AP Municipal Elections: ఏపీ స్థానిక పోరులో ముగిసిన ప్రచారం

AP Municipal Elections Campaign Ends: ఆంధ్రప్రదేశ్‌లోని నగర పంచాయతీలు, మున్సిపాలిటీలు మరియు నగరపాలక సంస్థల (కార్పొరేషన్లు) ఎన్నికల సంగామంలో అత్యంత కీలక ఘట్టం ముగిసింది. అభ్యర్థుల హోరాహోరీ ప్రచారంతో హోరెత్తిన స్థానిక సమరం ప్రచార పర్వానికి ఇవాళ సాయంత్రం 5 గంటలతో అధికారికంగా తెరపడింది. ఎన్నికల నిబంధనల ప్రకారం నవంబరు 1న పోలింగ్ జరగనుండటంతో, ఓటింగ్ సమయానికి 48 గంటల ముందే మైకులు, లౌడ్‌స్పీకర్ల హోరు, బహిరంగ సభలు మరియు ర్యాలీలు, ఊరేగింపులను రాష్ట్ర ఎన్నికల సంఘం పూర్తిగా నిషేధించింది.

పట్టణ స్థానిక సంస్థల పోలింగ్ ప్రక్రియ అత్యంత ప్రశాంతమైన వాతావరణంలో, నిష్పాక్షికంగా జరిగేలా రాష్ట్ర ఎన్నికల సంఘం క్షేత్రస్థాయిలో కట్టుదిట్టమైన భద్రతా ఏర్పాట్లు చేస్తోంది. ఎలాంటి అవాంఛనీయ సంఘటనలు తలెత్తకుండా రాష్ట్రవ్యాప్తంగా ఏకంగా 36,351 మంది పోలీసు సిబ్బందితో భారీ బందోబస్తును మోహరిస్తోంది. సమస్యాత్మక మరియు అత్యంత సమస్యాత్మక పోలింగ్ కేంద్రాలలో పోలింగ్‌ను పర్యవేక్షించేందుకు పోలీసు బలగాలతో పాటు డ్రోన్ కెమెరాలు, సీసీ టీవీలు, ప్రత్యేక వీడియోగ్రాఫర్ల ద్వారా నిరంతర నిఘా కొనసాగించేలా చర్యలు చేపట్టారు. నవంబర్ 1న జరగనున్న ఈ పోలింగ్ ప్రక్రియ ముగిసిన అనంతరం, నవంబరు 3న ఓట్ల లెక్కింపు చేపట్టి ఫలితాలను వెల్లడించనున్నారు.