Gooty: మద్యం దుకాణాల లైసెన్సుల రెన్యువల్ పూర్తి చేయాలి

గుత్తి: గుత్తి ప్రోహిబిషన్ అండ్ ఎక్సైజ్ స్టేషన్ పరిధిలోని మద్యం దుకాణాల లైసెన్స్‌దారులు 2026–27 సంవత్సరానికి సంబంధించిన లైసెన్సుల రెన్యువల్ ప్రక్రియను నిర్ణీత గడువులోగా పూర్తి చేసుకోవాలని గుత్తి ప్రోహిబిషన్ అండ్ ఎక్సైజ్ ఇన్‌స్పెక్టర్ ఉమాదేవి సూచించారు. ఈ మేరకు శుక్రవారం లైసెన్స్‌దారులతో ప్రత్యేక సమావేశం నిర్వహించి రెన్యువల్ విధానంపై అవగాహన కల్పించారు.

సమావేశంలో APSBCL పోర్టల్ ద్వారా ఆన్‌లైన్‌లో రెన్యువల్ చేసుకునే విధానం, అవసరమైన పత్రాలు, ప్రభుత్వ ఫీజుల చెల్లింపులు, దరఖాస్తు సమర్పణ తదితర అంశాలను వివరించారు. ప్రస్తుత లైసెన్స్‌దారులు తమ లాగిన్ వివరాలతో పోర్టల్‌లోకి ప్రవేశించి Retailer–Renewal Application–Renew Shop ఎంపిక ద్వారా దరఖాస్తు చేసుకోవాలని తెలిపారు. నిబంధనలను అంగీకరించి సంబంధిత ప్రభుత్వ లెవీలు చెల్లించిన అనంతరం చలానా కాపీలను అప్‌లోడ్ చేసి, అవసరమైన ఫారాలు, అండర్‌టేకింగ్ పత్రాలను సమర్పించాలని సూచించారు.

గుత్తి మున్సిపాలిటీ పరిధిలోని ఐదు మద్యం దుకాణాలకు రూ.22.99 లక్షలు, పామిడి మండలంలోని మూడు దుకాణాలకు రూ.27.17 లక్షలు, యాడికి మండలంలోని నాలుగు దుకాణాలకు రూ.27.17 లక్షల చొప్పున 38 శాతం రెన్యువల్ ఫీజు చెల్లించాల్సి ఉంటుందని తెలిపారు. రిజర్వ్డ్ కేటగిరీ దుకాణాలకు రూ.11.51 లక్షలుగా రెన్యువల్ ఫీజు నిర్ణయించినట్లు వెల్లడించారు.

రెన్యువల్ ప్రక్రియ పూర్తి చేసుకునేందుకు మరో రెండు రోజుల గడువు మాత్రమే మిగిలి ఉన్నందున లైసెన్స్‌దారులు ఆలస్యం చేయకుండా దరఖాస్తులు సమర్పించాలని ఉమాదేవి కోరారు. ఇప్పటికే రెన్యువల్ చేయని మద్యం దుకాణాలను సెప్టెంబర్ 22 నుంచి నోటిఫికేషన్ ద్వారా తదుపరి టెండర్ లేదా దరఖాస్తు ప్రక్రియలోకి తీసుకురానున్నట్లు తెలిపారు. ప్రస్తుత లైసెన్స్‌దారులు తమకు కల్పించిన అవకాశాన్ని సద్వినియోగం చేసుకుని గడువు ముగిసేలోగా రెన్యువల్ ప్రక్రియను పూర్తి చేసుకోవాలని ఆమె స్పష్టం చేశారు.