CM Chandrababu: బీసీలకు 40 శాతం టికెట్లు.. చంద్రబాబు కీలక ప్రకటన.!

CM Chandrababu: రానున్న స్థానిక సంస్థల ఎన్నికల్లో వెనుకబడిన వర్గాలకు పెద్దపీట వేయాలని తెలుగుదేశం పార్టీ నిర్ణయించింది. పార్టీ తరఫున పోటీ చేసే అభ్యర్థుల్లో బీసీలకు ఏకంగా 40 శాతం వరకు సీట్లు కేటాయించనున్నట్లు పార్టీ అధినేత, ముఖ్యమంత్రి నారా చంద్రబాబు నాయుడు కీలక ప్రకటన చేశారు. శనివారం పార్టీకి చెందిన సీనియర్ నాయకులు, ప్రజాప్రతినిధులతో నిర్వహించిన వర్చువల్ సమావేశంలో ఆయన ఈ దిశగా స్పష్టమైన మార్గనిర్దేశం చేశారు. రాబోయే స్థానిక పోరులో పార్టీ అభ్యర్థుల గెలుపే లక్ష్యంగా ప్రతి నాయకుడు పనిచేయాలని, ఈ ఎన్నికల ఫలితాల ఆధారంగానే నేతల పనితీరును అంచనా వేస్తామని ఆయన తేల్చిచెప్పారు. రాష్ట్ర జనాభాలో సగానికి పైగా ఉన్న బీసీల సంక్షేమం, వారి రాజకీయ సాధికారత పట్ల తమ ప్రభుత్వానికి సంపూర్ణ నిబద్ధత ఉందని పునరుద్ఘాటించారు.

గత పాలనలో బీసీలకు అన్యాయం.. ప్రజల్లోకి వెళ్లాలని పిలుపు

గత వైసీపీ ప్రభుత్వం బీసీల సంక్షేమాన్ని గాలికొదిలేసిందని చంద్రబాబు తీవ్రంగా మండిపడ్డారు. గత పాలకులు బీసీ రిజర్వేషన్లను 34 శాతం నుంచి 24 శాతానికి తగ్గించి ఆ వర్గాలకు తీరని ద్రోహం చేశారని ఆరోపించారు. స్థానిక ఎన్నికల్లో బీసీలకు రావాల్సిన రిజర్వేషన్లు దక్కకుండా అడ్డుకోవడానికి, ఎన్నికలను వాయిదా వేయడానికి గత ప్రభుత్వం ఏకంగా కోర్టులను ఆశ్రయించిందని విమర్శించారు. వైసీపీ హయాంలో బీసీలకు జరిగిన అన్యాయాన్ని, వారి హక్కులను హరించిన వైనాన్ని క్షేత్రస్థాయిలో ప్రజలకు వివరించాలని పార్టీ శ్రేణులకు పిలుపునిచ్చారు. అభ్యర్థుల ఎంపికలో గెలుపు అవకాశాలతో పాటు నిజాయతీ, సామాజిక సమతుల్యతకే తొలి ప్రాధాన్యత ఇస్తామని స్పష్టం చేశారు.

అభివృద్ధి పనులపై సమీక్ష.. పవన్ కల్యాణ్‌కు అభినందనలు

మరోవైపు విజయవాడలో జరగనున్న శరన్నవరాత్రి ఉత్సవాలు , నగర అభివృద్ధి ప్రణాళికలపై సీఎం చంద్రబాబు ఉన్నత స్థాయి సమీక్ష నిర్వహించారు. ఇంద్రకీలాద్రిపై జరిగే వేడుకలను అత్యంత వైభవంగా నిర్వహించాలని, విజయవాడ ఉత్సవ్ 2.0ను విజయవంతం చేయాలని దేవాదాయ, పర్యాటక శాఖల అధికారులను ఆదేశించారు. ఇదే సమయంలో గిరిజన ప్రాంతాల అభివృద్ధి కోసం ఉప ముఖ్యమంత్రి పవన్ కల్యాణ్ చేపట్టిన ‘అడవితల్లి బాట’ తొలి దశలో 1,976 కిలోమీటర్ల మేర రహదారుల నిర్మాణం దిగ్విజయంగా పూర్తి కావడం పట్ల ఆయనను ప్రత్యేకంగా అభినందించారు.

పేదలకు ఇళ్ల పట్టాలు.. ట్రిపుల్ ఇంజిన్ సర్కార్‌ లక్ష్యంగా ముందడుగు

రాష్ట్రవ్యాప్తంగా నిరుపేదలకు శాశ్వత ఇళ్ల పట్టాల పంపిణీ కార్యక్రమం నిరంతరం కొనసాగుతోందని చంద్రబాబు తెలిపారు. విజయవాడలోని జాఫర్ సాహెబ్ కాలువ ప్రాంత వాసులకు ఇళ్ల పట్టాలు అందజేయాలని నిర్ణయించామని, అలాగే రాబోయే సంక్రాంతి పండుగ కానుకగా నెల్లూరులో మరో 4,000 మందికి పట్టాలు పంపిణీ చేస్తామని వెల్లడించారు. ప్రస్తుతం కేంద్రంలో, రాష్ట్రంలో 'డబుల్ ఇంజిన్' ప్రభుత్వం కొనసాగుతోందని, రాబోయే స్థానిక ఎన్నికల్లో ఘనవిజయం సాధించి 'ట్రిపుల్ ఇంజిన్' సర్కార్‌ను ఏర్పాటు చేయడమే తమ ప్రధాన లక్ష్యమని ధీమా వ్యక్తం చేశారు. మిత్రపక్షాలైన టీడీపీ, జనసేన, బీజేపీ నాయకులు సమన్వయంతో పనిచేసి స్థానిక సంస్థల్లో జయభేరి మోగించాలని, ప్రజల ఆకాంక్షలకు అనుగుణంగా సంపన్న ఆంధ్రప్రదేశ్ నిర్మాణానికి కృషి చేయాలని పిలుపునిచ్చారు.