AP ZPTC MPTC Election Results: పల్లె పోరులో కూటమి క్లీన్ స్వీప్: జడ్పీటీసీ, ఎంపీటీసీలలో ఫ్యాన్ గాలి ఖతం.. రికార్డు విజయం దిశగా టీడీపీ!

AP ZPTC MPTC Election Results: ఆంధ్రప్రదేశ్ పల్లె పోరు పరిషత్ (జడ్పీటీసీ, ఎంపీటీసీ) ఎన్నికల ఓట్ల లెక్కింపు ప్రక్రియలో కారంచేడు నుంచి కాకినాడ వరకు అధికార ఎన్డీయే కూటమి (టీడీపీ-జనసేన-బీజేపీ) అభ్యర్థులు ప్రభంజనం సృష్టిస్తున్నారు. శుక్రవారం నాటి పోలింగ్ అనంతరం నేడు ఉదయం ప్రారంభమైన ఓట్ల లెక్కింపులో తొలి రౌండ్ నుంచే కూటమి హవా స్పష్టంగా కనిపిస్తోంది.

రాష్ట్రవ్యాప్తంగా మొత్తం 659 జడ్పీటీసీ స్థానాలకు గాను ఇప్పటికే 170కి పైగా స్థానాల్లో, అలాగే 9,821 ఎంపీటీసీ స్థానాల్లో 2,000కు పైగా స్థానాల్లో కూటమి అభ్యర్థులు తమ సమీప ప్రత్యర్థులపై భారీ ఆధిక్యంలో దూసుకుపోతున్నారు. జిల్లా వారీగా ప్రతిష్టాత్మక స్థానాల ఫలితాలను పరిశీలిస్తే కూటమి విజయదుందుభి మోగిస్తోంది.

గుంటూరు జిల్లా జడవల్లి ఎంపీటీసీ స్థానంలో తెలుగుదేశం పార్టీ అభ్యర్థి 74 ఓట్ల వ్యత్యాసంతో సంచలన విజయం సాధించారు. అదేవిధంగా పార్వతీపురం మన్యం జిల్లా సాలూరు మండలం గంజాయిభద్ర ఎంపీటీసీ స్థానంలో టీడీపీ అభ్యర్థి చిరంజీవి ఘన విజయం సాధించగా, గుంటూరు జిల్లా తెనాలి మండలం హాఫ్‌పేట ఎంపీటీసీ స్థానాన్ని కూడా తెలుగుదేశం పార్టీ తన ఖాతాలో వేసుకుంది. వైఎస్‌ఆర్ కడప జిల్లా పెద్దముడియం మండలం సుద్దపల్లె ఎంపీటీసీ స్థానంలో టీడీపీ ఘన విజయం సాధించింది.

అందరి దృష్టి ఆకర్షించిన వైఎస్‌ఆర్ కడప జిల్లా పులివెందుల జడ్పీటీసీ స్థానంలో ఊహించని రీతిలో తెలుగుదేశం పార్టీ చారిత్రాత్మక విజయాన్ని నమోదు చేసింది. పులివెందులలో టీడీపీ అభ్యర్థి భారతి ఏకంగా 1,463 ఓట్ల భారీ మెజారిటీతో ప్రతిపక్ష వైఎస్‌ఆర్‌సీపీని చిత్తు చేస్తూ జయకేతనం ఎగురవేశారు.

వైఎస్‌ఆర్‌సీపీ కంచుకోటలుగా భావించిన రాయలసీమ మరియు కోస్తా జిల్లాల్లో సైతం ఫ్యాన్ గాలి పూర్తిగా తగ్గిపోయి, కూటమి వైపే ఓటర్లు పట్టంగట్టినట్లు కౌంటింగ్ సరళి స్పష్టం చేస్తోంది. ఓట్ల లెక్కింపు చివరి రౌండ్లు పూర్తయ్యే సరికి కూటమి సరికొత్త రికార్డు మెజారిటీతో పరిషత్ పీఠాలను దక్కించుకోవడం ఖాయంగా కనిపిస్తోంది.