Kalyandurg: కళ్యాణదుర్గం మున్సిపాలిటీలో కూటమి ఘన విజయం

కళ్యాణదుర్గం: అనంతపురం జిల్లా కళ్యాణదుర్గం మున్సిపాలిటీ ఎన్నికల ఫలితాల్లో తెలుగుదేశం పార్టీ నేతృత్వంలోని కూటమి ఘన విజయం సాధించింది. మొత్తం 32 వార్డులకు జరిగిన ఎన్నికల్లో కూటమి 28 స్థానాలను కైవసం చేసుకోగా.. వైఎస్సార్ కాంగ్రెస్ పార్టీ నాలుగు వార్డుల్లో విజయం సాధించింది. పట్టణంలో జరిగిన ఈ ఎన్నికల్లో టీడీపీ అత్యధిక వార్డులను గెలుచుకుని తన ఆధిక్యాన్ని చాటుకుంది.

వార్డుల వారీగా చూస్తే తెలుగుదేశం పార్టీ 26 స్థానాల్లో విజయం సాధించింది. బీజేపీ ఒక వార్డు, జనసేన ఒక వార్డును కైవసం చేసుకున్నాయి. వైసీపీ అభ్యర్థులు 3, 4, 14, 17వ వార్డుల్లో గెలుపొందారు. 12వ వార్డులో వైసీపీ అభ్యర్థి నామినేషన్ తిరస్కరణకు గురికావడంతో టీడీపీ అభ్యర్థి రేవతి ఏకగ్రీవంగా ఎన్నికయ్యారు. దీంతో కూటమి మొత్తం 28 వార్డులను తన ఖాతాలో వేసుకుంది.

మరోవైపు మున్సిపల్ చైర్‌పర్సన్ పదవికి జరిగిన ప్రత్యక్ష ఎన్నికలో కూటమి అభ్యర్థి బుట్నా లక్ష్మీ తిమ్మరాజు ఘన విజయం సాధించారు. ఆమెకు మొత్తం 18,752 ఓట్లు పోలయ్యాయి. వైసీపీ అభ్యర్థి దొడగట్ట బోయ మౌనిక మురళికి 7,176 ఓట్లు లభించాయి. కాంగ్రెస్ అభ్యర్థికి 356 ఓట్లు, నోటాకు 563 ఓట్లు నమోదయ్యాయి. 261 ఓట్లు చెల్లనివిగా తేలాయి. దీంతో బుట్నా లక్ష్మీ తిమ్మరాజు తన ప్రత్యర్థిపై 11,576 ఓట్ల మెజార్టీతో విజయం సాధించారు.

వార్డుల ఫలితాలతో పాటు చైర్‌పర్సన్ ఎన్నికలోనూ కూటమి అభ్యర్థులకు ఓటర్లు మద్దతు పలకడంతో కళ్యాణదుర్గం మున్సిపాలిటీలో కూటమి బలం స్పష్టమైంది. ఫలితాలు వెలువడిన అనంతరం టీడీపీ, బీజేపీ, జనసేన నాయకులు, కార్యకర్తలు సంబరాలు చేసుకున్నారు. విజయం సాధించిన అభ్యర్థులకు పార్టీ శ్రేణులు అభినందనలు తెలిపారు.

ఈ ఎన్నికల ఫలితాలతో కళ్యాణదుర్గం మున్సిపాలిటీలో నూతన పాలకవర్గం ఏర్పాటు దిశగా రాజకీయ పరిణామాలు ముందుకు సాగనున్నాయి.