AP Rainfall: ఎల్‌నినో దెబ్బ.. చివర్లో ఏపీకి భారీ ఊరట.!

AP Rainfall:ఈ ఏడాది ఎల్‌నినో ప్రభావంతో ఆంధ్రప్రదేశ్‌లో నైరుతి రుతుపవనాల సీజన్‌ తీవ్ర నిరాశను మిగిల్చింది. జూన్‌ ఒకటిన ప్రారంభమై సెప్టెంబరు ఆఖరుతో ముగిసిన ఈ రుతుపవనాల కాలంలో రాష్ట్రవ్యాప్తంగా సగటున 29 శాతం లోటు వర్షపాతం నమోదైంది. ముఖ్యంగా రాయలసీమ ప్రాంతంలో పరిస్థితి మరీ తీవ్రంగా మారింది.

రాయలసీమలో సాధారణంగా పడాల్సిన 41 సెంటీమీటర్ల వర్షపాతానికి గాను కేవలం 25 సెంటీమీటర్లు మాత్రమే కురిసి, ఏకంగా 40 శాతం లోటు నమోదైంది. మరోవైపు కోస్తాంధ్రలో 60 సెంటీమీటర్లు పడాల్సి ఉండగా 47 సెంటీమీటర్ల వర్షపాతం (21 శాతం లోటు) నమోదైంది. సెప్టెంబరు మూడో వారం వరకు పరిస్థితి అత్యంత దారుణంగా సాగింది.

సెప్టెంబరు మొదటి వారంలో కూడా నెల్లూరు వంటి ప్రాంతాల్లో తీవ్రమైన వడగాడ్పులు వీయడం ఇందుకు నిదర్శనం. ఈ తీవ్ర వర్షాభావం కారణంగా రాష్ట్రవ్యాప్తంగా ఖరీఫ్ పంటల సాగు మందగించడమే కాకుండా, పలు ప్రాంతాల్లో తాగునీటి ఎద్దడి తలెత్తి రైతులను, ప్రజలను తీవ్ర ఆందోళనకు గురిచేసింది.

సెప్టెంబరు చివరి వారంలో మలుపు.. పెరిగిన భూగర్భ జలాలు

అయితే, సెప్టెంబరు చివరి వారంలో బంగాళాఖాతంలో ఏర్పడిన తీవ్ర వాయుగుండం రాష్ట్రానికి గొప్ప ఊరటనిచ్చింది. సెప్టెంబరు 22 నుంచి 25వ తేదీ మధ్య కురిసిన విస్తారమైన వర్షాలు ఎండిపోతున్న పంటలకు జీవం పోయడమే కాకుండా, భూగర్భ జలాలను గణనీయంగా పెంచాయి.

విశ్రాంత వాతావరణ అధికారి పీవీ రామారావు అందించిన విశ్లేషణ ప్రకారం, ఈ తుది వర్షాల పుణ్యమా అని రాష్ట్రంలో భూగర్భ నీటి మట్టాల పరిస్థితి మళ్లీ ఆశాజనకంగా మారింది. కేవలం ఒక వారం వ్యవధిలోనే ఏపీలో సగటున 1.27 మీటర్ల మేర భూగర్భ జలాలు పైకి రాగా, రాయలసీమలో అర మీటరు వరకు పెరిగాయి. సెప్టెంబరు నెలాఖరు సమయానికి కోస్తాంధ్రలో సగటు భూగర్భ నీటి మట్టం 8.44 మీటర్లుగా, రాయలసీమలో 13.82 మీటర్లుగా నమోదైంది.

విశాఖలో రికార్డు వర్షపాతం.. వేసవి తాగునీటికి ఇక ఢోకా లేదు

ఈ వాయుగుండం ప్రభావంతో ఉమ్మడి విశాఖపట్నం జిల్లాలో రికార్డు స్థాయిలో కేవలం మూడు రోజుల్లోనే 33 సెంటీమీటర్ల వర్షపాతం నమోదైంది. ఫలితంగా విశాఖ జిల్లాలో భూగర్భ నీటి మట్టం అత్యధికంగా 4.24 మీటర్ల మేర పెరగడం విశేషం. ఇదే రీతిలో ఉత్తరాంధ్రలోని విజయనగరంలో 1.78 మీటర్లు, శ్రీకాకుళంలో 2.27 మీటర్ల మేర భూగర్భ జలాలు పుంజుకున్నాయి.

ఈ భారీ వర్షాల కారణంగా వచ్చే వేసవి కాలంలో విశాఖ నగరానికి ఎలాంటి తాగునీటి కొరత ఉండదని పీవీ రామారావు అంచనా వేశారు. అయితే, నగరంలోని అపార్ట్‌మెంట్లు, బహుళ అంతస్తుల భవనాలు ఎక్కువగా ఉన్న ప్రాంతాల్లో పూర్తిగా ఎండిపోయిన బోర్లు రీఛార్జి కాకపోవచ్చని ఆయన అభిప్రాయపడ్డారు. త్వరలో ప్రారంభం కానున్న ఈశాన్య రుతుపవనాల వల్ల కురిసే వర్షాలతో కోస్తాంధ్రలో భూగర్భ జలాలు మరింత పెరిగే అవకాశాలు ఉన్నాయని వాతావరణ నిపుణులు అంచనా వేస్తున్నారు.