Botsa Anousha: భీమిలిలో డాక్టర్ బొత్స అనూష మార్క్ రాజకీయం

Botsa Anousha: రాజకీయాల్లో నాయకత్వ సమర్థత అనేది అధికారంలో ఉన్నప్పుడు మాత్రమే కాదు.. ఒకేసారి విపత్తులు, ఎన్నికల సవాళ్లు ఎదురైనప్పుడు బయటపడుతుంది. వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి విశాఖ జిల్లా కీలక తీరప్రాంత నియోజకవర్గమైన భీమిలికి సమన్వయకర్తగా డాక్టర్ బొత్స అనూషను ప్రకటించినప్పుడు ప్రత్యర్థులు, విమర్శకులు అనేక అనుమానాలు లేవనెత్తారు. కానీ, నేడు ఆమె క్షేత్రస్థాయిలో చూపుతున్న పరిణతి, బాధ్యతాయుతమైన పనితీరు ఆ విమర్శకుల నోళ్లు మూయిస్తోంది.

పార్టీ ఆదేశాలకు కట్టుబడి విజయనగరం జిల్లా బొండపల్లి జడ్పీటీసీ అభ్యర్థిగా ఎన్నికల బరిలోకి దిగిన అనూష, సరిహద్దులను లెక్కచేయకుండా గ్రామం గ్రామాన్నీ చుట్టేశారు. '24/7 వాట్సాప్ గ్రీవెన్స్' వంటి వినూత్న పాలనా హామీలతో గ్రామీణ ఓటర్లతో ఆత్మీయ అనుబంధాన్ని ఏర్పరచుకుని, అనుభవజ్ఞులైన నాయకులు సైతం ఆశ్చర్యపోయేలా ప్రచారంలో వేగం పెంచారు.

స్థానిక సంస్థల ప్రచారం పతాక స్థాయికి చేరిన కీలక సమయంలో ‘అర్నబ్’ తుపాను తీరాన్ని ముంచెత్తింది. చాలామంది నాయకులు ఎన్నికల ప్రచారాన్ని వదిలి రావడానికి వెనుకాడే తరుణంలో.. అనూష తక్షణమే భీమిలికి చేరుకున్నారు.

మత్స్యకార కాలనీలు, లోతట్టు ప్రాంతాల్లో స్వయంగా పర్యటించి "మీకు నేనున్నా.. పార్టీ అండగా ఉంటుంది" అని బాధితులకు మనోధైర్యాన్ని నూరిపోశారు.

బోట్లు, వలలు దెబ్బతినకుండా తీసుకోవాల్సిన జాగ్రత్తలపై సూచనలు ఇస్తూనే.. ఆహారం, మంచినీరు, వైద్య సదుపాయాలు అందేలా స్థానిక పార్టీ శ్రేణులను అప్రమత్తం చేశారు.

ఒకవైపు గెలుపే లక్ష్యంగా బొండపల్లిలో పట్టు సాధిస్తూనే, మరోవైపు భీమిలి ప్రజలకు ఆపద సమయంలో అండగా నిలబడటం ఆమెలోని నాయకత్వ పరిపక్వతకు నిదర్శనమని రాజకీయ విశ్లేషకులు అభిప్రాయపడుతున్నారు. పదవుల కంటే ప్రజా సేవకే ప్రాధాన్యమిస్తూ సాగుతున్న డాక్టర్ బొత్స అనూష సరికొత్త రాజకీయ శైలి భవిష్యత్తులో ఎలాంటి ఫలితాలనిస్తుందో కాలమే నిర్ణయించాలి!