AP Elections 2026: మున్సిపల్ స్థానాల కేటాయింపు పూర్తి.. టీడీపీ, జనసేన, బీజేపీ పోటీ చేసే కార్పొరేషన్లు ఇవే

AP Elections 2026: ఆంధ్రప్రదేశ్ రాష్ట్రంలో రాబోయే పట్టణ స్థానిక సంస్థల ఎన్నికల నేపథ్యంతో అధికార కూటమి భాగస్వామ్య పక్షాలు తమ సీట్ల సర్దుబాటును విజయవంతంగా పూర్తి చేశాయి. ముఖ్యమంత్రి నారా చంద్రబాబు నాయుడు నేతృత్వంలో జనసేన, భారతీయ జనతా పార్టీల ముఖ్య నేతలతో సుదీర్ఘంగా నిర్వహించిన సమావేశంలో స్థానాల కేటాయింపులపై స్పష్టత లభించింది. మొత్తం 17 మున్సిపల్ కార్పొరేషన్లు అలాగే 106 మున్సిపాలిటీలకు సంబంధించిన పంపకాలను ఖరారు చేశారు. కూటమి ధర్మాన్ని పాటిస్తూ ప్రధాన భాగస్వామి అయిన తెలుగుదేశం పార్టీ అత్యధిక స్థానాల్లో బరిలోకి దిగుతుండగా, జనసేన, బీజేపీలకు కూడా ఆయా ప్రాంతాల్లో ఉన్న బలాన్ని బట్టి తగిన ప్రాతినిధ్యం కల్పించారు.

మున్సిపల్ కార్పొరేషన్లలో పార్టీల వారీ పోటీ

రాష్ట్రవ్యాప్తంగా ఉన్న 17 మున్సిపల్ కార్పొరేషన్లలో సీట్ల కేటాయింపును పరిశీలిస్తే, టీడీపీ అత్యధికంగా 11 కార్పొరేషన్లలో బరిలోకి దిగనుంది. జనసేన పార్టీ 4 కార్పొరేషన్లలో పోటీ చేయనుండగా, భారతీయ జనతా పార్టీ 2 కార్పొరేషన్లలో అభ్యర్థులను నిలబెట్టేందుకు సిద్ధమైంది.

- తెలుగుదేశం పార్టీ పోటీ చేసే కార్పొరేషన్లు: విజయనగరం, విశాఖపట్నం, మచిలీపట్నం, మంగళగిరి-తాడేపల్లి, గుంటూరు, ఒంగోలు, నెల్లూరు, కడప, కర్నూలు, తిరుపతి, చిత్తూరు.

- జనసేన పోటీ చేసే కార్పొరేషన్లు: శ్రీకాకుళం, కాకినాడ, ఏలూరు, విజయవాడ. (ముఖ్యంగా విజయవాడ, కాకినాడ వంటి కీలక నగరాలను జనసేనకు కేటాయించడం రాజకీయంగా ఆసక్తికరంగా మారింది).

- భారతీయ జనతా పార్టీ పోటీ చేసే కార్పొరేషన్లు: రాజమహేంద్రవరం, అనంతపురం.

మున్సిపాలిటీలు,నగర పంచాయతీలలో వాటాలు

మొత్తం 106 మున్సిపాలిటీలు/నగర పంచాయతీలకు సంబంధించి కూటమి సీట్ల పంపకంలో ప్రాధాన్యత ఆధారంగా స్థానాలను విభజించారు. ఇందులో భాగం గా 78 మున్సిపాలిటీల్లో తెలుగుదేశం పార్టీ, 21 మున్సిపాలిటీల్లో జనసేన పార్టీ, 7 మున్సిపాలిటీల్లో భారతీయ జనతా పార్టీ తమ అభ్యర్థులను బరిలోకి దించుతున్నాయి.

- టీడీపీ బరిలో ఉన్న ముఖ్య మున్సిపాలిటీలు: ఇచ్ఛాపురం, పలాస-కాశీబుగ్గ, ఆమదాలవలస, బొబ్బిలి, పార్వతీపురం, నర్సీపట్నం, ఏలేశ్వరం, పెద్దాపురం, రామచంద్రపురం, మండపేట, కొవ్వూరు, పాలకొల్లు, ఆకివీడు, తణుకు, చింతలపూడి, జంగారెడ్డిగూడెం, నూజివీడుతో పాటు మిగిలిన స్థానాలు.

- జనసేన బరిలో ఉన్న ముఖ్య మున్సిపాలిటీలు: రాజాం, పాలకొండ, సాలూరు, తుని, గొల్లప్రోలు, పిఠాపురం, సామర్లకోట, అమలాపురం, ముమ్మిడివరం, నిడదవోలు, నరసాపురం, భీమవరం, తాడేపల్లిగూడెం, పెడన, తిరువూరు, తెనాలి, చిలకలూరిపేట, దర్శి, మడకశిర, పుట్టపర్తి, పుత్తూరు.

- బీజేపీ కేటాయించిన మున్సిపాలిటీలు: నెల్లిమర్ల, యలమంచిలి, బాపట్ల, గిద్దలూరు, కావలి, ఎర్రగుంట్ల, గూడూరు (కర్నూలు జిల్లా).

ఉభయ గోదావరి జిల్లాల్లో జనసేనకు ప్రత్యేక ప్రాధాన్యం

ఈ సీట్ల సర్దుబాటు ప్రక్రియలో జనసేన పార్టీకి కేటాయించిన స్థానాల్లో అధిక భాగం ఉమ్మడి ఉభయ గోదావరి జిల్లాలలోనే ఉండటం విశేషం. జనసేనకు వచ్చిన నాలుగు కార్పొరేషన్లలో కాకినాడ, ఏలూరు రెండు ఈ జిల్లాల పరిధిలోనివే. అదేవిధంగా వారు పోటీ చేస్తున్న 21 మున్సిపాలిటీలలో దాదాపు 10 స్థానాలు ఈ ప్రాంతంలోనే రావడం వల్ల అక్కడ పార్టీ క్యాడర్‌లో మంచి ఉత్సాహం కనిపిస్తోంది. తిరుపతి, విజయవాడ వంటి నగరాల్లో తీవ్ర చర్చలు జరిగినప్పటికీ, చివరికి కూటమి విజయాన్నే ప్రామాణికంగా తీసుకుని అంగీకారానికి వచ్చారు.

కూటమి అభ్యర్థుల గెలుపే ప్రధాన లక్ష్యం

స్థానిక సంస్థల ఎన్నికల్లో కూటమి ఐక్యతను దెబ్బతీయకుండా, వైఎస్సార్ కాంగ్రెస్ పార్టీకి ఎలాంటి అవకాశం ఇవ్వకుండా ఉండేందుకే ఈ పక్కా ప్రణాళికతో సీట్ల సర్దుబాటు పూర్తి చేసినట్లు కూటమి నాయకులు తెలిపారు. పోటీ చేసే స్థానాలు ఏవైనప్పటికీ భాగస్వామ్య పక్షాలు ఒకరికొకరు సహకరించుకుని, ప్రచారం ఉమ్మడిగా నిర్వహించి అభ్యర్థులను గెలిపించుకోవాలని ప్రణాళికలు సిద్ధం చేసుకుంటున్నారు. ఈ కేటాయింపులతో రాష్ట్రవ్యాప్తంగా స్థానిక సమరంలో ప్రచార వేడి మరింత పెరిగింది.