SSC Exam 2027: పదో తరగతి విద్యార్థులకు అలర్ట్.. పరీక్ష ఫీజు చెల్లింపునకు చివరి తేదీ ఇదే
SSC Exam 2027: ఏపీ పదో తరగతి 2027 పబ్లిక్ పరీక్షల ఫీజు చెల్లింపులు నవంబర్ 11 నుంచి ప్రారంభమయ్యాయి. నవంబర్ 25లోపు ఆలస్య రుసుము లేకుండా ఫీజు చెల్లించవచ్చు.
AP SSC Exams
SSC Exam 2027: ఆంధ్రప్రదేశ్లో 2027 మార్చిలో జరిగే పదో తరగతి పబ్లిక్ పరీక్షలకు సిద్ధమవుతున్న విద్యార్థులకు ముఖ్యమైన సమాచారం. SSC పరీక్ష ఫీజుల చెల్లింపు ప్రక్రియ నవంబర్ 11 నుంచే ప్రారంభమైంది. నవంబర్ 25 వరకు ఎలాంటి ఆలస్య రుసుము లేకుండా ఫీజు చెల్లించేందుకు అవకాశం ఉంది. ఈ గడువు దాటితే విద్యార్థులు అదనపు రుసుము చెల్లించాల్సి ఉంటుంది. చివరి దశలో ఆలస్య రుసుము రూ.500 వరకు ఉండనుంది. అందుకే విద్యార్థులు, పాఠశాలల ప్రధానోపాధ్యాయులు నిర్ణీత గడువులోగా ఈ ప్రక్రియను పూర్తి చేయాలి.
ఆలస్య రుసుము ఎంతంటే?
ప్రభుత్వ పరీక్షల విభాగం ప్రకటించిన షెడ్యూల్ ప్రకారం.. నవంబర్ 11 నుంచి 25 వరకు ఎలాంటి ఫైన్ లేకుండా పరీక్ష ఫీజు చెల్లించవచ్చు. నవంబర్ 26 నుంచి డిసెంబర్ 2 వరకు రూ.50 ఆలస్య రుసుము వర్తిస్తుంది. డిసెంబర్ 3 నుంచి 9 వరకు రూ.200, డిసెంబర్ 10 నుంచి 15 వరకు రూ.500 ఆలస్య రుసుముతో ఫీజు చెల్లించవచ్చు. అంటే చివరి వరకు వేచి చూస్తే విద్యార్థులపై అదనపు భారం పడుతుంది. ఈ గడువులను పొడిగించబోమని పరీక్షల విభాగం స్పష్టం చేసింది.
ఏ విద్యార్థులు ఎంత ఫీజు కట్టాలి?
పరీక్ష రాసే సబ్జెక్టుల సంఖ్యను బట్టి ఫీజు మొత్తం మారుతుంది. అన్ని సబ్జెక్టులు లేదా మూడు కంటే ఎక్కువ సబ్జెక్టులు రాసే రెగ్యులర్ విద్యార్థులు రూ.125 చెల్లించాలి. మూడు సబ్జెక్టుల వరకు రాసే విద్యార్థులకు రూ.110 ఫీజుగా నిర్ణయించారు. వొకేషనల్ కోర్సుల విద్యార్థులు సాధారణ పరీక్ష ఫీజుతో పాటు అదనంగా రూ.60 చెల్లించాలి. నిర్ణీత వయోపరిమితి నిబంధనల నుంచి మినహాయింపు కోరే విద్యార్థులు రూ.300 వయోపరిమితి సడలింపు రుసుము చెల్లించాల్సి ఉంటుంది.
స్కూల్ లాగిన్ ద్వారానే చెల్లింపులు
పరీక్ష ఫీజు చెల్లింపు ప్రక్రియను విద్యార్థులు నేరుగా కాకుండా పాఠశాలల ద్వారా పూర్తి చేయాలి. ముందుగా ప్రధానోపాధ్యాయులు తమ UDISE+ లాగిన్లో విద్యార్థుల వివరాలను సరిచూసి ధ్రువీకరించాలి. ఆ తర్వాత పాఠశాలకు సంబంధించిన లాగిన్ ద్వారా అధికారిక వెబ్సైట్లో ఫీజు చెల్లించాలి. ఇందుకోసం bse.ap.gov.in వెబ్సైట్ను ఉపయోగించాలి. CFMS లేదా బ్యాంకు చలాన్ల ద్వారా చెల్లింపులు అంగీకరించరు. అలాగే మాన్యువల్ నామినల్ రోల్స్ సమర్పించాల్సిన అవసరం లేదని పరీక్షల విభాగం స్పష్టం చేసింది.
రెగ్యులర్, ఫెయిలైన విద్యార్థులకు వర్తింపు
ఈ ఫీజు షెడ్యూల్ 2027 మార్చిలో జరిగే SSC పరీక్షలకు హాజరయ్యే రెగ్యులర్, గతంలో ఫెయిలైన అభ్యర్థులతో పాటు OSSC, వృత్తివిద్య పరీక్షల అభ్యర్థులకు వర్తిస్తుంది. ఫీజు చెల్లించే ముందు విద్యార్థుల పేర్లు, ఇతర వివరాల్లో తప్పులు లేకుండా చూసుకోవాలని పాఠశాలలకు సూచించారు. నిర్ణీత తేదీల్లో ఏదైనా ప్రభుత్వ సెలవు వస్తే ఆ తర్వాతి పని దినాన్ని పరిగణనలోకి తీసుకునే అవకాశం ఉంది. చివరి తేదీ వరకు వేచి ఉండకుండా నవంబర్ 25లోపే ఫీజు చెల్లింపు ప్రక్రియ పూర్తి చేసుకోవడం మంచిది.




