Road Accident: టీ తాగుతుండగా దూసుకొచ్చిన స్కార్పియో.. నలుగురు భవానీ భక్తులు మృతి

Road Accident: కాకినాడ జిల్లా శంఖవరం మండలం పరిధిలోని కత్తిపూడి జాతీయ రహదారిపై తెల్లవారుజామున అత్యంత ఘోరమైన రోడ్డు ప్రమాదం చోటుచేసుకుంది. విజయనగరం జిల్లా డెంకాడ ప్రాంతం నుంచి విజయవాడ కనకదుర్గమ్మ దర్శనం కోసం బయలుదేరిన భవానీ భక్తులను మృత్యువు రూపంలో వచ్చిన ఒక కారు బలంగా ఢీకొట్టింది. కత్తిపూడి రావికంపాడు జంక్షన్ సమీపంలో జరిగిన ఈ ప్రమాదంలో నలుగురు భవానీ మాలధారులు అక్కడికక్కడే దుర్మరణం పాలయ్యారు. తీవ్రంగా గాయపడిన మరో ఇద్దరి పరిస్థితి విషమంగా ఉన్నట్లు తెలుస్తోంది.

టీ తాగేందుకు కిందకు దిగిన భక్తులు

విజయనగరం నుంచి భక్తులతో బయలుదేరిన ప్రైవేట్ బస్సు మార్గమధ్యంలో సత్తిబాబు పలావ్ సెంటర్ వద్దకు చేరుకోగానే హఠాత్తుగా బ్రేక్‌డౌన్ అయింది. సాంకేతిక లోపంతో బస్సు ఆగిపోవడంతో ప్రయాణికులంతా కాసేపు విశ్రాంతి తీసుకునేందుకు కిందకు దిగారు. చుట్టుపక్కల ఉన్న దుకాణం వద్ద టీ తాగేందుకు నడుచుకుంటూ రోడ్డు పక్కగా వెళ్తున్న సమయంలో వెనుక నుంచి అతివేగంగా వచ్చిన స్కార్పియో వాహనం వారిపైకి దూసుకెళ్లింది. కనీసం బ్రేక్ కూడా వేయకుండా వేగంగా ఢీకొట్టడంతో భక్తులు చెల్లాచెదురుగా పడిపోయారు.

కన్నీరుమున్నీరవుతున్న బాధితులు

ఈ ప్రమాదంలో సిరిగిడి ఎర్రయ్య (35), తంలింగాల సీతారాం (36), తాటిపూడి వరప్రసాద్ (36), బోనుల రమణ (52) అనే నలుగురు భక్తులు ప్రాణాలు కోల్పోయారు. అమ్మవారిని దర్శించుకుని ఇళ్లకు తిరిగొస్తారనుకున్న వ్యక్తులు ఇలా శవాలుగా మారడంతో వారి స్వగ్రామాల్లో తీవ్ర శోకసంద్రం నెలకొంది. తోటి భక్తులు, బంధువులు ఘటనా స్థలంలో భోరున విలపిస్తున్నారు. సమాచారం అందుకున్న వెంటనే పోలీసులు అక్కడికి చేరుకుని స్థానికుల సాయంతో సహాయక చర్యలు ప్రారంభించారు.

క్షతగాత్రులను ఆసుపత్రికి తరలింపు

ప్రమాదంలో తీవ్రంగా గాయపడిన ఇద్దరు భక్తులను వెంటనే సమీపంలోని ప్రభుత్వ ఆసుపత్రికి అత్యవసర చికిత్స కోసం తరలించారు. కారు డ్రైవర్ నిద్రమత్తులో ఉన్నాడా లేక అతివేగమే ఈ ప్రమాదానికి కారణమా అనే కోణంలో పోలీసులు విచారణ జరుపుతున్నారు. వాహనాన్ని స్వాధీనం చేసుకున్న అధికారులు కేసు నమోదు చేసి దర్యాప్తు వేగవంతం చేశారు. జాతీయ రహదారులపై అర్ధరాత్రి వేళల్లో ప్రయాణించే వాహనదారులు వేగ పరిమితి పాటించాలని, అలసటగా ఉంటే వాహనాలు నపొద్దని పోలీసులు స్పష్టం చేస్తున్నారు.