Guntakal: ఎన్నికల వేళ లాడ్జిలు, హోటళ్లపై పోలీసుల నిఘా

గుంతకల్లు: రాబోయే స్థానిక సంస్థల ఎన్నికల నేపథ్యంలో పట్టణంలో శాంతిభద్రతలను కాపాడేందుకు లాడ్జిలు, హోటళ్ల యజమానులు, నిర్వాహకులు అప్రమత్తంగా ఉండాలని గుంతకల్లు వన్‌టౌన్ పోలీస్ స్టేషన్ ఇన్‌స్పెక్టర్ వి. శ్రీధర్ సూచించారు. అసాంఘిక శక్తులు లాడ్జిల్లో ఆశ్రయం పొందకుండా నిరోధించడంతో పాటు, ఎన్నికల సమయంలో అవాంఛనీయ సంఘటనలు జరగకుండా ముందస్తు జాగ్రత్తలు తీసుకోవాలని కోరారు.

ఈ సందర్భంగా లాడ్జిల్లో గదులు కేటాయించే ముందు ప్రతి వ్యక్తి చెల్లుబాటు అయ్యే ప్రభుత్వ గుర్తింపు కార్డును పరిశీలించి, వారి వివరాలను నమోదు చేయాలని తెలిపారు. చెక్‌-ఇన్ రిజిస్టర్‌లో బస చేసే వ్యక్తి ఫొటో, ఫోన్ నంబర్, చిరునామా, రాకకు గల కారణాలను తప్పనిసరిగా నమోదు చేయాలన్నారు. ఇతర ప్రాంతాల నుంచి వచ్చిన వ్యక్తుల వివరాలను సైతం నమోదు చేసి, అవసరమైన సందర్భాల్లో స్థానిక పోలీసులకు సమాచారం అందించాలని సూచించారు.

లాడ్జిల్లో బస చేసే వ్యక్తులు స్థానికంగా ఎవరినైనా కలవడానికి వచ్చినట్లయితే, సంబంధిత వివరాలను నమోదు చేసుకోవాలని చెప్పారు. ఎవరైనా అనుమానాస్పదంగా కనిపించినా, తప్పుడు వివరాలు ఇచ్చినా వెంటనే పోలీసులకు సమాచారం అందించాలన్నారు. పోలీసు అధికారులు చట్టబద్ధంగా తనిఖీలు నిర్వహించినప్పుడు సంబంధిత రికార్డులను అందుబాటులో ఉంచాలని, లాడ్జి ప్రాంగణంలో సీసీటీవీ కెమెరాలు నిరంతరం పనిచేసేలా చర్యలు తీసుకోవాలని ఆదేశించారు.

అలాగే లాడ్జి ప్రాంగణంలో మద్యం సేవించడం, అనుమతి లేకుండా మద్యం సరఫరా చేయడం, మద్యం మత్తులో శాంతిభద్రతలకు విఘాతం కలిగించే చర్యలను అనుమతించరాదని స్పష్టం చేశారు. మద్యం సంబంధిత చట్టాల ఉల్లంఘనలు లేదా ఇతర అక్రమ కార్యకలాపాలు గుర్తించిన వెంటనే పోలీసులకు తెలియజేయాలని సూచించారు. చట్టవిరుద్ధంగా మారణాయుధాలు, తుపాకులు లేదా ఇతర ప్రమాదకర ఆయుధాలను తీసుకువచ్చే వ్యక్తులvi విషయంలో అప్రమత్తంగా ఉండాలని, అలాంటి ఘటనలు గుర్తిస్తే తక్షణమే పోలీసులకు సమాచారం అందించాలని తెలిపారు.

ఎన్నికల అక్రమాలకు తావివ్వొద్దు

ఎన్నికల సమయంలో లాడ్జిలను చట్టవిరుద్ధ సమావేశాలకు, అనుమతి లేని రాజకీయ సమావేశాలకు వేదికగా మార్చడం, ఓటర్లకు డబ్బు లేదా మద్యం పంపిణీ వంటి అక్రమ కార్యకలాపాలకు అవకాశం కల్పించడం చేయరాదని ఇన్‌స్పెక్టర్ శ్రీధర్ స్పష్టం చేశారు. ఎన్నికలు ప్రశాంతంగా, స్వేచ్ఛాయుత వాతావరణంలో జరిగేలా లాడ్జిలు, హోటళ్ల యజమానులు పోలీసు శాఖకు సహకరించాలని కోరారు.

సమాచారం కోసం పోలీసుల ఫోన్ నంబర్లు

గుంతకల్లు వన్‌టౌన్ పోలీస్ స్టేషన్ పరిధిలో ఏదైనా అనుమానాస్పద కార్యకలాపాలు లేదా ఎన్నికల అక్రమాలకు సంబంధించిన సమాచారం ఉంటే పోలీసులకు తెలియజేయాలని సూచించారు. ఇన్‌స్పెక్టర్ వి. శ్రీధర్: 94407 96821సబ్‌ ఇన్‌స్పెక్టర్ కె. సురేష్: 99663 83001సబ్‌ ఇన్‌స్పెక్టర్ ఆర్. కల్యాణ్: 63002 74617పోలీస్ కంట్రోల్ రూమ్ అత్యవసర నంబర్లు: 100 / 112.