస్తరు వర్షాలు కురిసే ఛాన్స్ ఉంది. మిగతా జిల్లాలలో కూడా తేలికపాటి నుంచి మోస్తరు వానలు పడే సూచనలు కనిపిస్తున్నాయి. బుధ అలాగే గురువారాల్లో కొన్ని ప్రాంతాలలో భారీ వర్షాలు పడే అవకాశం ఉండటంతో యంత్రాంగం అప్రమత్తమైంది.

మరోవైపు తెలంగాణ రాష్ట్రంలో కూడా వాతావరణ శాఖ ఇదే రకమైన హెచ్చరికలను జారీ చేసింది. రాష్ట్రంలోని పలు ప్రాంతాలలో రాబోయే మూడు రోజుల పాటు ఉరుములు, మెరుపులతో కూడిన వర్షాలు కురిసే అవకాశం ఉంది. కొన్ని చోట్ల ఈదురుగాలుల తీవ్రత ఎక్కువగా ఉండే అవకాశం ఉన్నందున ప్రజలు అత్యవసరమైతే తప్ప బయటకు రావద్దని అధికారులు సూచించారు. లోతట్టు ప్రాంతాలలో నివసించే ప్రజలు ముందస్తు జాగ్రత్తలు తీసుకోవాలని, వర్షాల వల్ల ఎక్కడైనా నీరు నిలిచే అవకాశం ఉంటే వెంటనే సురక్షిత ప్రాంతాలకు వెళ్లాలని హెచ్చరికలు జారీ చేశారు.

సముద్రం తీవ్రంగా అల్లకల్లోలంగా మారే అవకాశం ఉన్నందున మత్స్యకారులు ఎవరూ కూడా వేటకు వెళ్లరాదని వాతావరణ కేంద్రం గట్టిగా హెచ్చరించింది. ఇప్పటికే సముద్రంలో వేటకు వెళ్లిన మత్స్యకారులు అందరూ వెంటనే సురక్షితంగా తీరానికి చేరుకోవాలని విజ్ఞప్తి చేశారు. ప్రభుత్వ అధికార యంత్రాంగం పరిస్థితిని ఎప్పటికప్పుడు సమీక్షిస్తూ తగిన సహాయక చర్యలకు సిద్ధంగా ఉంది. ప్రజలు వాతావరణ శాఖ సూచనలను పాటిస్తూ అప్రమత్తంగా ఉండాలని అధికారులు కోరారు.