Weather Update: తెలుగు రాష్ట్రాలకు ముంచుకొస్తున్న తుఫాన్ ముప్పు.. భారీ నుంచి అతి భారీ వర్షాలు

Weather Update: బంగాళాఖాతంలో ఏర్పడిన వాయుగుండం రానున్న 24 గంటల్లో మరింత తీవ్ర వాయుగుండంగా బలపడే అవకాశం ఉందని భారత వాతావరణ శాఖ హెచ్చరించింది. మధ్య బంగాళాఖాతంలో కేంద్రీకృతమైన ఈ వాయుగుండం పశ్చిమ-వాయువ్య దిశగా కదులుతూ క్రమంగా బలపడుతోంది. ఇది తుఫాను రూపం దాల్చితే దీనికి ఆర్నాబ్ అని నామకరణం చేసే అవకాశం ఉందని నిపుణులు పేర్కొంటున్నారు. దీని ప్రభావం క్రమంగా తూర్పు తీర ప్రాంతాలపై తీవ్రంగా పడుతుండటంతో వాతావరణ శాఖ అధికారులు ఎప్పటికప్పుడు పరిస్థితిని సమీక్షిస్తున్నారు.

తీరం దాటే సమయం, ప్రాంతం

తాజా వెదర్ రిపోర్ట్ ప్రకారం.. ఈ వాయుగుండం బుధవారం రాత్రి లేదా గురువారం తెల్లవారుజామున విశాఖపట్నం – గోపాల్‌పూర్ మధ్య ఉత్తర ఆంధ్రప్రదేశ్ - దక్షిణ ఒడిశా తీరాన్ని దాటే అవకాశం ఉందని రాష్ట్ర విపత్తు నిర్వహణ అథారిటీ (APSDMA) వెల్లడించింది. ఈ వ్యవస్థ తీరాన్ని దాటే సమయంలో తీర ప్రాంతాల్లో గంటకు 50 నుంచి 60 కిలోమీటర్ల వేగంతో ఈదురుగాలులు వీచే ప్రమాదం ఉంది. సముద్రం చాలా అశాంతిగా, అలజడిగా ఉంటుందని హెచ్చరించిన అధికారులు, మత్స్యకారులు ఎవరూ కూడా సముద్రంలోకి వేటకు వెళ్లకూడదని కఠిన ఆదేశాలు జారీ చేశారు.

తెలుగు రాష్ట్రాల్లో భారీ వర్షాల ప్రభావం

ఈ తీవ్ర వాయుగుండం ప్రభావం ఆంధ్రప్రదేశ్, తెలంగాణ రాష్ట్రాలపై తీవ్రంగా ఉండనుంది. రానున్న నాలుగు రోజుల పాటు రెండు తెలుగు రాష్ట్రాల్లోనూ మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. ముఖ్యంగా కోస్తాంధ్ర జిల్లాల్లో భారీ నుంచి అతి భారీ వర్షాలు పడే సూచనలున్నాయి. అలాగే తెలంగాణలోని పలు జిల్లాల్లో ఉరుములు, మెరుపులతో కూడిన ఈదురుగాలులు వీస్తాయని, కొన్ని ప్రాంతాల్లో భారీ వర్షాలు కురిసే అవకాశం ఉందని అంచనా వేశారు.

ప్రజలకు ముందస్తు హెచ్చరికలు

భారీ వర్షాల హెచ్చరికల నేపథ్యంలో లోతట్టు ప్రాంతాల ప్రజలు తీవ్ర అప్రమత్తంగా ఉండాలని అధికారులు సూచించారు. వర్షాల కారణంగా రోడ్లపై నీరు నిలిచిపోయే అవకాశం ఉన్నందున ప్రయాణాలు చేసేవారు తగిన జాగ్రత్తలు తీసుకోవాలి. ప్రభుత్వ యంత్రాంగం కూడా ఎటువంటి ప్రాణనష్టం జరగకుండా ముందస్తు చర్యలు చేపట్టింది. అత్యవసరమైతే తప్ప ప్రజలు బయటికి రావద్దని, పుకార్లను నమ్మకుండా అధికారిక వాతావరణ బులిటెన్‌లను మాత్రమే అనుసరించాలని విజ్ఞప్తి చేస్తున్నారు.